Lomba ne Nkashama

Lusumuinu 12

Luela  kudi Godefroid Mayombo
wa mu Cikongo cia Mariya wa Bulenga, ku Cibila

Lusumuinu lua lomba ne Nkashama

Lomba ne Nkashama bavue badie bulunda.

Nkashama kuambila Lomba ne: Wewe mufue nenkujike, nkulamine kabidi bana bebe pamue ne muena kuebe. Kadi meme mufue panyi, wangenzela pebe bia momumue.

Dimue edi, Lomba kuambila mukajiende ne bana bende ne: Tudi batue ndondo ne Nkashama, bambilangane ne: Meme mufue, yeye neanjike, yeye pende mufue, meme nemmujike. Kadi lelu ewu ndi musue kuteta Nkashama, mmone lungenyi luende mudilo; bualu bana betu mbangambile ne: Nkashama uwudi mumone awu, uya kudiangana.

Ndi ngenza nunku: Nendingidije bu mufue; wewe umbuikile bilamba, wase muadi. Pashishe utume muana bua kumanyisha nyananyi Nkashama. Kuenzekabio nanku.

Nkashama umvua mukenji wa lufu lua Lomba, kuambilaye muana uvua mumutuadilewu ne: Dianjila, ndi nkulonda. Cikole ambila mamuebe bua kateki citalu pambelu nansha, anu mu nzubu. Muine amu kamuikadi muntu mukuabo to.

Muana kufikishila mamuende meyi a Nkashama aa. Ke mamu kuela muana lukonko ne: Pawambidi Nkashama mukenji wa lufu lua tatuebe, uvua mumone kuisu kuende aku bishi? Muana ne: Uvua ne disanka dia bungi. Nkashama washadi ewu e kuambila wende muana ne: Ambula keela ketu katue aku, tukasaya Lomba. E kuambilaye kabidi mukajiende ne: Teka mayi peku, bualu ciakudia ciamueneki.

Bafika mua Lomba, kupatulabo mukaji'a Lomba pambelu. Nkashama kubuela, e kupatula keela mu nsapu. Pine apo muanende mushale pambelu, udingidija bu udi wimba cina cia kujiika Lomba.

Nkashama ne ngumushe cilamba civuabo bapuute Lomba bua kubanga disaya, Lomba katuu! E kubika, muikale useka kabidi ubikila mukajiende ne: Iyaku umone cidi Nkashama wenza, kabidi umuebeje: keela kadiye naku ku bianza nka cinyi?

Nkashama umona nanku e kufikaye munda bikole, wamba ne: Banga Lomba ne mukajiende mbandinge. Kumataye mu njila ne muanende  e kuya wenda upenda Lomba ne muena kuende.

 Luela mu Munyaku 5: 4-5, Kabalashipu 2000