Muivi ne Muloji

Lusumuinu 8

Muanetu Jean Médard Mpoyi, wa mu Cikongo cia Bakua Sumba,
mmutufundile utulondela lusumuinu elu, wamba ne:

Lusumuinu lua Muivi ne Muloji

Kuvua balumiana babidi badie bulunda : Ke Muivi ne Muloji. Bua kushemesha bulunda, kusuabo mua kumanyangana bimpe ku luseke lua nkuacilu wa midimu yabo.

Muloji kuebeja Muivi ne: “ Bua kuiba bantu, pabo kabayi bakukuata, usombele wenza bishi? ” Ewu ne : “ Indila, netuye nebe, bua umone mundi ngenza ”.

Diba diloloka, bobo kumata mu njila batangile ku madimi. Bafika mu bua kumpala e kubusangana ne ciomba kaciyi cianji kutuula. Kupitabo e kufika mu bukuabo, kusanganamu matala kaayi manji kutua cianza. Kupitabo e kusangana bua tumbela, tumana kutuula citupa. Ke Muivi kuambila Muloji ne: “ Iyaku tutuule tumbela ”. Kutuulabo, pashishe kupinganabo pambelu.

Dikuabo edi, Muivi kukonka pende Muloji ne: “ Nyananyi, nuenu nusombele nukuata bantu bishi ? ” Muloji ne : Somba talala, nengiye kukulonda. ”

Dia mulolo Muloji e kuya kuvulula mulunda wende, e kuyabo mu luendu. Kufikabo mu lubanza lua kumpala, e kusangana tatu ne mamu ne bana, basombe mu bupole, bayukila. Bobo kupita ne njila. Bafika ku lukuabo, e kusangana benalu batanda, beelangana milawu. Ke muloji kubakula meyi kubakula ne benawo bine. Kutungukabo ne luendu, e kufika ku lubanza luisatu. Kusanganabo tatu ne mamu bajukile kuulu ne mutoyi. Ke muloji kubabakula kabidi bobo ne meyi abo e kuya kubafila bonso mu cianda.

Pashishe Muloji kuebeja Muivi ne: Wa­monu mutudi tukuata bantu anyi ?

Bana betu, nuadiumvuidi:
“ Wa Mvidie kafuala, ufuafua ngua baloji ne bankina'a bantu ”.

Munyaku 5: 2-3,  Cisua 2000