Tudi ne umue mukanda wa kudi mubadi wetu mamu Monique Bijika wa Kamunga, musombele ku Citolo. Udi wamba ne: Malu adi bakaji basela ba lelu benzela bamamuenabo adi avuayija mbidi.

Mu ditanu, dia 27/ 9/ 2002, bobo basombe mu madilu, nsongakaji kampanda e kuvuambula mamuenende ne bipendu bidi macio kaayi mua kuteleja. Bu muvua mamu ewu musombele kua muanende wa balume, ke pavua nsongakaji awo mupie dikamakama dia kupatula miaku mibi, wamba mamuenende ne : Umbuka kumbelu kuanyi. Wewe kuyi mumbuke, ndi nkulunga ; anyi ndi nshipa dibaka, ngiya kuetu.

Pavua mukalenga mukaji awu uvuwa mamuenende ne bipendu apu, bamue bantu babula meji bavua baseka, batua nkubu, eku meme panyi, Bijika wa Kamunga, muikale ndila, bipuekela munda ; nkacila mudi bana ba lelu babula kanenu; kabayi batua bamamuenabo mushinga. Badi bapua muoyo se: bidibo benzela bamamuenabo lelu ebi, bidi mua kubapingena pabo, nansha ku tototo.