Lusumuinu 16

Lusumuinu lua Ngulungu ne Ntande

Ngulungu uvua musombe muabo mua bangulungu, Ntande pende ne bonso ba ku yeye basombe kua ba ntande. Mu disomba diabo adio, bavua mu cisuku cimue, kadi kabavua bendelangana nansha.

Dimue edi, ne dinda Ngulungu e kumvua luseke luvuaye musombe cintu cidila kobo kobo kobo, muoyo wa munda kumuaba baa! Yeye ne: nganji nteye macio, ngumvue bilenga. Akia! Bana betu, kumvuaye diyi diamba ne: Mukuate, mukuate. Pine apo mbiluwa ne mbua yabio mivuadika mipunga. Ngulungu mumanye ne bicidi kule, utupula mesu e kupapukila amu bakadi bamuele cikondokondo. Yeye ne: Ngafu tawu! Ne cikemenu ne ciashidi cia lubilu ne: Mbua kayivu kumpeta. Kudiatanganabo ne mbua, bilembi ne: katushadi. Ngulungu kufula, kukeba cia kuenza e kupanga.

Dia kalelu ne: anyunguluke ku masele e kusangana Ntande. Yeye ne: "Eyi Ntande wa tawu mpandishe". Ntande pende kumuebeja ne: "mbishi?" Yeye ne: "Ntande wetu, mpandishe, ndi mufue". Ntande umona nanku e kumubueja ku mutenda ne: "Buela!" Ngulungu kubuela, kulondelaye Ntande bionso bivua bimuenzekele.

Kuebejaye Ntande ne: "Bulelela nempande anyi?" Ntande kumukolesha ku muoyo ne: "Lekela bowa, bu muwukadi mufike apa, newupande". Ntande wamba nanku, e kusoka bana bende, kujingilabo buntande mu miaba ivua mikono ya Ngulungu midiate.

Kumpala kuayibo e kusambakena ne bilembi. Bilembi bitangila mikono ya Ngulungu mikuate buntande, kupinganabo benda batanda bamba ne: "Nyama utuvua nende watushadi panyima, kanuena bamone ne: eyi mikono nya nyama wa kale anyi?"

Kupita matuku abidi, babilembi kujulangana ne: "Kacia tuashiye nyama mu cisuku muamua, katuena bapinganemu kabidi. Nenku mpindiewu tuyayi tukacioshe". E kupungabo meyi. Bafika, e kujingabo cisuku ntengu inayi, e kucituabo mudilu.

Ngulungu kuambila mukuende ne: "Lelu ewu tudi ne mvita minene". Ntande ne: "Ngulungu wetu, wewe se newuditute mu mudilu, upande". Ngulungu kumuambila pende ne: "Dipanda diwudi wamba adio ndietu bonso; lelu lua mulala ndua ciaji. Kadi cidi cifuana kutamba bukole anu boshi ba cisuku".

Ntande pende wamba kufua ne bowa, Ngulungu kumuambila ne: "Buela mu dicio dianyi emu". Ntande kubuela mu dicio, Ngulungu kuenda, uditua mena. Kujulaye lubilu lua mvunda, kupitaye mu mudilu bu musombela muketa muela. Boshi ba cisuku bapapuka, Ngulungu mumane kuya. Bafika kuayibo, Ngulungu e kuambila Ntande ne: "Shala, tuamanyi kupanda". Ewu kupatuka ne muoyo e kusakidila bikole bitambe.

Luela kudi Mpoyi Jean Médard
wa ku Bakua Sumba;

 Mu Munyaku 5: 6-7, Kabitende 2000