Nkonko

(1999)

mua kualukila ku mbangilu wa Munyaku

Nsombelu wa pa bantu

M.4_1 : lukonko 1.

Nsombelu ne bakuabo (1°)

Mulongeshi muikale bukuende wa mulongi wende

Muanetu Bukasa Vincent, wa ku Cilomba, udi wela babadi ba Munyaku lukonko, wamba ne: Mulongeshi udi ne bukuende buende mu kalasa. Yeye ewu udi umuela muoyo bu balongi nende bonso. Kadi padibo bafika pambelu, muana ewu udi wela mulongeshi muoyo ne: "bukuende buetuabu !"

Mulongeshi umvua nanku e kufika munda, kukuata muana e kumututa bikole, wamba ne: Kuena mua kumbikila ne "Bukuende" to.

Ke padi muanetu Vincent webeja se: Baledi ba muana ewu badi mua kuenza cinyi pa bualu ebu ? Kabidi ne: Muana ewu mbimpe ikale ubikila bukuende buende ewu bishi ?

Pa milambu ya kabukulu

M.4_1 : lukonko 2.

Mua kupita ne muanda wa lupetu lelu (1°)

Muanda wa dididila dia milambu (1°)

Tudi bapete mukanda mutufundila kudi tatu Nsenda Paul, wa mu Cikongo cia Anuarite wa Bulenga, mu Cikama. Udi ukeba ngenyi kudi babadi ba Munyaku pa bualu budi bulonda ebu.

Muntu kampanda muikale ne bana bende ku Katanga, kuseleshaye ba milambu e kudidila mpetu. Diselesha edi divua dienzeke mu cidimu cia 1960.

Kumupeshabo mpetu bilondeshila muvuabo bafila cine cikondo acio. Kadi lelu padi cilumbu cia mulambu cimujukila, udi mua kufila mpetu bilondeshila bungi buvuabo bamupeshe mu 1960 anyi? Peshi udi ufila bilondeshila mudibo baselangana cikondo citudi eci.

Pa nsumuinu ya bankambua

M.4_1 : lukonko 3.

Ngumvuilu wa tusumuinu (1°)

Tudi bapete nsumuinu ya bankambua betu mitufundila kudi muanetu Jean Médard Mpoyi, wa mu Cikongo cia Justin wa bulenga kua Ciaba, musombele mu Bakua Cisumba.

1. Kuikadi kabotoboto sesa panshi, kabuyobola wiye nabu

2. Lupetu kaselela babi, balengele bashale benda bujika

3. Ciendela kasengulu, nyingu ya bende ubulula

4. Bukulu ntubesa, nansha mitu mitekele pamue

5. Kambela mayi, komba bululu; mulunnda muimpe wamulamata, mulunda mubi wamulekela

Pa nsombelu wa pa bantu

M.4_2 : lukonko 2.

Nsombelu ne bakuabo (2°)

Cia pa luse

Pa nsombelu wa pa bantu

M.4_3 : lukonko

Nsombelu mu diku: (1°)

Tatu museleshi muikale mubengi wa balanda

Muanetu Antoine Ntumba wa mu Kalonji Sud, udi webeja babadi ba Munyaku se:

Lungenyi luende elu nduimpe anyi ?

Pa nsombelu wa pa bantu

M.4_4 : lukonko

Nsombelu mu diku (2°)

Njila uyile ... / Muloji wadilowa

Tudi bapete mukanda wa muanetu Tentula Florent, wa munu mu Mbujimayi. mMutufundile, utuleja buenzavi budi nabo bansongalume bakuabo. Bualu budi nunku. Tatu kampanda uvua museleshe muanende. Nsongakaji ewu, mumane kufika kuende, kulelaye muanende wa kumpala amu bimpe, kulelaye muibidi ne muisatu mushindu wa momumue. Kadi muisatu ewu mucikale ne ngondo mikese, nsongakaji ewu ukavua kabidi ne difu dia ngondo 2 ne citupa. Kumanyishaye bayende bualu ebu. Ewu kujuka e kuya kakeba buanga, kupesha muena kuende bua atuule difu. Kuenzekabio. Kunyima kua imue ngondo kabidi, mamu kupeta difu dikuabo, bayende kumutudishadio muomumue

