Nkuadi wa mu ciomba

 

Lusumuinu 3

 

Lusumuinu lua Nkuadi wa mu ciomba

 

 

Tatu Kadima Pierre wa ku Muene-Ditu,
mmutuelele lusumuinu ludi lulonda elu
wamba ne:

 

Tusombele tumvumvua bantu bambangana ne:

"Udi musue nkuambila mufuile  nkuadi disu anyi?"

Muanda udi nunku:

 

 

 

Nkuadi uvua munange mukajiende ne muoyo wende mujima. Dikuabu dituku, mukaji kuya muitu bua kutua mankenene. Nkuadi e kumulonda bua kumona pende musombelebo batua mankenene. Mukaji kumbulaye miji ya masele, kuyisuikila ku muci e kutuadija ditua mankenene.

Ke tatu Nkuadi kusemenaye pabuipi bua kuponguela mu cilundu, kadi muci e kumutua mu disu. Kutuadijadio kupueka mayi. Nkuadi kuasa muadi. Ke muena kuende kumupuwisha ne: lekela muadi, paloloka diba netuye pambelu.

Bafika ku cibuelelu cia musoko, panshi pamane kufiika, Nkuadi kubandaye ku muci wa bende wa bimuma, kutuadijaye dipola. Muena bimuma kumuela diyi, nkuadi kayi umvua. Awo kututa Nkuadi cintu mu disu. Ewu ne: eyi tawanyi ! Disu dianyi diafu. Mfumu wa musoko kukuata muntu e kumuambila ne: bu muwudi mushipe Nkuadi disu, udi umuselela mukaji muibidi, ufila kabidi ne mbuji wa mujila mashi; bualu yeye muya mu ditunga bua kuselangana, nebamubenge ne: mmulema.

Kadi kuayi Nkuadi eku, e kulengulula mukajiende wa kumpala awo, kuteka muoyo amu kudi muibidi. Ke wa kumpala ne: Nkuadi, bu muwandekedi, ndi ngela malu onso patoke. Wamba nanku, kuelaye matala mu cinu, utua wela kasala, ulonda malu onso avua menzeke. Muanda e kumanyika musoko mujima, cibingu e kudila wooo !

 

 

 

Lusumuinu lua Nkuadi wa mu ciomba
luvua luela mu Munyaku 4:9-10, Cisua munene 1999