Ndaya

Lusumuinu 2       

Lusumuinu lua Ndaya

Bantu ba bungi badi bamba ne: "Lelu wa Ndaya udi ubumona".

Kadi Ndaya ewu uvua muenze cinyi?

Telejayi mudi bualu:

Kuvua mamu mukuabu uvua ne cibidilu cia kupana nkunyi. Nanku mamu ewu uvua ne difu dia ngondo inayi. Dinga dituku mamu ufuma ne nkunyi kuitu, kututakenaye ne citalu cia muana wa mu ditunga mufue. Nanku mamu kuepuka bua kunemeka citalu. Bavua nacio bafika pavuaye, kuimana mutanci, e kushisha kuya. Mamu pende kuya.

Diba dia kulela dikumbana, mamu kulela muana wa balume. Muana ukumbana mua kuenda, e kuendaye, cibi kayi wakula to. Mamu ne: ndi mulele kamama.

Dinga dituku mamu ujuka bua kuya mu nkunyi, muana kusua mua kumulonda. Mamu kumupingaja ne cianza; muana kubenga. Ke kuyabo nende. Bafika muitu, muana kubikila mamuende ne: Mamu wanyi ! Ewu pende kupapuka ne: Tawanyi, baya mamu ! Muana kumuambila ne: Ciena kamama to; ndi ngakula.

Kutuadijaye kulondela mamuende malu a pacivuaye munda, umuambila ne: Udi mumanye diba dituatutakenyi ne citalu cia muana wa kampanda. Tuvua bayikile ne citalu acio pamvua munda muebe. Uvua ungambila ne: <Tuye kuetu. Pambelu pawuyaya badi bashiminyinangana malu>. Nanku ke pandi mupuwe bua kujadika. Kuambidi muntu. Mamuende kuitaba.

Dituku dikuabu muana baye mu dinaya ne bakuende; munga muana kucibula mukuabo diboko. Bana bonso ne: tusuikilayi kamama bualu ebu, bu mudiye kayi wakula. Baledi ba kamama e kuelesha muana cito.

Abidi mmale asatu mmipi, bana e kuya ku mayi ba bungi. Munga pende kusakila muana mukuabu mu mayi; awu kufua. Diende uvua Ndaya.

Nudi bamanye padi citalu panshi, musombele bantu bakuta. Bonso kuasa kamama cilumbu ne: Amu wewe muana umue ewu, wenza malu amu makole. Kadi telejayi ! Ke muana kuela bantu muoyi, kubambila ne: Ngajadiki civua muana wa Kazadi, unuyile kujika, mundeje pamvua munda mua mamu, ungambila ne: Panu badi bashiminyinangana malu. Wewe Ntumba se ke uvua mukuate dikalu dia citalu, pamvua munda mua mamu. Lelu nuabumonu: kamama kadi kakula. Wewe Cipamba Moïse se wacibulu muana'a bende diboko. Tubuteka penyi ? Nuenu kusuikila kamama. Kadi lelu wa Ndaya, udi Ndaya panshi ewu, kamama kadi kela lubila. Wewe Kadima Gaston se washipi Ndaya mu mayi, nuenu kusuikila amu kamama... Utula diyi, cibingu kudila kudi bantu bonso : Woo !.

Ke panudi numvua bamba ne: "Lelu wa Ndaya udi ubumona."

Lusumuinu lua Ndaya elu luvua luela mu Munyaku 4: 7-8,  Kabitende 1999