Panyima pa ebi muabilaye ewu e kuya katuala disama dia mu buendenda, e kuvua kushila muena kuende. Lulelu palu e kukoseka. Kadi umvuayi bualu. Nsongalume ewu ne bena kuabo badi basa baledi ba mukaji cilumbu cia lulelu ne : " Nudi bakondakaja biuma bia muanenu, ke padiye kaciyi ulela ". Ne ku ndekelu baledi ba mulume e kuipata nsongakaji ne : " Udi upicishila muanetu diba "

Pa nanku muanetu Tentula udi ukonka babadi ba Munyaku bonso ne : Bualu bua mushindu ewu mbua kupita nabu bishi ?

Pa bibidilu bia kabukulu

M.4_5 : lukonko 1.

Mua kupita nabio lelu (1°)

Pa mioko ya bana

Muanetu Augustin Mbaya, wa mu Nkolongo, ku Ngandanjika, udi webeja se : " Mu kabukulu ketu, tuvua tumona muoko wa muana bawujiika amu kudi kakuende muntu mukaji, muledi wa mamuende. Kadi mu buena Kristo lelu, tudi mua kupita ne muanda ewu bishi ? Tulame mioko, tudijikileyo anyi peshi tuyimanshe " ?

Pa nsombelu wa pa bantu

M.4_5 : lukonko 2.

Pa diselangana (1°)

(Mukalenga Muadi)

Tatu Kazadi Constantin, musombela ku Ngandajika, udi wela pende lukonko wamba ne : " Muntu bobo bamuselele kudi tatuende, panyima pa matuku yeye kuditanta e kudiselela mukaji mukuabo. Pashishe kuditantaye kabidi e kupingajila tatuende lupetu luvuaye mumuselele nalu mukaji wa kumpala. Diba adio, ku bakaji babidi aba, mukalenga muadi nnganyi " ?

Pa nsombelu wa pa bantu

M.4_5 : lukonko 3.

M.4_5 : 3.1.

Nsombelu ne bakuabo (3°)

Pa mikalu

Muanetu Alphonse Nkombo, mubadi wa Munyaku, musombele mu Cikongo cia Anuarite munu mu Mbujimayi, udi webeja se : " Malaba etu aa, kaavuaku ne mikalu ku kale kuonso kuaka anyi ? mMunyi mutudi tumona lelu bantu baafuila misangu ne misangu " ?

M.4_5 : 3.2.

Pa nsombelu mu diku (3°)

Pashishe udi ukonka ne : " Bua cinganyi bamue bamamu ki mbanange bana ba bakenabo, nangananga ba aba bakadi bafue anyi bumuka mu lubanza " ?

Muanetu Bukasa Vincent, wa ku Tshilomba, udi webeja babadi ba Munyaku bua bamumvuije cidi lusumuinu elu luamba:

" Buloji' a ngandu kabuena ciji, bakulowa pebe wasuika mikaba " ?

Nsumuinu idi yamba mianda

Tudi bapete imue nsumuinu mitufundila kudi tatu Tharcisse Tshiamanga, wa ku Bena Cimpuma. Nyoyo eyi.

1. Mamu cinkala, ukukosa ukuleja lungenyi

2. Kashipa ka mantonto mantonya. Kantu nkalengele muebe mu nzubu, kunangidi ne : kadi mua muanetu netudie. Kuena mumanye muanenu muambeye ne mukajiende mu nzubu.

3. Lunkonyonyi nsamba : mmusombele amu buambi.

4. Kafu’a nkoka ne muanabo nkoka : patuvua basombe apa katutandipu, kadi ciavu kutua nkoka museba ncinyi ?

Pa kunusambuluijila nsumuinu eyi Munyaku udi unulomba bua yonso udi muyumvue, atutokeshile cidiyo yamba. Atupeshe kabidi imue idi yamba bualu bua muomumue, anu bua tushindike Ciluba cietu.

