|
|
Bana betu, cidimu citudi eci tudi batacile muanda munene wa ditancisha muntu mu bumuntu buende, bavuluke se: yeye ke ciuma cinene cia ditunga. Mpindiewu cidimu eci cikadi cienda ciya ku ndekelu wacio. Tudi anu bavuluke se: munkaci muacio, mu bibejibeji bietu bishilangane, tuvua balejangane se: Bubanji bunene bua ditunga ki mfualanga mivule, nansha nzubu minene, nansha ndeke ne mashinyi to. Kadi bubanji bunene mmuntu wa nsongo, muibaka bimpe. Bualu yeye ke udi mua kuenza ndeke ne kumuendesha, anyi kukeba mfualanga ne kumanya cia kuenza nayo. Mbuena kuamba se: Bintu ebi bionso bidi cianana mu ditunga dia bacimbakane, didi kadiyi ne bantu bajalame. Nanku, bu mutukavua batueku munu pa bimue bishi bidi binyanga bumuntu bua bantu mu Kongo wetu ewu, tudi basue kuenza bia momumue pa kuela muanda wa mateta a Mbulamatadi mu cialu lelu. |
|
Cimfuanyi cipeta mu Vivant Univers |
Cibidilu cia diela bana mateta mu tulasa cidi ne kipacila kayi ?
Ku dietu dimona, mateta adibo beela bana mu tulasa adi ne kipacila kasunguluke, ka kujandula mamanya adibo bapete mu dilonga diabo, kumona bavua ne cisumi ne bavua kabayi nacio. Pashishe, kuela bavua ne disuminyina kalumbandi.
Ki nkujike to. Mateta adi ne kipacila kakuabo. Kadi nunku: Padi muana ulonga, muindile mateta, udi upeta muoyo wa cisumi; bua kavu kubula.
Kadi bua kuenzekabio nanku, anu mateta pawo mikale alonda njila mululame, ukena mavuanga nansha bienzenza bikuabo. Cianana kaena mua kusonsola bana ku dikuata dia mudimu nansha.
Kadi ambayi, etu adi Mbulamatadi wela bana mu Kongo emu ku njikijilu wa malonga abo, adi alonda njila mululame anyi ?
Bana betu, muaba ewu katuena mua kudia mulembua ne bundu to.
Tudi bajadike se: Mateta, adibo beela bana ku ndekelu wa tulasa tubandile ne tupuekele, adi amueka anu bu mudimu wa « Cinkondia’a ndimba, wa kutapa ciaji cia ngaji e kucipana ku manyi » Bilema bidi binyanga kipacila ka mateta aa bidi bungi bu ntundu ne ngenena; kabidi bidi bikuata miombo e kukuata ciondo, e kukuata ne muciedi muine.
►Ku luseka lua beedi ba mateta badi Mbulamatadi utuma, kudi
nangananga muoyo wa lukuka lua mfualanga.
Ke mutusombela tumona mabeji a nkonko adianza kupatuka, endakana kumpala kua
mateta mine kuenzekawu.
Ebi bidi bienzeka nenku ku cidimu cionso Mbulamatadi mutangile.
►Ku luseke lua balombodi ba bilongelu, kudi kabidi bilema binene. Bobo badi basumpakana bikole mu cikondo cia mateta , basangisha mfualanga kudi bana, ya kupesha beedi ba mateta, bua malu apitakane mu bunyana.
►Ku luseke lua balongi, bu mudibo bamanye ne: diba dia mateta batuandamuinyi ba nkonko nebamueke, kabena ne didifila dia bushuwa to. Badi balengulula dilonga, badifila anu ku buenzavi. Diabo dia kutabuluka mpadi mateta asemena pabuipi. Diba adio badi bakabuela mu tuzubu tusokome nansha mu bisuku ne : Tudi tukapengamena mateta. Cine eci badi bacibikile mu mfualansa ne : « Maquis » Kabidi bua dimonamona binabo bavua babadianjidile benza bia nanku, kadi e kufika anu ku dipeta mikanda ya njikijilu, ke padibo baseka bena cisumi.
►Nansha baledi bine badi pabo mu bualu ebu. Badi bafuta makuta cifutafuta, bakeba anu mukanda wa njikijilu, kabayi bavuluka nkolelu wa bana.
Bua cilumbu eci, tuetu bonso, badi mu mulala awu nansha kabayimu, tudi anu batapakane bitoci: Mbulamatadi, Ekeleziya, Bitendelelu bishilangane, Bilongelu, baledi ne bena ditunga bonso.
Nanku diba adio, tudi mua kubikila cintu eci ne mmateta anyi peshi mmanaya ?
Kadi pikalacio mmanaya, mbimpe tudiebejayi: nNganyi udi ne dianyisha dia kunaya ne nkoleshilu wa bana mu ditunga ?
Bana betu, tuanyangi Kongo bikole. Udi wenda ushala citungatunga munkaci mua matunga makuabo : Kongo wa nzala, wa musunsu, Kongo wa bupele, wa mvita kabidi munyangi wa bende bana !
Tudi tuciamakaja ngenzelu yetu ya buivi bua mfualanga ne ya nkosa mishiku mu njila wabo.Se tudi tubatutubija, tutubija ne ditunga. Nanku ambayi, mvula makumi atanu kumpala kutuyaya eku, tuetu banyangakaji ba malu aba netuikale muaba kayi?. Ne pinapo, ditunga dietu nedikale mu njila kayi?
Bakulu pabo mbatuambila ne: « Kombela bitende, bualu mikoma nya bende ». Se mmomumue ne: Ditekemena dia bidimu bicivuavua nuditeke mu bana, bualu bakulumpe bobo bakadi kapata kamue ne Maweja.
Bakulumpe wetu, patuikala bumvue cintu acio bimpe, tulekelayi kuatula buloba, bua kushila bana anu kabuba ne mingonga mu ditunga.
« Kuambilangana mutudi ki mbulanda kufua nansha »
