|
||
 |
Lusumuinu: 1
Tudi bapete lusumuinu lutufundila kudi muanetu Muadi Scholastique,
Kuenzele babilembi babidi eku, kuasabo luendu batangila mu ditunga kampanda. Bafika, kusanganabo mfumu wa musoko e kumuambila ne: “Tudi benyi bebe, bavue bua kubemba nyama”. Mukalenga kubebeja mena abo. Umue ne: meme ndi Cilembi wa lutulu, mukuabo ne: ndi Cilembi wa kabakaba. Mfumu mumane kumvua ebi, kubalejaye nzubu wa kulala ne diitu dia bobo kubemba nyama. Bucia bilembi ebi bibidi e kuya muitu. Anu ne cifikidi, Cilembi wa lutulu e kuasa nyama. Wa kakakaba umba ubabidila ne: " Kuasa kuanyi aku !" E kuangataye nyama. Bu muvua Cilembi wa lutulu kayi utamba kuakula, wa kabakaba uvua umulabakena misangu yonso. Dinga dituku edi, kupinganabo kabidi muitu. Wa lutulu kuasa nyama mukuabo; wa kabakaba umvue muadi wa buta e kuela diyi ne: “Kuasa kuanyi aku, kua meme Cilembi wa kabakaba” Umba ubikila bantu ne: “iyayi nuambule nyama.” Wa lutulu umona nanku, kuelaye meji pa mianda mibi ivua muinende ewu umuenzelenzele. Pa nanku kuanji kupumbishabo muitu matuku anayi malondangane. Pa ditanu kupinganabo muitu musangu muisatu. Katanci ki nkalepe, buta e kutema. Kadi ki mbukuate nyama musangu ewu nansha, apo mbukuate mukaji wa Cilembi wa kabakaba, e kumushibeya cikadi. Padi bantu bavue mua kuambula nyama, kusanganabo mukaji wa Cilembi wa kabakaba mufue panshi. Bobo ne: udi mumushibeye udi anu bayende, bualu yeye ke usombela wasasa nyama. Cilembi wa kabakaba tokutoku, mangalangala ne: “Ki mmeme udi mushibeye mukajianyi nansha”. Konkayi anu Cilembi wa lutulu, bualu yeye ke udi ne ndudi ya kuasa nyama, meme cisombela ngasa to. Mfumu wa musoko mumane kuteleja cilumbu, kuambilaye Cilembi wa lutulu ne: “Kuena wewe ne bualu to; ndaku kuenu. Tudi tushala ne Cilembi wa kabakaba.” Luela kudi mamu Muadi Scholastique mu Munyaku 4:2, Luabanya 1999
|