Pa malu a kale

Muanetu Dominique Mutombo Muana, wa mu Cikongo cia Marcel wa Bulenga mu Bipemba, udi ulomba babadi ba Munyaku, bua bamuleje biombelu bionso bivua nabio bankambua betu.

Pa Ciluba cietu

M.4_7-8 : lukonko 1.

Ngakuilu wa Ciluba (2°)

Telejayi biambilu bibidi ebi: bidi biamba bualu bumue anyi bidi biamba malu abidi mashilangane? Umvuijayikoko.

- Pa kufuma ku Cinsansa, untuadile bilamba bianyi bivua bishaleku.

- Pa kufuma ku Cinsansa, untumine bilamba bianyi bivua bishaleku

Munyaku

Pa luipiku lua mamu kua muanende wa bakaji

Muanetu Kanyiki Donatien, wa mu Inabanza, ku Ngandanjika, udi wela babadi nende ba Munyaku lukonko wamba ne: "Kuetu kunu, mu Kasayi emu, padi muana wa bakaji uya kuende ne ulela, mamuende udi upaya makula, mbuji, nzolo ne bikuabo, bua kuya kumana mushinga wa luipiku. Yeye mumane kuipika, muku wende udi umusankisha pende: umudila mpesa wa cilamba, umupa ne mfualanga bua kumulaya. Udi usankisha kabidi bamamu badi mamuenende mua kuikala muende nabo. Nenku muanetu Donatien udi webeja se: Bua cinyi kakuena luipiku lua mamu kua muanende wa balume?

Pa nsombelu wa pa bantu

M.4_7-8 : lukonko 3.

M.4_7-8 : 3.1.

Pa muanda wa diselangana (2°)

Musonsodi wetu wa b.t.m. mu Inera, ku Ngandanjika, wetu André Kambaja udi wela babadi ba Munyaku lukonko elu ne:

Tatu waseleshi muanende wa bakaji, kupita matuku mukaji wa tatu ewu wafu, tatu kushala mu dikenga dipite. Muku wende e kujinga mua kumuselela mukaji mukuabo. mBimpe anyi mbibi?

M.4_7-8 : 3.2.

Pa muanda wa diselangana (3°)

Tatu André udi webeja kabidi ne: Kudi bana ba muntu basatu. Bonso mbamane kusela bakaji. Mukulu e kubunda cilumbu cinene, kumukuatabo e kuya nende. Bidimu kupitabio mulongo. Bitonda bana babo kutekabo madilu. Pashishe umue wa kudibo e kupiana mukaji. Kupita kabidi bimue bidimu mukulu e kuvua kupatuka. Diba adio badi mua kupita bishi ne mukaji ewu?

Pa bibidilu bia kabukulu

M.4_7-8 : lukonko 4.

Mua kupita ne bibidilu bia kale (3°)

Tudi ne lukonko lua muanetu Banza Apollinaire wa mu b.t.m. kua Kanyana. Udi webeja babadi ba Munyaku ne: Kua Kanyana muntu kampanda uvua muselele muana wa muanabo mukaji. Kadi uvuabo baselele awo, mumane kulela bana ne mukaji, e kupingajilaye tatuende mukuabo lupetu luvuaye mumuselele nalu. Kadi ambayi. Muntu ewu nealuje mayi a munda kudi tatuende mukuabo ewu anyi to?

Muanetu Kasenda Kasangana, muena mudimu mu Miba, munu mu Mbujimayi, udi webeja babadi ba Munyaku se: Muntu mufuishe mukaji, anyi mubenge mukajiende, kushalaye mvula mipite bungi mu bujika. Bana bavuaye mushale nabo e kukola. Kumonabo ne: ki mbimpe tatu ashale nkayende mushindu ewu to. E kumuselelabo mukaji.

