nkonko

(2003)

mua kualukila ku mbangilu wa Munyaku

Pa Ciluba cietu

M.8_1 :    lukonko 1

Tatu Kazadi Fernand wa mu Mbujimayi, udi uleja muanda udi ulonda ewu, wamba ne: Mu diyukila ne bana betu ba bisa bikuabo, ndi mumvue miaku mifuanangane ne ya Ciluba cietu: nshima, mpuku, ngulungu … Mikuabo payo idi ipindakana ne yetu : tshikasa ke cianza ; bianza ke makasa. Nenku, nudi basue bua ngikale ndufundila malu mu miakulu mikuabo anyi?

M.8_1 :    lukonko 1.2.    Ngumvuilu wa muaku (1°)

Tatu Bruno Mulumba wa kua Ciaba udi webeja se : Muntu muambe ne : Ndi mukua Kalonji, mukuabo pende ne : Ndi mukua wa Mpoyi. Muaku ewu " Mukua " udi ne ngumvuilu umue anyi?

M.8_1 :    lukonko 1.3.    Ngumvuilu wa muaku (2°)

Tatu Alexis Katambua, wa ku Ngandanjika, udi ukeba diumvuija dia muaku ewu: "Bupika" udi bamamu batelatela mu dibaka.

Pa bibidilu bia bankambua

M.8_1 :    lukonko 2

Ngenyi ya bena kale (1°)

M.8_1 :    lukonko 2.1.    Pa tusala ne nsumuinu (1°1)

Tatu Stanislas Mbaya wa mu Cikama udi webeja se : Bankambua mbatushile nsumuinu ne tusala biuwule ne ngenyi, idi ilubuluja bisamba. Kadi tuetu, tuapangi ngenyi ya kushila yetu ndelanganyi anyi ?

M.8_1 :    lukonko 2.2.    Mu nsombelu (1°2)

Wetu André Nzengu wa ku Kamuanga udi webeja pa dienzelangana bibi : Muivi mmutudile muntu cingoma bua kumunyenga mfualanga ; ewu kudifidilayo.

Nanku, muena cintu ewu udi mua kushala ne lusanzu lululame pambidi pa muivi anyi? Kadi yeye mukakeba nkuba bua kumushipa, udi mu njila mululame anyi?

Kadi muivi pende mmuntu wa kulekela cianana anyi?

Pa Ciluba cietu / pa nsumuinu

M.8_1 :    lukonko 3

Tudi bapete mukanda mufunda kudi mumpela Polycarpe Mvita, Ndeji wa Cikongo cia Mukasa wa Bulenga, mu bena Dipumba. Kumpala udi wanji kuela babadi ba Munyaku ne bawufundi kalumbandi, bua mudimu wabo mulenga.

Bua disanka udi wamba ne : Cibejibeji eci cidi cituenzela bimpe, tuetu bana ba lelu, bualu cidi citumanyisha malu malenga a bankambua, nsumuinu ne ngakuilu itukena bamanye. Pashishe udi ufika ku bualu, webeja se :

Pa Ciluba cietu

Muaku mbayanyi cina ta bayanyi cina mmufumine penyi ? Udi umvuija cinyi ?

Pa nsumuinu

M.8_1 :    lukonko 3.2.

Ngumvuilu wa nsumuinu (1°)

Ciambilu eci : mMuye muyile Mbala ku Basonga ncifumine pacio kuepi ? Ne cidi ciumvuija cinyi ?

Pa nsombelu wa mu bantu

M.8_2-3 :    lukonko 1

Muanetu André Nzengu udi webeja se :

Muntu yeye mupete madilu, umue wa ku bena mutumba nende e kuvua kumuladika. Mukuabo uvua kayi mupete mushindu wa kuiya kumuladika, udi umupesha bintu bia dimuanga nabio madilu. Ku babidi aba, udi muenzele muena madilu bualu bulenga mupite mukuabo nnganyi ?

