Kabundi ne Bukua Nyama

Lusumuinu 15

Lusumuinu lua Kabundi ne Bukua Nyama

Kuenzele Bukua Nyama eku, kubuelabu mu ciyole cikole cia nzala. Nyama kutuilangana yonso e kupunga diyi ne: Tudisangayi mu nzubu umue, tuikale tukeba biakudia, tudiile pamue. Bualu tuetu batangalake, bakuabo nebafue nzala.

Bonso  kuitababo lungenyi alu. Kusangabo nkunda e kuyiteka mu nzubu muvuabo batuilangane amu; kuangatabo ndambu e kuteka peku. Kushiyabo Ngulungu ne Lungonyonyi ne: Shalayi nuipike, pikala muivi muvue bua kuiba, Ngulungu wamukuata, Lungonyonyi pende wabanda kuulu bua kutubikila ne lushiba.

Bonso e kuya mu mpata bua kukeba biakudia. Bafikamu, Kabundi e kudinga ne:“Manseba Nkashama, munda mudi munsaame”. Nkashama ne: Ndako pambelu Kabundi kuya. Kafika ku ditengu dia musoko, kulukako mukundululu e kubuikilaku cibalubalu citubula makela makela. Pashishe kuasako cintanyi acio ku mutu e kuya katangila pambelu, kenda kimba musambo ne:

Kabundi Mukenge,
Tokola Ciamanyangala
Nkashama, Ntambue
Tokola Ciamanyangala.

Ngulungu ne Lungonyonyi bamone e kudielabo lubilu. Kabundi kabuela, e kusangana nkunda ikadi mibobe. Kuangatako ciasu cia manyi e kulengeka mu nkunda. Kuyidiako, kuangatako ivua mishale, kuela mu nsapu e kuya.

Diba diloloka, bavua baye mu dikeba e kupingana bazengele ne nzala. Kunyemenabo ku nyingu wa nkunda ne: Tudie. Kelekelee ! E kusanganabo mu nyingu kamuyi nansha nkononuena. Kuebejabo Ngulungu ne Lungonyonyi ne: Nkunda nudi beele penyi? Ngulungu ne: Nudi benze anu nuela nyima, cintu kupatuka apa, cienda cimba misambu, kaciyi kutangila. Ke tuetu kunyema.

Bukua nyama kupenda Ngulungu ne Lungonyonyi, kubutuila panshi.

Pashishe kulambabo nkunda ya cianana, kudiabo e kulala. Bucia, mu dinda, bobo ne: Nyewu tukadi tuya mu cisuku, wa muoyo mukole utuashiile nkunda nnganyi? Bonso ne: Ntambue ashale. Kushiyabo Ntambue ne Lungonyonyi.

Bafika mu mpata, Kabundi kubangulula anu muako amu ne: “Manseba Nkashama, munda muanyi amu mmuanjuku”. Kualukilako kabidi pambelu. Kalumiana kafikapu, e kuenzako anu muako mua cibidilu. Bavuabo bashiile bulami bua nzubu bamona e kudiela bonso mu cisuku.

Dilolo, bavua baye mu cisuku bapingana e kusangana mu nzubu mutupu. Katanci e kumonabo Ntambue ne Lungonyonyi bapatukila mu cisuku. Ke kubebejabo ne:“Nuvua penyi?” Bobo kulonda civua cienzeke. E kubatuabo cibingu cikole. Kulambabo minga nkunda, e kudia.

Bucia kabidi kuebejanganabo ne: Utuashiya lelu nnganyi? Nkashama ne: Nshale meme. Bonso ne: Too; Ntambue udi mukupite wanyema, anu wewe ke wimana anyi? Nkudi ujuka ne: Meme ndi kacinyi bibuluke, nunshile kumbelu. E kumushilabo yeye ne Lungonyonyi.

Ke kuambikabo nkunda peku. Kabundi e kuvua kupatuka kabidi kimba ne:

Kabundiee, Mukenge,
Tokola Ciamanyangala;
Nkashaba Ntambue,
Tokola Ciamanyangala.

Cikudi a Mumbamba umvua nanku, e kusokokaye ciasu cia manyi kuulu;  Lungonyonyi palu kubuela mu bisosa e kusokoma.

Kalumiana kafika kusangana nkunda peku; koko kuya ne: Nkangate ciasu cia manyi. Kadi kusanganako Cikudi muaba awu citubula mukana mukunze kunzuu. Koko ne:“mManyi, ngangate”. Kubuejako cianza mukana mua Cikudi, ciocio kukuata, e kukuacilamu. Lungonyonyi kutua lushiba ku mishiku e kubikila bana babo bavua mu mpata. Bobo kufika. Bumusha bivua mudingi muvuale pambidi: Ke Kabundi ewu wengeja mesu !  Ke bobo ne: “Kabundi mmupite kutudinga, afue”.

Kalumiana ne: Nuenu basue ne: mfue, nunshibeele pa mutunda. Bafika kuaka,  batuadija kututa kalumiana, kubafukako e kuditua mu mutunda! Bukua nyama kushiya Lungonyonyi lutentekele, bonso e kuya bua kuangata nkasu ya kumbula nayo mutunda.

Lungonyonyi  washadi ewu, e kusomba mulengame. Kabundi umona nanku e kumutapa bulaba mu mesu, e kuditua lubilu. Lungonyonyi ne: Nkuate, e kukuata anu ku mukila. Kena budimu e kumudinga ne: Wamonu's. Se nyewu walekedi mukila, wakuaci mututungulu! Lungonyonyi umvua nanku e kulekelaye mukila, e kukuata mututungulu, mesu muule tente ne buloba.

Bukua Nyama bualukila e kuebeja Lungonyonyi ne: “Kabundi ucidi mu mutunda emu anyi?” Luolo ne: Se nyewu ndi nende, mumukuate ku mukila. Batangila mu bianza bia Lungonyonyi e kusangana anu mututungulu. Ke bobo ne:

“Lungonyonyi wayishi Kabundi, ciende ndufu”.

Luela kudi Mpoyi Jean Médard, Bakua Sumba
mu Munyaku 5: 4-5 wa Kabalashipu 2000