Cilembi wa Majimba

Lusumuinu 4

Lusumuinu lua Cilembi wa majimba

Kuenzele muntu eku, uvua Cilembi wa majimba. Dimue edi kusanga­naye nyama wa Ntambua mupone mu di­jimba diende . Yeye kupita. Ufika ku di­jimba dikuabo e kusangana Nyoka ne mu dijimba disatu e kusanganaye muntu. Ke yeye kuela Mvidi Mukulu tuasakidila bua pa­vuaye mumupeteshe bia kudia nabio nshima.

Kutuadijaye kuluka meji bua kukuata bi­vua bipone mu majimba. Ufika ku dijimba dia kumpala, Ntambua e kumulomba ne: "Cilembi wetu, ndekelakoko. Bantu mbe­na kuenzelangana bibi. Ngadiakukupa­ndisha panyi dituku dikuabo. Ufika ku di­jimba dibidi Nyoka kumulomba pende ne: Cile­mbi ndekelakoko. Bantu mbena kue­nze­langana bibi. Ngadiakukupandisha pa­nyi dituku dikuabu. Ufika ku dijimba di­satu divua muntu, awu kumuamba ne: Cile­mbi, kuena mua kundekela meme muntu nebe mu dijimba to. Nyama ya lo­nji ayo kayena ne cidiyo mua kukuenzela nansha.

Ke Cilembi wa majimba kutua bukulu e kupakula bukulu, kupatulaye bonso ba­vua bapona mu mateyi ende. Nyoka ne Ntambua kupinganabo mu cisuku, benda basanka. Muntu pende kushalaye pabuipi ne Cilembi bua kumuambuluisha ku mi­dimu yende. Ke kuasabo mutanda wabo muitu amu.

Dikuabo dituku , mfumu kampanda uvua mulongolole cibilu cinene cia mufikilu wa diledibua diende. Muanende wa bakaji wa mayi muisu kujaye maja, e kusankisha bantu bikole. Nsongakaji ewu kujingaye bua kuya kunyunguluka kumfundu kua nzubu. Kuine aku kusambakenaye ne Ntambua uvua Cilembi mupandishe mu dijimba awu. Ntambua kukuata nsonga­kaji e kuya nende too ne muitu muvua Ci­lembi, e kumuambila ne: "Cilembi, mukaji  nyawu". Awu pende kumuela tuasakidila. Katanci kanenga, Nyoka kufika pende ne mudilu wamba ne: "Cilembi, mudilu ngue­wu, wikale udiambuluisha nawu". Cilembi e kumuela pende tuasakidila. Ntambua ne Nyoka kupinganabo mu cisuku. Bionso ebi bivua bienzekele amu mu mesu a muntu uvua Cilembi mupandishe mu di­jimba.

Panyima pa matuku makese, muntu kuambilaye Cilembi ne: "Nyewu wapeci mukaji. Kamuena mushindu wa tuetu ku­somba kabidi nebe mu mutanda umue to. Ngayi, nkakeba panyi mushindu wa kuse­la wanyi mukaji". E kulayanganabo. Kuayi muntu pambelu eku, e kusanganaye ba­sambana bua muana wa mfumu uvua mujimine. Ke yeye ne: "Imanayi nnua­mbile. Ndi mumanye muaba udi nsonga­kaji unudi nukeba awu. Udi muitu mua Cilembi wa majimba. Nuenu basue ndi nnufikisha muaba awu pa lukasa".

Bantu bumvua miaku ayo e kumufikisha­bo kua mfumu. Awu pende kuelesha  ciondo, e kubikidisha bena musoko. Ku­peshabo kamuena ewu cisumbu cia bantu bambula miele ne mafuma. Bavua baka­nyina muntu awu ne: tuetu katuyi bapete muana ndufu luebe.

Yeye ne "Abu mbualu bukese". Bitala ka­biyi bianji kusama, bakavua bajinge mu­tanda wa Cilembi kudi bantu ba mfumu. Cilembi ne mpatuke bua kuya ku midimu yende ya cibidilu, e kumufiekelabo yeye ne muena kuende. Kuyabo nabo mua mfu­mu. Masanka manene e kuenzekawo bua dimueneka dia muana wa bakaji. E kuo­shilabo kamuena awu nzolo, bua pavuaye mufikishe bualu ebu kudi mfumu.

Ke mfumu kuebeja bantu ne: "Tuenze ci­nyi ne Cilembi? " Bobo ne: "Afue... afue". Pinapo Ntambua ne Nyoka bavua bimane kumfundu kua nzubu, bateleja bionso bi­vua bipitakana. Ke Ntambua kulonzoka mu cialu wamba mfumu ne: "Wewe mu­shipe Cilembi, umanye ne: luebe pebe lua­mueki" . Ke mfumu kukuacika buowa; ku­lekelaye Cilembi, e kumupesha ciende ci­tupa cia buloba , yeye ne mukajiende.

Patudi tuambangana apa, ke Cilembi kule­laye bana eku, ne muine mukajiende awu!

Luela kudi Charles Emmanuel Mbala mu Cikisha
mu Munyaku 4: 9-10, Cisue munene 1999.