Pa maciompakana

M.8_2-3 :    lukonko 2

maciompakana (1)

Kumanyishangana malu mu Munyaku

Tatu Kashimba Florent wa ku Ngandanjika udi webeja bena Manda bonso se :

Bua cinyi kacia Cibejibeji cia Munyaku ciatuadija dilopoka, katuena banji kubalaku mifundu ya bena kua Manda ? Bena Manda mbafue anyi badi ne muoyo ? Kua Manda kakuenaku mianda ya kale ne ya lelu idi bantu bafuane kumanya ne idi mua kubeleshishaku meji anyi 

Pa maciompakana

M.8_2-3 :    lukonko 3

maciompakana (2)

Pa dibaka

Tatu Aléxis Katambua Jekeja, wa ku Ngandanjika mu Inera, udi webeja se :

Bua dibaka kuikaladio ne bujitu buadio, mbimpe kulonda njila isatu eyi : 1° dibaka dia mu kabukulu, 2° dibaka dia mu Ekeleziya ne 3° dibaka dia kua Mbulamatadi.

Nenku, ku njila yonso eyi, udi mutambe mikuabo nnguepi ?

Pa nsumuinu ya bankambua

M.8_2-3 :    lukonko 4

Tatu Cimpanga Dominique wa ku Ngandanjika udi ulomba diumvuija dia tusumuinu tudi tulonda etu :

4.1.    Kandindi mu lupela.(2°1)

4.2.    Wavulamina wadiata nkita.(2°2)

4.3.    Nyoka umue katu udikosa bitupa.(2°3)

4.4.    Kabatu baleja lubilu.(2°4)

Tatu Dominique udi ulomba diumvuija dia biambilu bia mu kasala ka bena Mbala ebi :

4.5.    "Wa ku bulaba busheme budiadia ngomba bisosa".(2°5)

4.6.    "Wa mu dilenga dia lupetu, bakena mu dilenga babakangana".(2°6)

Tatu Joachim Kabuta wa ku bakua Cimanga udi ukeba pende diumvuija dia biambilu bidi bilonda ebi :

4.7.    Cikuku cia Kalanga wa Bonyi, Kalanga kufua cisamba kushala.(1°7)

4.8.    Udi untemba bana, mbenza bu ba mua Beya Bonyi anyi ?(1°8)

4.9.    Eba mankenda kuenza bu a mukaji’a Kanyungu ?(1°9)

Pa malu a kabukulu

M.8_2-3 :    lukonko 5

Ku Baluba eku (1°)

Muanetu Fortunat Ntanga wa kua Mpemba’a Nzewu udi ukonka babadi ba Munyaku se :

Mamu yeye mumacisha dipupila diende mu mpukapuka ; bana pabo kumona mubidi wende. Muanda ewu udi ulela cibindi anyi ? Pikalako cibindi cidi cikuata nganyi ? Badi bacilongola kudi banganyi ?

Pa nsombelu wa mu bantu

M.8_2-3 :    lukonko 6

Mubadi wetu Kasonga Martin udi wela babadi nende lukonko elu  :

Cikondo citudi eci, mu midimu kana yonso, mudi anu lungenyi lua nkosa mishiku. Cipupu eci cia lunyanga matunga, ciadiakujika bishi mu Kongo wetu emu ?

Pa kabukulu ketu

M.8_2-3 :    lukonko 7

Ku Baluba eku (2°)

M.8_2-3 :    lukonko 7.1.

Pa mbuji wa mabuki (2°1)

Wetu Kambaja André wa ku Ngandanjika mmuelulule lukonko lukavuabo bele mu Minyaku mipite, lutangila muanda wa mbuji wa mabuki. Tudi tumuleja se : citupa cibidi cia lukonko luende ncimane kuandamuna mu Munyaku. Kadi citupa cialu cia kumpala nciocio eci: Mu Kasayi emu, mbuji wa mabuki badi bamudia mu bisamba bionso anyi ?

M.8_2-3 :    lukonko 7.2.

Pa dinyika dina (2°2)

Meme muinyike muena diku dietu dina, ndi ne dibanza dia kudifikisha, bu mudibio bienzeka bua dina dinyika muntu wa kuanaka anyi ?

M.8_2-3 :    lukonko 7.3.

Pa disambangana mu madilu (2°3)

Mamuenu yeye kayi ukasamba mukaji’a muana diba didiye upeta bualu muabo, diapetaye buende, nansha bua madilu, mukaji’a muana udi mua kuya kamusamba pende anyi ?

