Wetu Albert Kanyinda Mpolesha, muimanyinyi wa malu a bukole bua mubidi mu Ntenji wa Mbujimayi, mmutuele lubila, utusonsola pa muanda wa cipupu cibiacibi, cia munda mua kasulu, cidi cidianda panshi mu cimenga cietu cia Mbujimayi ne mu misoko mikuabo idi pabuipi nacio.

Udi utuleja malu adi alonda aa, wamba ne:

1 ) Dina dia disaama

Dina dia disaama edi didi difuma ku cimanyinu ciadio cinene, cidi cipita kumueneka pambidi pa muntu udi nadio. Mubeedi udi nadio udi uupa anu bu mulonda wa mayi mukangula; munda mupongoloka, kamuyi mukuata.

2 ) Ciledi cia disaama edi

Munda mua kasulu mudi mufuma ku kishi kakese, kadi mesu etu kaayi mua kumona. Badi bakatandula anu ku biamu bidi bidiundisha tuntu tudi tutamba bukese. Kishi aka, koko kamane kubuela mu mala a muntu, kadi keelamu mayi a lulengu lukole; wowu aa ke adi afila disaama edi.

Tuishi tua kolera katuena tumueka ne mesu, anu ku ciamu.

Ku cimfuanyi cia 1 ciamu ncidiundishe tuishi misangu 300; ku 2 misangu 900; ku 3 misangu 8000.

3 ) Ditampakana diadio

Munda mua kasulu ndisaama dia ciambu cipite bungi. Njila ididio dilonda bua kusambuluka nyoyo eyi:

• Dipanga kutabalela mankenda a pambidi, a mu nzubu, mu mbanza ne mu misoko.

• Dinua nansha didia bintu bidi bimane kunyanguka ne tuishi, tufume ku bianza bibi, ku bukoya ta kudi njiji.

• Dilenga dia bilamba bia mubeedi, nansha citalu panyima pa lufu luende.

4 ) Mishindu ya bantu badi babeela munda mua kasulu

Bantu badi ne disaama edi tudi tubatapulula mu nkongo minene isatu:

• Lua kumpala ndua badi ne kishi, kadi kabayi basaama;

• Luibidi ndua badi ne kishi, basaama, apo bikale bendela kuulu, kabidi bikale ne diupa dia nankunanku.

• Luisatu ndua aba badi ne kishi, bikale basaama bikole kabidi bamana kucibuila panshi kudi bubeedi. Bine aba kabena ne mushindu wa kujukila kuulu nansha wa kuenda bua kuya kasesuka to.

Bia kumanya: nkongo yonso isatu eyi idi anu isambuluja disaama, nansha muntu umueka kuisu bu mujima.

5 ) Tuluishayi disaama edi

Bua kuluisha ditampakana dia disaama edi, malu a tuetu kutabalela bonso ngowo aa:

• Kunua mayi anu masabisha bikole, bu mutuya kusabisha kaleji amu.

• Kubenga kashidi dinua mayi a mu bijibajiba a mu misulu, nansha matalale adibo bapana mu tubudimbua.

• Kuowa mayi ku bianza ne nsabanga kumpala kua diela kantu mukana ne panyima pa difuma ku disesuka.

• Kuikala ne nkumba wa mankenda mu lubanza.

• Kulekela ciendelele didia dia bintu biikila kudi njiji.

• Kulekela didia bintu bikena bisukula bimpe ne mayi, nansha bintu bitua mudilu wa ditua.

• Kubenga disumba ne disumbisha bintu bilekela buashi.

6 ) Bimanyinu bia disaama

Diupa dia munda ke cimanyinu cinene cia disaama edi. Muntu udi utuadija kumvua munda musaama, munyenga bikole. Diba adio, padiye uya ku disesuka, udi ushalaku mukungulu mule mutambe, uupa anu kuupa.

Padiye ujuka, kena kabidi ne bukole to, udi utuadija kuenda cilembalemba. Mumana kutekesha nanku kudi bubeedi, kena kabidi ne mushindu wa kudiendela to. Udi utuadija diupila mu bilamba. Pashishe ubanga diluka bikole, kabiyi nkoselu. Munkaci mua dine diupa edi ne diluka, mubeedi udi upatula mayi onso a mu mubidi wende. Diba adio mubidi udi ufuatalala mu dituku anu dimue, muisu mumba kuondoka, mubeedi kaciyi usukula, lulengu lua disaama lutuadija kumubanda ku muyo wa munda.

Apu, padiye kayi mupete luondapu lujalame, muntu udi utuula nkinda munda mua dituku dia kumpala nansha mua dituku dibidi.

Bua kujikija miaku yende, muanetu Albert Kanyinda Mpolesha udi utuela lubila, utulomba bua tujuke bonso, tuluishe cipupu cidi mu mpata, bualu ncia kabutu.