Kadi ambayi. Padi tatu ewu ulela ne mukaji udibo bamuselela kudi bana bende, biuma bia mishika nealambule nganyi?

Tatu Kabamba Anaclet, musonsodi wa btm. mu Lukalaba, mmuele pende babadi ba Munyaku lukonko ludi lulonda elu:

Muntu kampanda mmuseleshe muanende wa kumpala. Udi utumina mukuluende mulambu, bua aye kawufikisha kudi udi ne bukenji bua kuwudia. Kadi muine mukuluende ewu ukavua museleshe wende muana, muye ne mulambu kudi muntu awu uvua ne bukenji bua kuwudia, awu kubenga, bualu yeye muine uvua mudidiile yende milambu.

Nenku padi muakunyi utuambi ewu utumina mukuluende mulambu bua akawufikishe, ewu kuwangata e kuwudia, wamba ne: undi ne bua kuya kuwutudila kakuwakidila to, bu muvuaye muenze pamvua mumutuadile wanyi. Mpindiewu milambu eyi yonso ibidi idi mu bianza bia mukulumpe ewu. Nenku bua kuolola bantu aba, mbimpe kuenza bishi?

Pa nsombelu wa pa bantu

M.4_7-8 : lukonko 7.

Pa nsombelu wa bena lelu (1°)

Muanetu Lufuluabo André wa mu btm. Inera, ku Ngandanjika, udi webeja babadi ba Munyaku se:

Ndi ne muanetu; padi madilu mu diku, muanetu ewu udi wambila baku bende ne: nuvuile anu muanyi, bualu mu madilu kakuena wanumanya to. Ebi bidi bienzeka misangu yonso idi madilu amueneka mu diku dietu. Tuenze cinyi ne muanetu ewu?

Pa bibidilu bia kabukulu

M.4_7-8 : lukonko 8.

Mua kupita ne bibidilu bia kale (4°)

Tudi ne lukonko lutuela kudi muanetu André Kambaja, musonsodi wa btm mu Inera. Udi webeja se:

Bua mamu muye ku mpenga tudi tumona bimue bitendelelu bianyisha bua alambile mulume kabidi ikale ulala mu lubanza. Kadi bua imue misoko, padi mamu muikale nanku, kena wenza malu aa to. Ambayi tung'. Bankambua betu bavua benza pabo bishi? Apo muena ditaba mulelela udi mua kuenza pende cinyi?

Pa nsombelu wa pa bantu

M.4_7-8 : lukonko 9.

Nsombelu ne bakuabo (4°)

Pa nkoleshilu

Tatu Ntumba Antoine, wa mu Kalonji Sud, udi wela lukonko elu: Tatu kampanda uvua utandisha muanende bua dinaya dia karte ka makuta. Kupita matuku muana e kutuadila tatuende mfualanga 100, bua kumulambula; umujadikila ne: mmitapa ku karte. Tatu kuyangata e kuela muana lupemba. Kadi padi muana ewu ukajula ndululu mu karte, tatu udi uleja dibenga diende dia cilela cia muanende, cia ditua karte.

Ambayi tung'. Tatu ewu udi wenza mudimu wende wa buledi bilenga anyi?

Pa nsombelu wa pa bantu

M.4_7-8 : lukonko 10.

Cibambalu cia "Njila uyile ...

Nsombelu wa bena lelu (2°)

Citendatenda wa nsala mile ...

Tudi kabidi ne mukanda wa muanetu Pierre Nyamabo wa Nkongolo, utulondela pende muanda mubiamubi udi muenzeke mu Lukangu. Udi wamba ne:

Bana betu bonso babadi ba Munyaku, ndi nnufundila muanda uvua mupitakane mu musoko wa Lukangu. Mu musoko ewu muvua mupostolo (baba), muntu mumanyike ne muakanyine kanemu. Kadi tangilayi Baba ewu mmuenze bualu bua mponono. mMuangate muana wa mupostolo nende, wa mulongo ne bende bana, e kumuandamuna mukajiende. Uvua muye nende kuitu bua ne: akamuambuishe nsona. Bafika mu cisuku, baba e kuangata nsongakaji ewu bu mukajiende. Bualu e kutandukabu. Baba e kulumbulula wamba ne: muana ewu mvua musue kumusela, kadi baledi bende bavua babenge nende.