Pa nsombelu wa mu bantu

M.8_4-5 :    lukonko 1

Muanetu Oscar Badibanga wa ku Cibila mmuebeje se:

Muntu yeye musombe ne mukaji wa mu bulunda bidimu bitue ku bibidi. Mukaji kusambakaja bayende ewu ne mulume mukuabo.

Ambayi tung! Mulume wa kumpala udi mua kufunda cilumbu kudi Mbulamatadi anyi ? Tubadi tudi mua kulumbuluisha anyi ?

Pa nsombelu wa mu bantu

M.8_4-5 :    lukonko 2

Tatu Dieudonné Nyanguila wa mu Kabanda ku Ngandanjika udi wela pende lukonko ne :

Tatu kampanda mmusombe mu ditalala mu lubanza luende. Bana bende mbapete nkoleshilu mulenga kudiye. Kadi padi muakunyi'a tatu ufika mu lubanza amu, utuadija kuela bana malulu, ubapesha ngenyi mibi; tatu apite bishi ne muanabo ewu?

Pa milambu

M.8_4-5 :    lukonko 3

Cibangu Stéphane wa mu SNEL, munu mu Mbujimayi, udi wela lukonko elu :

Muntu muselele muanende wa balume ne biuma bia kua muanende wa bakaji bivuaye mua kudia, mmuenze bimpe anyi bibi ?

Pa nsombelu wa mu bantu

M.8_4-5 :    lukonko 4

Pa nsombelu ne bakuabo (3°)

Mala a kapia anyangi ditunga

(Muanda muangata mu "Njila uyile ...")

Muanetu Martin Kasonga wa ku Katanda mmutufundile mukanda, ulonda muanda wa njiwu uvua muenzeke kuabo eku ne :

Nsongalume kampanda uvua muye ne balunda bende bua kitaba dina divuabo bamuinyike kudi mulunda wende. Mumane kusumba bilamba bia kenakende ne bia mamuende, kuambulabo cisanji e kumata mu njila. Bafika e kupeshabo mulunda wabo bivuabo bende nabio.

Bua disanka, awu kupatula ndundu wa mala a kapia. Pinapo muena mutumba nende kufikilapu, mala e kumonangana. Kunuabo, kusanka bamone muabo bu mua Katombe. Ciluba kubajika mukana, dingala ne mfualansa kumata mu cialu, kamuyi muoyo.

Mala abapita, kubangabo disakilangana. Mu cimvundu emu, muena mutumba awu kudishinda e kushibeya muendu wa dikalu dia benyi. Abo kujukila kulu ne : Apa anu wewe mufute muendu mukuabo.

Mulumiana ne akule, umue muenyi kumutua cisusu ku nshingu. Mukuabo kumutapa dipi ku mbanga, udi eku pende kumututa cintu munda. Mutumba kudishinda e kufua cikadi. Abo bamona nanku, e kunyema lubilu, kushiya nshima panshi ne nzolo.

Pa kabukulu ketu

M.8_6-7 :    lukonko 1

M.8_6-7 :    lukonko 1.1.

Malu a bisamba (1°)   

Cifingu cia bena Kanyana ne ben Kapuya

Muanetu Albert Nkongolo Ciongo udi webeja se: Cifingu civua bena Kanyana ne bena Kapuya batue pa kujika kabotubotu ne kanyama ka lusumbi, civua pa cinyi?

M.8_6-7 :    lukonko 1.2.

Ku Baluba eku (3°1)

Pa mishinga ya lufu

Muanetu Albert Nkongolo Ciongo udi webeja kabidi se: Cilembi yeye mufue, basombele bamuenzela mishinga kayi?

M.8_6-7 :    lukonko 1.3.

Ku Baluba eku (3°2)

Cilembi ne cipinda

Pashishe tatu Albert udi wela lukonko elu ne: nDishilangana kayi didi pankaci pa cilembi ne cipinda?

Pa kabukulu ketu

M.8_6-7 :    lukonko 2

Ku Baluba eku (4°)

Diselela pa mulongo

Tatu Félicien Muamba Beya wa ku Kabeya Kamuanga udi webeja babadi se: Padi muntu muselele pa mulongo, cidi ne mushinga ndisela anyi mmulongo?

Pa kabukulu ketu

M.8_6-7 :    lukonko 3

Ku Baluba eku (5°)

Mua kulambula bamamu ?

