Ciluba ke wetu muakulu,

Ciluba wetu,

Udi muakulu wa Baluba basanga mu mena,

Kutuadija ku Nsaadi, kusabuka Lualaba,

Kueyeka ne ku Ntanganyika mule bidimba.

Udi wa Baluba Shankadi bonso basanga ntanda.

Wewe udi muakulu wa Ilunga Mbidi Nkola wa ku diba.

Kamona bintu kabinyanga wa Ndaya.

Ciluba wetu,

Mbakuakula kudi Kasonga Bamulambula Nkumuimbua muena lunsuya.

Udi citebua mukana, mukana mukudiile ke mukulumbuluile.

Badi bakuela mu tusala, bakuela mu biondo.

Bakusenga dia mvita ne dia malu matonda,

Ciluba, Ciluba, udi muakulu wa bakalenga.

Ciluba wetu,

Se udi cilunga wa mbumbutayi, wa kudia matama kaasami.

Bidimu nkama ne nkama binkumvuile bakuela muyenga,

Udi wa bavuala nsoka, beela luonji mu mpaya.

Badi kumona ewu bu ewu,

Mukua kanyenga muoyi, wa badi banyenga muoyi bu ciamu.

Ciluba wetu,

nNganyi udi mua kumvua bakuela mu kasala,

Mubidi kawuyi umuvuayila,

Bulobo bubanda, binsonji biengelela mu mesu.

Ciluba,

Udi muakulu wa bushuwa wa kutemba ku bantu,

Mupite mfuekenke busheme,

Kadi ndekela nganji kukuimbaku lelu.

Ciluba wetu,

Wewe ke wanyi muakulu, muakulu wa ku dibeela dindela,

Muakulu wa citeelu cindaya, udi kupa butumbi kashidi,

Wa kunaya nebe ciende ncibawu, cibawu acio cia diditatakaja.

Nemekayi wenu muakulu, nuwakule ne kenu kalolo,

Nudianyishe nawu mu yenu midimu.

mMukole pa kuwumanya, lekelayi kuwukonyangaja

Ne miaku ya cisombasomba, idi kuteleja kayijikuluku.

Tusanke tudianyishe, tutumbishe Mufuki,

Bualu utupeele wetu muakulu,

Tuwakule bua utante mu yetu ndelu

Kashidi ne kashidi kawujiminyi,.

Ciluba wetu,

Udi ne miaku bungi kabuyi kubala,

Miaku bungi bu ntundu ne ngenene,

Wewe kuena ukengela mikuabo miakulu,

Bua wewe kumvuija ngenyi mivule ya mamanya.

Bushuwa, mbilenga kulonga mikuabo kumanya,

Bua kubala mikanda kuanuna.

Kumvuangana ne bukua bisamba kalolu,

Bua kuyisha bungenda kumpala ne bumunyi,

Mu bubanji bua Ditunga kashidi.

Kadi ncipepeji wanyi muakulu,

Ncipu muoyo se: nansha ngamanya ya ku matunga a kule,

Kua ba kanyunyi kaya kashikila.

Nansha umue wa kudiyo kawadiakuenza wanyi muakulu.

Kadi Ciluba nguanyi muakulu,

Wa bumpianyi lapalapa,

Munshila kudi bankambua ne baledi.

Ciluba wetu,

Songaku nkele kashidi, bakutue makumbu a kalolo,

Kudi bana, kudi bakulumpe ne kudi banunu,

Mu bicia bionso ne bidimu.

Bualu udi muakulu wa dikema,

Muakula kudi bankambua mu musebu.

Bakula babila Ciamakanda Mulopo Maweja’a Nangila.

Kapongo Muena bantu,ufukile bibishi ne biosha,

Utupeele bionso bidi panuapa.

Ciluba wetu ngamanyi kukusenga,

Tantaku, uye kulekule.

Wanyi muakulu tumbaku kashidi.

Mulopo wetu tuasakidila, bualu utupeele wetu muakulu.