Pa bualu ebu muanetu Nyamabo wa Nkongolo udi wela babadi ba Munyaku lukonko ne: muaba ewu cilema ncia nganyi? nCia baba, anyi ncia baledi ba nsongakaji peshi ncia nsongakaji muine?

Muanetu Mbuyi Citenda Musadidi, musombele mu Bakua Cimuna, mmutufundile, ulomba kudi babadi ba Munyaku diumvuija dia miaku idi ilonda eyi:

Muanetu Augustin Mbuyi Cibuabua, musombele ku Ngandanjika, mu Inabanza, udi wela babadi ba Munyaku lukonko elu se: Bituadijile ku buana buende, uvua umvua bamba ne: Bena Mpiana ne Bakua Mulumba mbana ba Odia'a Kalanga ne Mbiya'a Kalanga. Pa nanku bobo aba kabasombela bafundangana bilumbu anyi balejangana mikalu ya buloba nansha. mMomu anyi ki mmomu? Kabidi bena bisamba ebi bacidi banemeka malu aa too ne mu matuku atudi aa anyi? Pashishe muanetu Augustin mmusue kumanya ne: Odia'a Kalanga ne Mbiya'a Kalanga mbamamu anyi peshi mbatatu?

Pa nsombelu wa pa bantu

Muanetu Kalenga Constantin, wa kua Kanyiki, mu Bakua Bowa, udi wela babadi ba Munyaku lukonko ludi lulonda elu wamba ne:

Pa nsombelu wa pa bantu

(Pa misandu yenzenza bantu)

Muanetu Zacharie Kamuena, wa ku Lukalaba, udi ukonka se: ku misandu yonso idi bantu benza eyi, udi mupite mikuabo ku buneme panu mmusandu kayi?

Pa nsombelu wa pa bantu

"Cidi cilenga mmuana anyi ndupetu?"

Tatu Albert Nkongolo, wa munu mu Mbujimayi, udi webeja pende babadi ba Munyaku se: muntu kampanda uvua ne bakaji bende babidi, umue wa mu lubanza, mukuabo wa mu ditunga. Mukaji wa mu ditunga ewu kulelaye muana wa bakaji. Tatu ewu e kuya kudi baledi bende bua kubambila se: muana ewu ndi nginyika mamu. Baledi bumvua miaku ayo, kubengabo bamba ne: kutuinyiki muana wa mu cisuku to. Muana ukumbana cikondo cia kubuelaye mu dibaka, tatu kuyaye ne musedianganyi kudi baledi bende aba. Bobo e kubueja muku ewu mu nzubu bua kulomba lupetu lua kudia. Ke padi muanetu Nkongolo webeja se: cidi cilenga ku bibidi eku mmuana anyi peshi ndupetu?

Ngumvuilu wa lusumuinu (5°)

Wetu Augustin Mbaya, wa ku Ngandanjika, mu Nkolongo, udi webeja pende babadi ba Munyaku se: Lusumuinu lua ne: " Bana ba lelu, belele nsuya manyi ", ndusue kuamba ne: bana badiku amu lelu, ku kale kakuvua bana anyi? Kabidi bakulumpe ki mbele bobo nsuya manyi anyi?

Pa bibidilu bia kabukulu

M.4_9-10 : lukonko 7.

Mua kupita ne bibidilu bia kale (5°)

Muanetu Adolphe Mukadi, wa ku Ngandanjika, udi webeja pende babadi ba Munyaku se: Kuelela bakishi nshima ne kuasa nkambua mu lubanza nkubi anyi? Pikalabio bibi, mbua cinyi? Pikalabio bilenga, mbua cinyi?