Tatu Vincent Bukasa wa ku Cilomba udi webeja se: Bua cinyi basombele babenga mua kulambula bamamu milambu ya mishika mu meku etu mavule?

Pa kabukulu ketu

M.8_6-7 :    lukonko 4

Kumanya mianda ya bisamba (2°)

M.8_6-7 :    lukonko 4.1.

Pa bisamba bia 'Mulumba' (2°1)

Tatu Albert Nkongolo Ciongo udi webeja se: Tudi ne mukua Mulumba ku bakua Nsumpi, ku Ngandanjika ne ku bena Mpuka, kua Mulumba Kakopo. Milumba eyi mbantu bamue anyi? Pikalabo bantu bamue, mbatangalake nenku bua cinyi?

M.8_6-7 :    lukonko 4.2.

Mulumba Kaminumitupu (2°2)

Pashishe tatu Albert udi webeja ne: Mulumba Kaminumitupu, uvua mupeshe bena Nsana buloba, uvua nganyi ku bakua Mulumba?

M.8_6-7 :    lukonko 4.3.

Bena Nsana ne bena Cisuaka (2°3)

Lukonko lukuabo lua muine tatu Albert Nkongolo Ciongo ludi nunku: Bua cinyi bena Nsana kabena baselangana ne bena Cisuaka ku bakua Kalonji?

Pa malu maciompakana

M.8_6-7 :    lukonko 5

M.8_6-7 :    lukonko 5.1.

Maciompakana (3)

Pa buivi ne buena Nzambi

Tatu Albert Nkongolo Ciongo udi ukonka se: Bobo bibe muena Nzambi cintu, usombele ufuna ne: Muntu udi muenze ewu, ndi mmulendukila anyi mmutuila bianza kaba kabi. Kadi muena diabolo yeye musue kulendukila pende muntu, uyaya kuepi?

M.8_6-7 :    lukonko 5.2.

Maciompakana (4)

Pa bia kudia nabio nshima

Tatu Albert udi ukonka kabidi ne: Bowa, njilu, mayi ne meshi bidi bibuela mu lukongo lua nyinyi anyi lua bisosa? Bua cinyi?

Pa malu maciompakana

M.8_6-7 :    lukonko 6

M.8_6-7 :    lukonko 6.1.

Maciompakana (5)

Diamba

Tatu Vincent Bukasa wa ku Cilomba udi webeja pende se: Mfuanka wa diamba mmufumine mu ditunga kayi?

M.8_6-7 :    lukonko 6.2.

Maciompakana (6)

Bukulumpe mu diku

Muntu mukulumpe mu diku, muikale witaba bualu buonso nansha buimpe nansha bubi, udi mua kulubuluja diku edi anyi?

Pa malu maciompakana

M.8_6-7 :    lukonko 7

Maciompakana (7)

Bana ba bakaji, bana ba balume

Wetu Félicien Muamba Beya udi webeja babadi se: Bua cinyi bana ba bakaji mbalamate kudi bamamuabo? Nanku tudi tuabanyangana bana: mulume ne ba balume, mukaji ne ba bakaji anyi?

Pa malu maciompakana

M.8_6-7 :    lukonko 8

Maciompakana (8)

Pa basalayi

Tatu Stéphane Mpoyi Mukendi udi webeja ne: Ku kale, pavua basalayi kabayiku, mfumu wa kabukulu uvua ukokesha bena muende bishi?

Dikokesha dimpe nkukuacisha bantu kudi basalayi anyi?

Pa Ciluba cietu

M.8_6-7 :    lukonko 9

M.8_6-7 :    lukonko 9.1.

Ciluba cijalame (1°)

Munyaku udi webeja ne: Mu biambilu bibidi bidi bilonda ebi, cidi ciumvuangana ne ngakuilu mujalame wa ciluba nciepi?

    Ndi mukubikile bualu mbampeshe mikenji yebe.
    Ndi mukubikile bualu bua mbampeshe mikenji yebe

diandamuna

masangu

M.8_6-7 :    lukonko 9.2.

ngumvuilu (4°)

Munyaku udi webeja kabidi ne: Umvuijayikoko bikuabo bidi bilonda ebi:

    - Bualu mbuntondele pa kasubikidi.
    - Nkuacila makasa.

