Kebeji wakapambuka
Nkonko mipiamipia
Tatu Oscar Badibanga Nsambuka, musombele ku Citolo, udi webeja babadi ba Munyaku se:
1.1. Muena mutumba yeye ututa muena kuende, wewe kuya bua kubasunga, bua kikadi wavua kumushipa, Mbulamatadi pende wavua kutuasa cilumbu. Kadi utuula anu makasa, awu kukututa muci ku disu, padio kufua. Udi mua kupita bishi ne muena mutumba awu ?
Amu yeye tatu Oscar ewu mmusue kumanya ne :
1.2. Nyama wa ngandu ne Kabola muntu badi ne bulela kaayi ? Bualu, mu cisa cietu cijima cia Baluba, bantu badi bambilangana ne : Ngandu yeye mukuate muntu, nuenu bamuela diyi ne : Wa Kabola lejakoko, udi upatula cidimba cia muntu pamutu pa mayi. Lungenyi elu ndufume penyi ?
Muanetu Edouard Kabeya wa ku Muene-Ditu, udi ulombababadi betu se
1.3. Bamufundileku, mu Ciluba, mena a meba, bilondeshila dilondangana diawo mu dituku ne cidiwo umvuija.
Wetu Constantin Kadima Kashikija, musombele ku bakua Cimuna, udi webeja se:
1.4. Tudi tumona balongi ba mu cidimu cia ndekelu, cia tulasa tubandile nansha tupuekele, tua mu bilongelu bidiashila, bua kuenzabo mateta a njikijilu wa malonga, anu Mbulamatadi muambe diende diyi. Pashishe, yeye Mbulamatadi ewu mmuvudije mu bilongelu ebi tukiyakiya tupite bungi. Ambayi bana betu, ndishilangana kayi didi pankaci pa tulasa tudiashila ne tua Mbulamatadi ?
2. Pa kabukulu ketu ne malu mashilangane a mu bisa bietu
Muanetu Sylvano Kabamba wa ku Miabi, udi webeja se:
2.1. Mfumu wa Baluba, mukalenga Kabamba’a Ngomba ka Milemba, baledi bende bavua ne mena kayi ? Yeye muine uvua mumune ngomba ya bungi anyi peshi uvua udia ngomba bikole, bua padiye muangate dina edi dia Kabamba’a Ngomba ?
Mamu Julienne Kalenga, wa mu Cikongo cia bena Cibuabua, udi ukonka ne:
2.2. Ku misoko, padi muntu mukulumpe ufua, bakulumpe ba ditunga, bana babo ne mufue, badi bambila bana bende ne : Patuilayi tatuenu mbuji wa mabuki. Mabuki aa adi umvuija cinyi ?
Wetu Kabeya Frédéric wa ku Muene-Ditu mua Macici, mmuele pende lukonko ludi lulonda elu:
2.3. Ntu ngumvua bamba ne: bakua Kande, bakua Ndaba, bena Citolo ne bakua Bowa mmbana ba Nkashama. Kadi civua cifikishe bena muntu aba ku diabulukangana ncinyi? Bobo bine aba, wabo mujilanga nnganyi?
Mubadi wetu, Kalala Jean-Pierre wa mu Kizito, mmuele lukonko lusua kufuanangana ne ludi kumutu elu. Udi webeja se:
2.4. Kanyana, Citolo, Ndaba, Muembia ne Kapuya wabo mmbana ba Nkosekela. Pashishe tudi tumvua bamba kabidi se: bobo aba mbadie bujilanga. Nanku bana ba muntu umue badi mua kudia bujilanga anyi? Kadi Ndaba udibo bateela ewu, ntatu anyi mmamu ?
Mbeele babadi ba Munyaku lukonko kudi wetu Dieudonné Matamba wa mu Kasavubu. Udi webeja ne:
2.5. Pasombela bampamba bimba mu musambu ne: Mpamba kua Mulandala, tudi tumvua diakamue se: batedi ku Kalambayi. Nanku ku Kalambayi ke kupatukile mpamba wa kumpala anyi ?
