Nkololo wa mukuenu ...
|
Tudi bapete lumu lua dibungama kudi tatu Ciebue Fernand wa ku Katombe ne tatu Bukasa Anastas wa mu Kasavubu, batumanyisha lufu lua wetu Kalambayi Augustin, musonsodi wa b.b.t.m. mu Katombe. Mufue ewu uvua mulela mu dia 22/ 11/ 1951 ku Kananga. Mulopo wamubikidi mu dia 9/ 8/ 2002, panyima pa disaama dia matuku makese. Muena Kuulu amunzuluile cibi cia diulu, alame kabidi nshiya yende idi mishale panuapa.
|
|
Bulaba kabuyi mukana bujikija badi panu
|
Tatu Norbert Malangu, musonsodi wa b.b.t.m. mu Bonzola, udi utumanyisha pende lufu lua tatu Théodore Kalonji, muena bualu wa mu muine Nsangilu ewu. Mufue wetu ewu umuenene diba mu cidimu cia 1933. Nyewu washiyanganyi netu mu dia 15/ 9/ 2002. |
|
Tudi bapete mukenji bu wa nshima milale, wa lufu lua tatu Honoré Beya Mukinkila, mubadi ne mufundidi wa Munyaku wa kalanda’a musenga. Bua civulukilu ciende, tatu Honoré mmutushile, mu Munyaku, mifundu ya mushinga mukole : Kasala ka Bak’Odile, ka bakua Mukendi kabidi ne nsumuinu ya meji kabukabu.
Matuku a pepi ne lufu luende elu, tatu Mukinkila uvua mujuke e kuya ku Bak’Odile, bua kumonangana ne bana babo.
Kuine kuaka ke kudiye mukapingajile anyima wende kua Maweja, mu dia 30/ 10/ 2002.
Munyaku udi udisanga ne bonso badi badila mufue wetu ewu, muikale umujingila muoyo wa ciendelele mu nzubu wa Maweja.
|
mBatumanyishe lufu lua wetu Symphorien Ngoyi Kasomboyi, umue wa ku bena ciota cia bangenda’a mushinga, mu bena Cibuabua. Tatu Symphorien ewu ufuile mu dia 18/5/2002, panyima pa disaama dia matuku makese. Yeye ewu uvua muena muoyo muvule wa disambila ne wa diambuluisha Ekeleziya mu midimu yende. Mulopo uvua mumufuke, amufuileku luse pa biende bilema, amuakidile muende mu kaala kakomba. |
|
Bana betu bananga nuaya bilenga
Bena Ciota cia mua Mulamba wa citupa cibidi, ku luseke lua Ngandanjika, badi ne cinyongopelu cinene bua lufu lua umue wa kudibo : mamu Masengu Lubanda. Badi kabidi badila bakupa mitu bua dijimina dia tatu Muepu Marcel, mubadi wa mu ciota cia mua Musakaci.
Pa nanku badi balombela binabo babidi aba bua Mufuki abakidile.
