Muemi wa mapanda

Lusumuinu 5

Muanetu Honoré Kabongo Kabangula wa ku Miabi
udi utuelela lusumuinu lua muemi wa mapanda,
lusomona mu cibejibeji cia pa Beleji civua dina ne: nKuruse. Ludi nunku:

Lusumuinu lua muemi wa mapanda

Mu musoko kampanda muvua muemi wa maluvu a mapanda. Kadi njila uvuaye uyila ku mudimu ewu uvua ne cisuku, lumuma luvua lumubolesha. Didipu edi, munya mukenuke, muemi wa mapanda e kutua cisuku acio mudilu. Pinapo mu cisuku amu muvua nyoka wa Mbamvu. Mbamvu umvua ciona cia kadilu, kuvukutaye lubilu. e kuya kubuela mu buina bua Mutumba. Mutumba ne: nnganyi awu? Muabilayi ne: « mmeme Muluma'a Mbamvu wa lumina mitumba ». Mutumba e kuya lubilu muitu. Kupicilaye muaba uvua nyama wa Mbala mulale. Ewu kuela diyi ne: awu nnganyi? Mutumba ne: « mmeme Mutumba kendi munya, biendaye munya, wamanya ne: kuende nkutuka muanda ». Mbala ne: Eyi ! nKuepi kuavua mutumba kunshila muanda. E kuditua lubilu. Kufikaye ne pavua Kapumbu mulale. Kapumbu ne: awu nnganyi? Mbala ne: « mmeme Mbalambala Bitefu, Luakakuata tupumbu dikumi, pangamona Kapumbu ngatapa ». Kapumbu kuvukuta lubilu, e kuya kupicila mu lubanza lua Lubuta. Muana wa Lubuta uvua mulale pa munya. Kapumbu kumudiata, e kufuaye.

Lubuta e kuya kufunda Kapumbu ku tubadi. Kuine aku kuvua banzuji bafiike. Pavuabo balumbuluisha cilumbu, bakosa, bavua baya kuleja nzuji mukulu wa tubadi. Yeye ewu uvua mutoke. Banzuji kubikidisha Kapumbu. Ewu ufika, banzuji ne: Muana wa Lubuta mmufue bishi'? Kapumbu ne: mvua munyeme Mbalambala Bitefu, ke meme kuya kudiata muana wa Lubuta. Banzuji bonso ne: cilumbu ncikuate Kapumbu, yeye ngua diowa.

Kadi bilondeshila cibidilu ciabo, padibo bakosa cilumbu, banzuji aba kabena banji kutombuela benacio diyi nansha, anu palejabo nzuji mukulu wa tubadi wa dikoba ditoke. Kumulejabo muvuabo basue kukosa cilumbu eci. Ke yeye ne: nuvua balondolole cilumbu bimpe anyi? Bobo ne: eci ki ncilumbu cia kuelela meji to. Kapumbu muitabije bualu buende. Afue.

Ke mutoke ne: ndi musue kulondolola cilumbu eci. mBikidilayi mukelenge Mbalambala Bitefu. Awu ufika, mutoke kumuebeja ne: uvua mupicileku muaba uvua Kapumbu mulale anyi? Mbala kuitabija wamba ne: eyowa, mvua munyeme Mutumba bua kavu kunshila muanda. Ke muvua Kapumbu munnyeme pende, e kuya kushipa muana wa Lubuta.

Nzuji ne: bikilayi Mutumba. Ewu ufika, Nzuji kumuebeja bualu. Yeye kuamba ne: mvua mupicile mua Mbala, bualu mvua nyema Muluma'a mbamvu. Ke padi Mbala muye pende e kujula Kapumbu, Kapumbu pende e kuya kudiata muana wa Lubuta, e kushibeya.

Mutoka ne: bikilayi Muluma'a mbavu. Awu kufika, e kuamba ne: Meme mvua munyeme kapia, e kuya kubuela mu buina bua Mutumba. Ke kukebabo muoshi wa cisuku. E kusanganabo ne: civua ciosha kudi muemi wa mapanda. Kumubikilabo pende bamuebeja ne: uvua muoshe cisuku acio bua cinyi? Yeye ne: bualu civua cimbolesha lumuma pamvua nya ku diema dia maluvu.

Ke nzuji mukulu ne: "Bowe muemi wa mapanda, yeye ngudi mushibeshe muana wa Lubuta.

Bakoshi ba nsambo wetu, bua cinyi kanuena nutukijila bua kumona mua kusunguluja mu dilumbuluisha dienu udi mubinge ne udi mupiile?

 Lusumuinu elu luvua luela mu Munyaku 4: 9-10 wa mu Cisua munene 1999