Muanetu Oscar Badibanga Nsambuka wa ku Citolo, mu Cibila, udi utumanyisha muanda wa mvula wa cipupu uvua muloke kuntu eku mu disatu dia 25/9/2002, kuangacila pa diba dia mpulumuku too ne pa dia musombusombu. Mvula ewu uvua ne cipepele cikole, kabidi ne mabua mapite bungi. Mu diloka diende, kushimbulaye mici mipite bungi; kabidi nansha mu madimi kamuvua mushale muci ne diangi.

Kadi cidi citubungamije nangananga ngeci : Mvula ewu mmuupule nzubu wa tatu Fernand Batubenga wa Lukusa, pende muikale utata bikole ne disaama dia mesu. Cimanu cikuabu ciupuka e kuboza nzolo yende ivua imuambuluishakoko. Edi ndikenga kaayi ?