Lufu kaluena mua kuepula webe,

Nansha wewe mupakile mu lua kabua mukoyi luine,

Bualu muntu nkayende ke uyile kadibundila bualu,

Bualu uyile kuiba dikonda wa nsangi,

Dikonda dia Mulopo Mufuki muena bintu,

Divua diteka munkaci mua lupangu lua Mufuki,

Muntu kuya e kuapula dikonda,

Udia e kunyema kuya kabutama kumpenga,

Dia Maweja ukonka muntu,

Ewu kuvila ne : ciena mumanye bualu, Maweja wanyi,

Maweja ukudimuka e kuebeja Muenji e kuebeja Diba,

Ngambilayi nuenu bamunyikamunyika mu lupangu emu bonso,

nNganyi mudie Dikonda wa nsangi ?

Diba ne Muenji e kuandamuna Maweja :

Tuetu katuena bamanye bualu buala,

Maweja umvua nanku e kubashebeya bonso,

Kubajiika e kubeela ne lusanzu lukaye,

Wamba ne :

Ukena mumanye bualu neasanguke bu dikuenda,

Kadi mpunda yeye neaye muyile dikala wa kayila,

Bucia, Diba e kulonzoka muamua zezeze,

Ne nsense kayiyi kutuishila mesu

Abidi mmale asatu mmipi,

Muenji Katengela e kubala mu mabungi,

Ku dia mulolo, mbila ne mikobolo bantu e kumuakidila nayo.

Bubidi buabo kunuabo cipapa e kubinga cilumbu,

Kadi muntu mpunda kuyaye muyile dikala wa kayila,

Ke mubuelele lufu mu bantu,

Tukadi, lelu babidi bafua pa bitaala,

Dia mulolo basatu bajingila mu bikanga,

Wewe lufu kadiese, lufu kalukosa,

Udiile bankambua,lelu mushale ulonda bana !

Ndiba kaayi diwukuta wewe kalukosa’a Nyembue ?

Se nyewu muipata mua kuuja buloba buonso,

Mu ciebe cibondo mudi babi, mudi ne balenga bine,