Mbua ne Lomba

Lusumuinu 7

Lusumuinu lua Mbua ne Lomba

Lukinu ne lubabu kabitu ne dinanga

Lomba uvua ubanda Mbua ne: Wewe udi udia bilenga, tuetu petu tulala ne nzala. Udi amu ubanda upueka, diebe dina kaditu dipua bantu muoyo. Ke Mbua kuamba Lomba ne: Meme mukuambile mushindu undi nkenga, bidi bikuenza muadi; Lomba pende kayi mua kuitaba.

Didipu edi Mbua kuambila Lomba ne: Maloba wa ba maloba unkokole ne lunkelu, tuye mu luendu. Bucia Lomba kufika, Mbua ne: Banda panyima panyi kadi ukuata bikole. Bafika ku nzubu mukuabo kusanganabo benyi badia nshima. Mesu abo amona Mbua, cibingu kudila ne: Mbua nyawu! Bakupa dibua, Mbua e kuinama; dibua kuasa Lomba mu mpala. Lomba kudila ne: Manseba Mbua, mbafu! Mbua ne: Manseba kolesha muoyo, tudie didia dilenga.

Kubuelabo mu cisalu ku bena mbuji ne bena ngomba. Bobo aba bamona Mbua, kuelabo miele ne tuele muulu ne: Tutape! E kupiandabo Lomba mayi muisu; piaa ! Lomba ne: Manseba mbafu. Ewu ne: Kolesha muoyo bua tudie kudia kua nsongo.

Nzala kusuma Mbua, nzala kusuma Lomba. Mbua ne: Pasombelabio bikola, nya kudia nansha tumvi tua bana. Bapicila mu lubanza lukuabo kusangana muana usesuka. Mbua ne: Ndie. Mamuende wa muana ne: Bansuminyi muana! Wambula katupa ka muci; Mbua winama; katupa ka muci e kuakana Lomba ku nshingu. Ke Mbua kuamba Lomba ne: Manseba, lelu tudi bende diakabi; ufike diba dilenga malaba.

Lomba uvua ne ciji cikole, mufuane kutapa Mbua. Kuambaye Mbua ne: Wewe ne meme tuashadi bu 'mudima ne diba'. Wewe mummone meme musemene pabuipi nebe, wanduisha. Ke mushadile Mbua ne Lomba ne mikalu nanku.

Luela kudi tatu Trudon Mulumba
wa mu Yezu Mupandishi.

Munyaku 5: 2-3  Cisanga 2000