Mfumu wa musoko kampanda uvua mukamishe mayi a musulu, bua kumona mua kukeba muanende wa bakaji wa mvula dikumi ne isambombo, uvua mujimine dituku dijima.

Ngandu ivua mu mayi amu e kumuangalayo, e kuya yenda ikeba muaba uvua misulu mikuabo. Kuyileyo aku, umue wa ku yoyo kupanga mushindu wa kutungunuka ne luendu, bua nzala ne dipungi, e kulaalaye mu cisuku mafuku abidi majima.

Kuavu nsongalume kampanda pende eku, kusanganaye wa Kabola muletele, mutue ciadi pa bisosa. Umona nsongalume e kumuela diyi ne: Muanetu, pangakumonu apa, ngapandi.

Anyisha ungambuleku, ukangele mu mayi, bualu ndi muzengele bikole ; lelu ewu ndituku disatu kacia mfumuenu wumisha musulu bua kukeba muanende. Wamba nanku, e kutungunukaye ne disengelela nsongalume ne: Mpandishekoku, ngadiakukupandisha panyi. Nsongalume umvua nanku, e kumba kuya kakeba ciata cia kuambuila Ngandu. Bafika ku musulu, Wamudilobo ne: Ngambula, ungele mu mayi, bualu ciena ne mushindu wa kudiendela to. Awu kubuela nende mu mayi. Mine aa avua mondoke, matue ne mu cimonu. Ngandu kutungunuka anu ne disuya nsongalume umuambila se: Ciena ne mushindu wa kuowela to, se mvua mukuambile ne : Ndi ne nzala. Inda nanyi pankaci pa mayi, ushishe kuntuulula. Pine pankaci apu, mayi avua ashikidile nsongalume mu nshingu. Umutuulula, awu e kumupia ku diboko ne: Ciena nkulekela to ; bualu wewe muye, ciakupeta kabidi cia didia buala. Mbimpe nkudiakoko, bua mpete bukole, patupu ndi mua kufua.

Nsongalume ne: Kia! Mukalenga, mudimu bungiwo undi mukuenzele ; ukadi wamba mua kundia ? Ngandu ne : Kapote we, udi musue bua meme mfua ne nzala !

Nsongalume ne: Nanku tuanji kuindila katupa, tuebejaku bantu. Patuandamunabo, ushishe kundia. Mukalenga Ngandu e kuitaba, kadi kufilaye dibangu ne: Batudi ne bua kukonka kabapici pa banayi to.

Wa kumpala ku difika mmamu Ngomba’a ngole mununu wa kale. Ngandu kumuamba ne: Mamu, tukosele nsambu ku lukonko elu: Muenji wa bimpe mmuakanyine difutu dilenga anyi peshi mmuakanyine dibi ?

Mamu Ngomba’a ngole e kuanji kunua mayi. Ubanduluka e kuamba ne: Meme ewu pantuadijile lulelu, mvua ndela bana babidi ta basatu musangu umue. Bikumbi bionso bia mfumuanyi dikumi ne bibidi biwudi mumone biabia, mbiwule ne bana banyi ne bikulu banyi.

Pancivua ndela bimpe apu, bavua baya nanyi bua kundisha, banteka anu muaba uvua bia didia bimpe. Pamvua njikija didia, bavua baya nanyi ku mayi, banuisha, bangowesha makuabo. Meme musaame, bavua bangondopesha, bakama mabele, banuisha. Kadi lelu unkadi ciciyi ndela ewu, kakuciena udi untua mushinga. Bakadi bandekele cianana. Se ke difutu dia buimpe adio ! Wamba utuula diyi, umba ukonya mukila, uya.

Ngandu e kuebeja nsongalume ne: Umvu diandamuna adio anyi ? Mpindiewu tuindile muntu muibidi.

Katupa ne ndeepe, mamu mukulakaje e kufika, mutangila ku mayi ne kabulubulu mu mutu. Ngandu kumuela lukonko luende lua momumue alu.

Mukulakaje ne : Anji njojayi bilenga tung’, bukole buanyi ebu, mvua mua kuiya kudisunyina mayi anyi ? Se ndi ne bana ba balume basambombo ne ba bakaji muanda mutekete. Pafuile tatuabo, meme kushala ndituta eku ndituta kuaka, nsumbisha bituta ne mukele musunsuma bua kubapetela cia kudia ne cia kuvuala ne kasabanga ka bilamba.

Kadi lelu ewu, pakolubo, kakuciena udi unciuka. Nkadi ndaala mu kasambusambu, ndokela mvula. Se ke difutu dia buimpe bumvua muenze adio.

Muisatu, tatu mukulumpe e kufika pende. Kumuebejabo pende bia muomumue.

Yeye ne: Meme ewu ke uvuabo bimbile mu musoko bua biuma. Mvua ndia ngondoloka, bakaji ne bana bamona muabo bu mua Katomba. Meme musombeshe muntu cintu, civua nkeba cia kasombela.

Kadi lelu unkadi mikolu ku cina ewu, ciciyi pa buasa, bamvua ngenzela bilenga bonso bakadi bangonduela mu disu, bamue mene biya kuntucila kumbelu. Acio se ke difutu dia malu malenga onso amvua muenze. Pa bualu ebu, ndi ngamba se : Muntu yeye mudishinde mu mayi, ki mbimpe kumusabulamu nansha.

Ngandu kuamba nsongalume ne: Wadiumvuidi’s. Ewu ne: Eyowa, mbimpe ; kadi tuanji tuebeje kabidi muntu muinayi.

Diba adio kufikabo kudi Ilunga Mvidi Mukulu Muntu. Kumukonkabo pende mushindu umue umue awu.

Ke yeye kuandamuna nunku: Bua cinyi nudi basue kubikila butoke ne mmiidima ? Kabidi bua cinyi nudi nundingangana ?

Nenku, bua meme kukala nsambu yenu, muntu yonso anji andondele muvua bualu buenzeke.

Ilunga Muntu Mvidi Mukulu, mumane kumvua muvua bionso bipite, kuebejaye nsongalume ne: Wewe, udi ne bukole bua kuambula Ngandu anyi?

Nsongalume ne : Eyowa. Ilunga ne : Pikalabio nanku, anji muambulaku ciakabidi, ukandeje muaba unuvua bafume nende, bua nshishe kukosa cilumbu. Bafika, Ilunga Muntu kuambila nsongalume ne: Se ntu ngamona batatuebe badia ciwudi muambule eci. Tungunuka ne luendu ! Uya kabalejacio. Nebakuele tuasakidila.