Tudi ne lukonko luela kudi tatu Cimpanga Dominique, musombele ku Ngandanjika mu Nkolongo. Udi ukonka se:
2.6. Ku kale, pavua muku uya kadila tatuende muenu, uvua ukeba bangomba. Kadi lelu utudi ewu, muntu yeye muye kadila muku wende mu buena Nzambi ne tungimba tua mu Ekeleziya, mmuenze cilema anyi?
Jean Constantin Kazadi wa mu Cikongo cia Inabanza wa mu Lourdes, munu mu Mbujimayi, udi ukonka se:
2.7. Pasombelabo bamba ne: Newudikonke, bu Ntumba Keta ku Muene-Ditu, mbasue kuamba cinyi ? Ntumba Keta uvua nganyi ? Civuaye muenze cine ncinyi?
Mutufundidi wetu Kabeya Frédéric wa ku Muene-Ditu, udi ukonka babadi se:
2.8. Pa kale, cilele cia difidila muana wa bakaji mbuji wa buledi civuaku anyi ? Kafidila ka muine mbuji ewu kavua bishi ? Ncisamba kayi cia Baluba cituadijile muine muanda ewu ?
Mubadi wetu Cimpanga Dominique, wa ku Ngandanjika, mmuele babadi lukonku elu ne :
2.9. Muntu udi mua kupiana mukaji’a muakunyiende nansha wa mansebende anyi ?
Tatu Florent Kashimba wa ku Ngandanjika, udi webeja bakulumpe nende.
2.10. Nkonko yende nyoyo eyi:
2.10.1. Cikondo citufumine kua Mulopo Kasonga, Manda Kampema uvua bujike anyi uvua ne mukaji ? Pikalaye muselangane, uvua ne bana bungi munyi ?
2.10.2. Muine muaba udi bena Manda baase ewu, bavua basanganepu bantu anyi peshi pavua anu cipeela ? Nenku musangana wa bena Manda nnganyi ?
2.10.3. Bakua Malaba ba bakua Kalonji ne bakua Malaba badi kua Manda, tudi tumvua bamba ne: mbantu bamue, kabaya kuselangana. Kadi cidi cibafikishe ku diabulukangana ncinyi ?
2.10.4. Tatu kampanda uvua mupiane mukaji’a muanabo, e kulelaye nende bana babidi ba balume. Bana aba bakola, yeye e kubaselela. Kadi, bua padi tatu ewu kayi mulele muana wa bakaji; cienzaye ncinyi bua mulambu wa mayi a munda ?
Tudi ne lukonko luela kudi wetu Musangu Cidinda, musombele mu Inera ku Ngandanjika, udi ukonka se:
2.11. Bena Kayembe ba bakua Kalonji ne bena Kayembe ba kua Mpiana, mbantu bamue anyi peshi mbisamba bibidi bishilangane ?
Muanetu Dieudonné Matamba Kokola wa mu Kasavubu, mmuele nkonko yende:
2.12. nYoyo eyi:
2.12.1. Mu kasala ka bena Nshimba, basombele bamba ne: “Nshimba Cikole mujilanga”. Kadi tuetu tudi bamanye se : Cikole eci cidi mu bakua Mulumba. Nanku bena Nshimba aba, badi ne mfuki wabo mu bakua Mulumba anyi ?
2.12.2. Padibo bamba bena Ciaba ne : mBasangana ba bakua Kalonji, mbasue kuamba ne: Bakua Kalonji, pafuminebo ku Nsanga’a Lubangu, bavua basangane bena Ciaba bamane kuasa anyi ? Pikalabio nanku, mmunyi mudibo mua kubabikila ne mbakua Kalonji ?
