Nkashama ne Njimbu

Lusumuinu 14

Muanetu Kabongo Kabangula Honoré wa ku Miabi,
udi utulondela lusumuinu elu, uleja se:

Lusumuinu lua Nkashama ne Njimbu

Didipu edi Nkashama ne bana bende babidi bavua benda badia bimuma mu cisuku, binangila panshi. Dia kalelu, Nkashama ubandululuka e kumona kadilu ne mvunda bijuke ku nseke yonso ya cisuku. Nkashama ne: “Eyi! Ngabutuku ne bana tatu wanyi”. Ke yeye kuasa dikengakana, watua eku, watua kuaka. Ufika pa munga muaba e kumonaye buina bua Njimbu; Njimbu pende muinjile kumbelu. Nkashama kuela diyi ne: “Njimbu wetu, ngunzuluile, ndi mbutuka ne bana ! Panu kadilu nkajuke kabi ne mvunda”.

Njimbu kunzuluila Nkashama, yeye kubuela ne bana bende. Kusanganaye Njimbu muikale ne bende bana babidi mu buina amu. Cisuku kupia e kubutuka. Ke Nkashama kupatukaye bua kumona, e kusanganaye mu bipia mukadi talalaa. E kuelaye bana bende diyi ne: Patukayi tuye, panu pataladi. Bana kupatuka, Nkashama kubamona bapungile bikole ne nzala. Yeye kuela Njimbu diyi ne:

Mpe bana bebe abo, ndishe banyi meme ba Lunda; meme Nkashama Kankenza'a Mulambo cikuata ba muitu, ba pambelu banyema.

Njimbu umvua nanku... kelekelee ! Binsonji e kumuengelela mu mesu. Kuelaye Nkashama diyi ne: mBimpe mukalenga, ndi mpatula bana, upe bebe babadie. Kadi anji umvuako mena a bana banyi mine: Ewu diende m‘Bipie nebipie kabidi’; munga pende m‘Batuenze netuandamuke’.

Nkashama ne:“Ambulula mena awo tung' ngumvue kabidi”. Njimbu kuambulula amu muvuaye muambe amu. Nkashama kuzonzamaye, mutue mukila panshi, wela meji. Ujuka e kufilejaye bana bende kumpala ... Uyaya wawa. Njimbu kushala ne bende bana, musombe.

 Luela mu Munyuaku 5: 4-5, Kabalashipu 2000