Pa kabukulu ketu

M.8_6-7 :    lukonko 10

Ku Baluba eku (6°)

Pa lufu lua muana ku bamansebende

Pashishe Munyaku udi webeja kabidi ne: Ku Baluba eku, padi muana ufuila ku bamamuende, tudi tumona bia mponono. Badi batuta mamuende ne bena kuabo, pamue apa bashipa bamue. Ngenzelu ewu mmusue kuleja ne: Ku bamansebende wa muana ke kudi bamukinyi anyi? Kadi bua cinyi bana bavule badi bafuila mu meku a batatuabo? Cilela cia dituta bena diku dia mamu padi muana ufuila kuabo ncifume penyi?

diandamuna

masangu

Pa malu maciompakana

M.8_6-7 :    lukonko 11

maciompakana (9)

Muanda wa mupanyi wa nzubu

"Nkashama lekela lukuka ..."

(Muanda muangata mu "Njila uyile ...")

<< Babadi nanyi, umvuayi muanda nguewu. Nzambi mmufuke muntu bua atekeshe buloba. Kadi ewu udi kayi wenza nanku, udi ushala muena lulombo, ulomba mukele e kulomba ne nsebela.

Kuneku ku Citolo, nsongalume kampanda uvua musumbishe nzubu e kuya kasomba mu cimenga. Musumbi wa nzubu pende e kulengeja muaba awu. Kuasaye nkumba, kudima kumbelu e kukunaku matala.

Dia matala akola, bena diku dia mupanyi wa nzubu e kubanga dituma bana ba mu musoko, bua bikale baya kuiba.

Panyima kutuminabo muanabo mukenji ne: iyaku, umone mudi matala makuacike kumbelu kuebe aku.

Awu utula makasa e kujula ndululu ne musumbi wa nzubu ne: Cimvua mukusumbishe nnzubu, civua mukusumbishe buloba nansha. Pawudi upola matala aa, kukunu makuabo to.

Kadi cikondo cia kudima kabidi cikumbana, musumbishi wa nzubu ki mmumueke to. Mukungulu upita bule, tatu uvua ku nzubu kudimaye e kukuna matala ciakabidi.

Abidi mmale, asatu mmipi, mupanyi e kufika. Kudituaye mu mpata e kuasa dikuna nkunda, wamba musumbi ne: Matala a mpindiewu udi munkunyine meme.

Cilumbu kukokangana e kafika kudi bamfumu ba musoko. Kadi umvuayi bualu bakuetu. Too ne patudi tuakula apa, cilumbu eci ki ncianji kukosa. Ne pandi mfunda apa, wa Citolo udi munkaci mua dipila dia matala, mukunyi musombe, mutangile. Cia kumanya ncia se: Musumbi wa nzubu mmuikadi mu Citolo.

Nenku, nuenu bangenyi wa ngenyi, nudi penu ne meji kayi a kufila mu cilumbu cia mushindu ewu?

Bakulu pabo ne: Muana mukuele ciyoyi, umanye ne: bakulumpe mbamutume”. >>

(Bifunda kudi Badibanga Nsambuka wa ku Citolo)

Pa malu maciompakana

M.8_6-7 :    lukonko 12

maciompakana (10)

Pa diendakana ne cingoma diba dionso
kudi bampulushi ne basalayi

Mpangu yetu neyishale

Tatu Vincent Bukasa wa ku Cilomba mmufunde, utulondela muanda mubiamubi ne:

Mu dia matuku 20 a Ciongo, mukalenga Lukusa, muikale mpuluishi, mmushipe Shambuyi Kabengela ne muena kuende Cilanda wa Mbuyi, pamue ne muana wa bena mutumba. Bantu aba mbase ku cingoma.

Mpuluishi ewu uvua ufuila lupangu ne bakuetu aba. Panyima pa mumane kubashipa yeye kudiasa pende e kufua.

Munyaku udi webeja se: Mpuluishi udi ne dianyisha dia kuenda ne cingoma meba onso patupu anyi?

