Bana betu babadi, mu cikondo cia bukalenga buibidi, tuvua basube bikole ne lunsuya ne makolela bia basalayi bavuabo bateka bua bulongame mu ditunga. Tukavua katuciyi nansha ne mushindu wa kuenda ne kabuki ku bianza, kabidi misangu mivule tukavua tuendela anu mu njila ya ku mpenga, bua dicina. Bivua bitutonda bikole, kadi katuvua ne cikuabo cia kuenza.

Kadi pabuelele Afdl, tuetu kumona waluja bampulushi pamutu pa basalayi aba. Ke tuetu kusanka mundamunda, batekemene se : Mpindiewu tuapeci batulami ba bushuwa.

Apo, bu muambile bakulu ne : « Kusankidi nkunda milowo, yaya ku nsongu yaya kafuba » ; lelu ewu, bampulushi mbatumueshe Cimuene Mbula.

Bendeshi ba mashinyi mmbafue nayo bu Mudiayi. Cilela cia disangisha mfualanga mu njila ncipingane pa muaba wa dikuba dia mashinyi ne bena ngendu. Kabidi, mu njila yonso idi miye mu misoko mishilangane ya mu Kasayi ketu aka, mudi anu mici miciamakaja bua kuimanyika bantu ne kubakolela.

Ku cimakajilu cionso, bena ngendu badi bafila mfualanga makumi abidi, makumi atanu nansha lukama !

Kadi ambayi tung’. Bua kumbuka mu Mbujimayi kufika ku Ngandanjika nansha ku Kabeya Kamuanga, mu njila mudi bimakajilu bitue ku dikumi dia Kabamba. Diba adio, muena luendu udi mua kutula mfualanga bungi kayi ? Ne kine katudila ka mfualanga yende eyi kadi bishi ?

Eyowa bana betu. Bicidi biipi, tuabikila biipi.