Lusumuinu 17

Lusumuinu lua Ntambue, Nkashama ne Lomba

Ntambue ne Nkashama bavue basomba mu mpata umue. Ntambue unyunguluke, kukuata nyama e kudia. Nkashama pende kuenza bia muomumue. Ke kudimonabo ne: Tuetu ke bilobo bidi mu mpata emu; kamuena nyama mukuabu udi mua kuakula to.

Ke kuambilanganabo ne: mBimpe tumanyishe bukua nyama buonso muanda ewu mu ciondo, bua kayitupotedi nansha. Kusongabo ciondo e kutuadija kuela bamba ne: Kubung! kubung! kubung! Mu mpata ewu tudi babidi, mu mpata ewu tudi babidi: Nkashama Kankenza' a Mulombo, Muana mucibuila mbalambala ne Ntambua wa mu dikama.

Kuelabo nanku matuku asatu malondangane. Eku Lomba pende mu mayi muteleje. Kudikonkaye ne: Kia ! Tuetu bonso aba katuena nyama to, anu Nkashama ne Ntambue? To abi mbabengi. Kuangataye ciende ciondo e kuteka pa mikolo wamba ne: Kubung! kubung! kubung! Mu mpata ewu tudi basatu, mu mpata ewu tudi basatu, Nkashama Kankenza' a mulombo, Muana a mucibuila mbalambala, ne Ntambue wa mu dikama ne Lomba luamina mici luasambela pa mavuala.

Ntambue ne Nkashama bumvua nanku e kupetabo ciji cikole bamba ne: Muana awu wapotu pende kuinshi eku! Nkashama ne: Nganji nkamumone. Ntambue kushala wela ciondo ku mukuna, Lomba wela mu mayi. Nkashama ufika ku mayi, Lomba uteka ciondo kuaka, kubanda pa dibua, dikale pepi ne dijiba. Nkashama utupika ne: Mbakuaci Lomba, ewu kumulembelela ku nshingu. Biselemuka e kudiela mu mayi. Ke Lomba kuina Nkashama mu dijiba, kumuela ndimi mu diulu. Nkashama kupututuka kupanga. Lomba umona ne: watekeci, ke kushisha kumusabula. Ke cikuetu ewu kuya muzengele bikole bitambe.

Ufika kuvua Ntambue, ewu kumupenda ne: Wewe udi cidingidingi ka-Lomba aka pako nkanganyi? Angata ciondo nye kakamona. Ufika, Lomba umumona e kuenzaye anu bia muomumue. Kumutekesha bikole, pashishe kumusabula mu mayi e kumuteka ku mukuna.

Bua kukoma lusumuinu luende, tatu Crispin Kantambua udi wamba ne:

Bana betu, katumonu bakuetu bu bantu cianana, bu tusosa tua kunuina ku mala nansha.

Crispin Kantambua Cibaka
wa kua Kanyiki mu Bakua Bowa

 Munyaku 5: 6-7, Kabitende 2000