Lusumuinu lua 21

"Pa kuendele muenyi, mpa lufu luebe"

Kuenzele Ntambua eku kuambilaye Kabuluku ne:Tudie bulunda. Mu bulunda buetu ebu katuenzedianganyi bibi to.  Meme mufue unjike; wewe mufue nenkujike.

Dinga dituku, mukulu wa Kabuluku kufika ne mukajiende ne bana. Balala bucia, Kabuluku kuya kuambila Ntambua ne: Mukuluanyi mmuvue muanyi emu dilolo. Ntambua ku­muandamuna ne: Mukulumpe ufika, ulala ne nzala, kuyi uvua kumuangacila biseki bua cinyi? Kukuataye nyama wa kapumbu e kumupesha ne: Bunguluja, uye kupesha muku­lumpe, ikale udia nshima.

Mukaji wa Kabuluku e kuambila mukulu wa bayende ne: Wadimuenyi mudi bantu ne bintu bionso bicina Ntambua, muanenu pende ndi muambe, mupange.

Kadi dinga edi, Ntambua kuenza budimu: kulukaye bilushi, kudibondamu e kumba kulala panshi bu mufue. Mukenji kupeta Kabuluku ne: Mulunda webe mmufue. Kabuluku ku­sumba ciata ne cilamba citoke, kuya wenda udila muena mayi wende Ntambua. Ufika, kuimbaye cina, kulongamu ciata, kubuikila Ntambua cilamba bua kumujiika.

Mukulu wa Kabuluku kumuambila ne: Kuena mumanye ne: kabewu ka Ntambua kadi ne bukalenga kuetu anyi? Kabuluku kumuambila ne: Ciena mua kutua Ntambua kela to, bualu mmujilanga wanyi. Mukuluende kumupatula mu lukita. Ubuele, e kukuata boya bua Nta­mbua. Ewu kubulula mesu e kumutangila. Ke kuebejaye Kabuluku ne: Ciwudi musue kue­nza ncinyi? Kabuluku pende ne: Ki mmeme to; mmukuluanyi.

Ntambua ujuka, e kuboza tufuba tua Kabuluku, tua mukuluende, tua bana bonso ne tua bakaji. Bantu bonso kubutuka bua difika dia mukulu wa Kabuluku.

Lusumuinu luela kudi tatu Kadima Pierre
wa ku Muene-Ditu

 Munyaku 5: 8-9,  Kasuabanga 2000