Manya'a malu ne Bamfumu

 

Lusumuinu lua 24

 

 

Lusumuinu lua Manya'a malu ne Bamfumu ba misoko

 

Kuvua muntu kampanda dina diende uvua “Manya'a malu”, muikale ngenda'a mushinga wa kalanda'a musenga. Dinga dituku, kuasaye luendu mutangile ku luseke lua kubandabanda diba, bua kusumbulula bintu bia kupana.

Kufikaye mu musoko wa kumpala, kutudilaye kua mfumu wa musoko. Mfumu kumuakidila bimpe. Pavuabo bayukila pa bintu bia kusumba, ngenda wetu e kumona bansongalume bakeba bakaji ba mfumu nkusu mu mutu. Ke yeye kuebeja Mfumu ne: Bua cinyi nsongalume ya muebe munemu idi ikeba bakaji bebe nkusu mu mutu? Ke Mfumu ne: Ke musombelebio bienzeke muanyi munemu.

Bucia, Manya'a malu kutungunuka ne luendu. Kufikaye mu musoko muibidi, kutuula kua Mfumu. Mfumu kumuakidila. Mumane kuikisha, kuasabo diyukila ne Mfumu. Ke kumonaye nsongalume ipitakana, mikale inaya ne nyoka ya ntoka ku bianza. Ke Manya'a malu kuebeja Mfumu ne: Bua cinyi nsongalume eyi idi inaya ne ntoka, payo kayiyi ibasuma? Awu pende ne: Ke mudi muanyi munemu, kakuena bualu nansha.

Bucia kabidi, kufikaye mu musoko muisatu. Kutulaye kua Mfumu; awu kumuakidila amu bimpe. Wikisha katupa, kuebejaye Mfumu ne: Ku dibuela dianyi dia mu musoko webe ewu, ngamonyi nzolo inaya ne mikenga, mbua cinyi? Mfumu ne: ke musombele muanyi munemu.

Mukalenga Manya'a malu kupingana kuende ne bintu bia dipana. Bintu bimane kujika e kuasaye luendu lua kuya ku mushinga wende. Ufika mu musoko wa kumpala, kuepukaye kua Mfumu, e kumumona musombe, mudisambe, cianza ku ditama. Kumuebejaye ne: Ci­wudi mudisambile nanku ncinyi? Mfumu ne: Meme nkadi mushale bujika, bakaji banyi bonso bayiile ne bansongalume. Ke Manya'a malu ne: Mvua mukudimuije, pebe kuyi muteleje. Lelu s' wamonu !

Bucia, kufikaye mu musoko muibidi. Kusanganaye madilu mu musoko anu ku mbelu ne ku mbelu. Wepuka kua Mfumu kuebejaye ne: Miadi mu musoko mujima nya cinyi? Mfumu kumuandamuna ne: Nyoka ya ntoka mmishipe nsongalume yonso. Ke Manya'a malu ne: Civuapu mukudimuije kumpala kua diba?

Mu dinda, kuyaye mu musoko muisatu, e kusangana bantu ba bungi baye kuselangana mu musoko amu. Ke yeye kuebeja Mfumu ne: Bua cinyi kanuena bapeshe baku benu nshima ya buku? Ndi mubumvue batande ne meyi makole, bamba ne: mbafile biuma bia bungi, kadi ki mbadie ? Mfumu kuandamuna ne: Nzolo yonso mmikuata kudi mikenga. Mu musoko emu mmushale mutupu. Ke Manya'a malu kuamba ne: Mfumu, mvua mukuambile cinyi? Lelu wamonu !

Bana betu bakulu bambile ne:

"Kadilu kacidi ku lubaalabaala, wajima;
kuindidi pakuataku ku mukuuta munene".

 

 

 

Luela kudi tatu Kalonji Emmanuel wa ku Cibila

 

Munyaku 5 :  12;   Cisua Munene 2000