2.13. Pa diashila mamu nzubu
Muanetu Dominique Cimpanga mmukonke babadi ba Munyaku muanda udi ulonda ewu:
Tatu yeye mufue, e kupianabo mukajiende kudi muanabo ; kupita matuku mulongo, uvua mumupiane ewu e kumuipata. Nenku, bana ba mawu ewu, bavuaye mulele ne bayende wa mu kabandu ufuile, badi mua kumuashila nzubu mu mbanza yabo nansha kumusumbila cilamba cia kuvuala anyi ?
2.14. Pa mfuki wa musambu wa Munyaku
Muanetu Kashimba Florent wa ku Ngandanjika, udi ukonka se:
Pavua bena kale bimba musambu ewu wa ne: Munyaku ee wa nsona, bena Manda beelamu, bakua Mulumba beelamu, bena Nsana beelamu, anu nanku ; buabo bobo, cikondo acio, muaku ewu Munyaku uvua umvuija cinyi ? Kabidi civuabo beelamu cine ncinyi ?
Muanetu André Nzengu wa ku Kabeya Kamuanga, udi webja:
2.15. Muntu yonso wendenda ewu udi anu ne kuabo kumulela. Kadi tudi tumona bamue bantu banyingalala padibo babamba ne: wewe udi muena cisa kampanda nansha diku kansanga ; bamue bafika too ne ku diasangana bilumbu.
3. Pa bupue kabupu bua milambu
Tatu Kasonga Martin wa ku Katanda, udi webeja se:
3.1. Mudiambike wa Maweja, yeye muledibue mu diku didi ne mishika ya bungi, badi mua kumulambula mulambu anyi ?
Tudi ne lukonko luela kudi tatu Odia Robert, wa mu Kabanda, ku Ngandanjika.
3.2. Ludi nunku: Muana yeye mulambule tatuende mbuji ne nzolo bia ku mudimu wende, tatu e kubiteeka panshi, pabio kulela, e kuvulangana. Ku diambuluisha diabio, tatu kuselaye mukaji mukuabo, e kulelabo nende muana wa bakaji. Kadi ambayi tung’, paselabo muana ewu, tatu neafile biuma bia mulambu kudi muanende uvua mumulambule pende mbuji ne nzolo anyi nealambule muntu mukuabo ?
Tatu Léonard Mbaya wa kua Musakaci udi ukeba butoke :
3.3. Nkonko yende idi nunku:
3.3.1. Kuetu, bua kudikuula ku bupika bua milambu ya mu diku, muntu uvua usela mukaji muibidi, bua se: Bana banyi kabashadi ku bupika bua nzubu uvuaye yeye ukalambula milambu to.
Kadi mmunyi mudi bana, bamana kusulula ku buine bupika ebu, batungunuka pabo lelu ne disela bakaji bibidi ?
Amu yeye mufundi wetu ewu, udi webeja kabidi se:
3.3.2. Bana betu, mmu diku kayi, nansha cisamba kayi, mukadiku lupetu lua mulambu lupanga wa kululambulabo ?
Ku Kabeya Kamuanga, mbatufundile kudi tatu Stéphane Mpoyi Mukendi.
4.1. Udi ulomba babadi nende diumvuija dia miaku idi ilonda eyi:
► Kusela ne bundu,
► Kulela ne bundu,
► Kubenga kulela ne bundu,
► Kuyukila ne bundu,
► Kuikala mubanji ne bundu,
► Kuikala mulanda ne bundu,
► Mufule bu dishi,
► Lumu katuidi mukosu, ludi anu ne walu udilu lulumba,
► Wapita badia kupici balumbulula,
► Cishibeele kabotubotu mmvula wa mudimbi ?
Tatu Dominique Cimpanga, wa ku Ngandanjika, udi ukeba:
4.2. Diumvuija dia miaku idi ilonda eyi:
► Ina’a banza,
► Ilunga’a Mbiya,
► Ina’a muana ?
Tatu Stanislas Mbaya, musombele mu Cikama, udi ujinga pende:
4.3. Diumvuija dia miaku eyi:
► Bualu bua munda kuambidi mukajiebe,
► Kudi bulunda ne mpulushi,
► Katenda kateyateya kuteyi?