Lusumuinu 18

Lusumuinu lua Nkashama ne Bukua Nyama

Bukua nyama buonso busanga buvua busombele mu ditu kampanda dinene. Muine emu, nyama kayivua ne dikisha to, bualu bilembi bivua biyiluisha, kabidi bikeba mua kuosha ditu dine.

Ke nyama kudisangayo, kubikila Nkashama e kumuambila ne: "Wewe, bu muwudi ne lonji kabidi ne dikima, mbimpe ushale, mukalenga wetu, bua utupandishe ku baluishi betu".

Nkashama e kuanyisha. Bukua nyama kusanka, kuimba misambo ne ngoma, kutua cianga batekemena ne: Mpindiewu netupete dikisha. Panyima pa ebi, Nkashama kuakula, ulaya bantu bende ne: Lelu ewu, patalala panshi, nengele diyi, nuikale ne ntema. Diyi adio ke dianupandisha, diodio ke dianupetesha budikadidi buenu. Nansha bilembi nansha booshi ba ditu kabakunupotela kabidi to.

Kankenza'a mulombo upitaku… ekelekelee! Kupatulaye diyi dikaaye wamba ne: « nNganyi! nnganyi! nnganyi! Meme ndi mulume nkayanyi, wa kuamba buende kabamuambidi. Mulume nnganyi? Wanyi njila muntu kamuendedi ». Bukua nyama ne: Kia! adio ndiyi kayi nanku? Eyi! Dikenga dietu dialunguluku.

Cine cikondo acio, ciyole cia nzala cikole civua cibuele mu ditunga. Dimue edi, Nkashama mumbule tumpota tuende, e kuyaye kutuela mu mayi bua kututalaja ne bua bana bende kupetabo ciakudia. Mu njila amu, pavuaye uya, uvua anu wenda wela lubila luende alu ne: « nNganyi? Meme ke mulume nkayanyi. Ditu ndianyi! Mukuabo nnganyi? »

Kabundi umvua nanku... juu e kuamba bukua nyama ne: Nuenu bonso se nuashadi bapuwe! Diyi adio ndiakane anyi? Meme mbabengi. Ditu edi ndietu bonso. Wamba nanku e kupuekaye ku mayi. Kupatula tumpota tua Nkashama mu mayi e kutuela ku mukuna.

Nkashama wiya, e kualuja tumpota mu mayi. Kabundi kuvua kabidi e kutusabula. Kuenzekabio nanku mafuku malondangane; bana ba Nkashama e kulewuka ne nzala, bamba kufua. Mukaji'a Nkashama e kumuambila ne: Kudimuna muadi webe; cianana tufuafua ne bana. Tangila: Balunda bebe ne bena mutumba kabaciena bapita muaba ewu. mBua cinyi? Mbimpe udilongolole. Nkashama e kuteleja mubelu wa muena kuende, e kuela diyi dipiadipia wamba ne: « Bantu wa mukalenga, mukalenga wa bantu. Bakufinga bantu, kabakufingi nsona. Mbilengele tuamona bonso, kumona nkaya nkudipa buana ... »

Kabundi umvua diyi edi, kuanyishaye e kulekela muanda wende wa disabulasabula tumpota tua Nkashama mu mayi. Kutalalato. Nkashama kupetaye cia kudia ne bena diende. Kuelaye mukajiende tuasakidila bua mubelu wende mulenga.

Ke bukua nyama pabu kupetalapu disanka, e kupeta ne muaba wa kuendela.

Lutufundila kudi mubadi wetu ne musonsodi wa b.b.t.m. Cisuaka Bumanakudia Ezéchiel,
wa mu Cikongo cia Claire wa Bulenga mu Dinsanga, ku Bena Kalenda.

 Munyaku 5: 6-7, Kabitende 2000