Pa malu a kabukulu

M.8_8 :    lukonko 1

Kumanya malu a bisamba bietu (3°)

Wetu Kasonga Martin, wa ku Katanda udi webeja se: Mu Baluba emu, kudi bimue bisamba bifuanangane ku mena, bu mudi:

• Bena Cilanda ku Bakua Nsumpi

• Bakua Cilanda ku Bakuanga

• Bena Cilanda kua Cizubu

• Bena Cilanda mua Ntambua Kankonda

Pa kumona mudi mena aa mafuanangane, ndi nkonka se: Bena Cilanda aba, mbantu bamue anyi peshi mbashilangane?

Kadi pikalabo bantu bamue, mbafike ku diabulukangana mushindu kayi?

Pa milambu

M.8_8 :    lukonko 2

Mua kupita nayo (2°)

Tatu Kashimba Florent, wa ku Ngandanjika, udi ukonka se : Tatu yeye muikale ne bakaji basatu, bonso e kulelabo bana ba balume ne ba bakaji. Tatu kubueja bana bende ba balume mu mabaka. Panyima pa mafuku, yeye e kufua. Nenku, muana wa mukaji muisatu, paseleshaye wende muana wa kumpala, nnganyi wa ku bana babo, ba ku matumba makuabo, walambulaye lupetu.

Pa nsombelu wa mu bantu

M.8_8 :    lukonko 3

Tudi ne lukonko luela kudi Martin Kasonga wa ku Katanda. Ludi nunku: Mukaji yeye kayi utekela bayende mayi ku ciowedi, kayi uciuka dimusukuila bilamba ne dibikoma, kayi umutekela nshima ku mesa, kayi wakidila bayende ne disanka: padibo bamuebeja bua ngenzelu ewu, udi wandamuna ne: Wanyi mudimu ngua budimi.

Bana betu babadi ba Munyaku, padi bualu bua nanku bumueka mu nzubu kampanda, nuenu nudi mua kufila lungenyi kayi?

Pa muakulu wetu

M.8_8 :    lukonko 4

Pa ditanta ne pa dijimina dia muakulu

M.8_8 :    lukonko 4.1.

Ditanta dia muakulu

Munyaku udi webeja se: Muakulu wa cisa cia bantu udi utanta anu padi benawu bawupesha bujitu, pa kuwakula ne pa kuwunanga kumpala kua miakulu mienyi. Kadi pikala bena muakulu balekela kuwakula mushindu uvuabo babashilewu kudi bankambua babo:

-         pa kuwukonyangaja nansha kuwuzobakaja ne miaku ya mu miakulu mienyi,

-         pa kufileja mine miakulu mienyi eyi kumpala kuawu,

nanku bantu aba, ku bungi bua bidimu, ki mbafuane kupatuila cisa ciabo muakulu mulubidile anyi? Kabidi wabo wa kafukila ewu ki mmufuane kujimina anyi?

Tudi tuebeja nanku bualu tudi bamone se: Njiwu ya mushindu ewu idi ibembela ciluba cietu.

Pa nanku filayiku yenu ngenyi inudi nayo bua kusungidila ne kutancisha muakulu wetu.

M.8_8 :    lukonko 4.2.

Lufu lua muakulu ndufu lua cisa

Munyaku udi webeja kabidi se: Nsongalume nansha nsongakaji udi kayi mumanye cidi miaku eyi minene ya mu ciluba cietu yumvuija: ‘cibindi’, ‘lubola’, ‘mukiya’, mmufuane kucinyina tatuende mukaji nansha mansebende, tatuendemuenu nansha mamuenende pa bule anyi?

Pa nsombelu wa mu bantu

M.8_8 :    lukonko 5

Nsombelu ne bakuabo (4°)

Pa mankenda a mu cimenga cietu

Munyaku udi webeja, wamba ne: Bana betu, bu matunga onso a ku Mputu atudi tuzukila mua kuya kamona awo, mikale ne bukoya bu mudi dietu edi, tuvua mua kujinga bua kuya kuabandila anyi?

Kadi tuetu, bua kulama mankenda mu cietu cimenga, bidi bikengela anu patuapeta njila milenga, nzembu ne mayi bitusombele tuelele mbila bufuku ne munya ebi anyi?

Cituenze ne njila milenga ayo ncinyi, padi mikese itudi nayo miule tente ne mayi a nsangidilu, meba a makayabu, bipese bia nshima milale ne tubudimbua?