Mbatufundile mukanda kudi muanetu Mukendi Barthélémy, mulongi mu cidimu cisatu cia tulasa tubandile mu Nkesha, munu mu Mbujimayi. Udi wamba ne : Mu bakua Dianga, muaba udiye musombele, mbamutondeshe disomba kudi bena mutumba nabo. Bualu mbuebu : Pankaci pabo ne bena mutumba aba padi mukidi munene.

Bamamu bakulumpe ba dinsambu dia mukidi awu, padibo banyunguluka bua kuya kumpenga, kabena bavuluka kabidi se : badi munkaci mua bantu to. Ke kuikala bakadi bapangisha badi dinsambu dia mukidi disomba. Ngenzelu wa nunku se udi wenza mbidi mashika.

Pa kumona kavuambu aka, ka dibenga kudipesha bujitu kudi bamamu, muanetu Mukendi udi ulomba se : Bantu bakulumpe balekelekoko diosha mangonga mu munya.

Amu yeye mufundi wetu ewu, nyewu utungunuka ne miaku yende, wambila bamamu se : Nuenu bakatulela, lekelayi cilele cibi cia disunguluja bana benu. Bualu bamue ba kunudi nyewu bakadi bapite kuleja dinanga diabo amu kudi bana babo badi ne mfualanga ; badi kabayi nayo mbenze ba kukina, kukina too ne babo bana.