nkonko

(2002)

mua kualukila ku mbangilu wa Munyaku

Nsumuinu ya bankambua

M.7_1-2    lukonko 1

Pa tusala ne misambu (1°)

Tatu Tentula Florent, muena mudimu mu bamumpela, munu mu Mbujimayi, udi wela babadi bonso nkonko idi kuinshi eku, wamba ne: Nsombele ngumvua bamba mu kasala se :

M.7_1-2    lukonko 1.1.

" Wa mu lushiba lua Ciunza wa Ciunza, mudi lushiba luika milungu kuinshi… " Lushiba elu ncinyi ? Milungu ncinyi ?

M.7_1-2    lukonko 1.2.

1.2. " Meme ndi wa mukendi mbuji mu Cibombo ". Mu Cibombo kamuena muenda mbuji anyi? Ngumvuijayiku cidibo basue kuamba.

Pa bibidilu bietu bia kabukulu

M.7_1-2    lukonko 2

Mua kupita nabio lelu (1°)

Tatu Albert Nkongolo Ciongo, wa mu Kizito, munu mu Mbujimayi, udi webeja se:

Ndi musumbe lupangu luanyi, muasemu nzubu mupiamupia. Kumpala kua meme kabuelamu, cindi mua kuenza ncinyi bilondeshila mishinga ya bankambua betu

Pa nsumuinu ya bankambua

M.7_1-2    lukonko 3.1.

Ngumvuilu (1°)

Tatu Kazadi Badibanga wa ku Lukalaba udi webeja ne :

" Kuakaya Nkola, kuakashikila ". Nkola nnganyi ?

Nsumuinu ya bankambua

M.7_1-2    lukonko 3.2.

Pa tusala ne misambu (2°)

Muine Kazadi Badibanga ewu mmuebeje kabidi ne:

Kasambu aka kadi kumvuija cinyi :

" Mukalenga, tumutule penyi ?
 Amu mua Cikala,
Cikala mmutupu… "

Pa nsumuinu ya bankambua

M.7_1-2    lukonko 4.

Ngumvuilu (2°)

Tatu Mutambayi François wa mu Inabanza, ku Ngandanjika, udi webeja pende ne :

Kasumuinu ka ne : " Ngafu nayo bu Nzeba wa Mudiayi ", nkasue kuamba cinyi ? Nzeba uvua nganyi ? Ngua bena nganyi kabidi civuaye muenze ncinyi?

Nsumuinu ya bankambua

M.7_1-2    lukonko 5.

Kasumu

Mamu Céléstine Mbalayi wa kua Mpiana mmukonke pende se: Tusombele tumvua bamba muntu ne: "Mua Kanyiki tuanda".

Mua Kanyiki uvua muntu anyi peshi mbualu bufuanyikija ? Pikalaye muntu, bualu buende buvua bishi ?

Pa bibidilu bietu bia kabukulu

M.7_1-2    lukonko 6.

Pa dibaka ne buena nzubu (1°)

Mamu Lumba Hortense wa ku Katomba udi wela nkonko eyi :

M.7_1-2    lukonko 6.1.

Pa dibaka ne buena nzubu (1°1)

Ku kale kuaka, pavua mulume ufua, mukaji uvua ushale mu nzubu matuku mulongo, kayi upatuka anyi wenza ngendu mile to. Kadi lelu tudi tumona anu mulume ufua, matuku makese mukaji pende ubanga kupatuka, uya ku bisalu ne ku ngendu. Nudi mua kungandamuna bishi bakuetu ?

M.7_1-2    lukonko 6.2.

Pa dibaka ne buena nzubu (1°2)

Tatu kampanda wa kua Kanyiki uvua mumvue bateela mishindu ya mabaka ku bisanji bibidi: cia Mbulamatadi ne cia Kasayi mutenda manamana.

Ku cia ditunga e kuambabo ne :

- Dibaka dia kumpala ndia kabandu

- Dibaka dibidi ndia bumpianyi

- Dibaka disatu ndia bulunda

- Dibaka dinayi ndia cikonga

Ku cia Kasayi mutenda manamana e kuambabo ne :

- Dibaka dia kumpala ndia kabandu

- Dibaka dibidi ndia cikonga

- Dibaka disatu ndia bumpianyi

- Dibaka dinayi ndia kalaba kakunze

Babadi nanyi, kalaba kakunze ndibaka anyi peshi mbuji uvuabo bafila wa kafuanjiya?

Pa bibidilu bietu bia kabukulu

M.7_1-2    lukonko 7.

Pa dibaka ne buena nzubu (2°)

Tatu Kabuya Kamanda wa ku Lukangu udi ukonka pende se:

Pa dibaka ne buena nzubu (2°1)

M.7_1-2    lukonko 7.1.

Mikalu ya mu nzubu ne ya mu meku idi ifuma ku cinyi?

Pa dibaka ne buena nzubu (2°2)

M.7_1-2    lukonko 7.2.

Kudi bimue bisamba bidi bantu kabayi baselangana to, apo bangatangana e kusomba amu patupu, bu bena nzubu. Kadi padibo bakolesha babo bana, badi babaselesha, babadila biuma. Ngenzelu ewu mmuimpe anyi?

Milambu ya kabukulu

M.7_1-2    lukonko 8.

Mua kupita nayo (1°)

Muanetu Kazadi Polydor wa ku Luanga udi webeja se:

Tatu yeye museleshe muanende wa bakaji, kadi kayi muanji kadiata ku buku eku to; panyima pa lumingu lumue, muana wa bakaji e kubenga dibaka.

Muledi udi mua kupingajila musedianganyi biuma bionso anyi?

Malu a bankambua

M.7_1-2    lukonko 9.

Kumanya mianda ya bisamba (1°)

Tatu Justin Kabeya Cikala wa ku bakua Sumba mmuebeje pende se :

Bena Kabimba badi ku mutu kua Lubilanji lua Mbujimayi, pabuipi ne Katabayi ne Lusaala, mbafume penyi ?

Malu a bankambua

M.7_1-2    lukonko 10.

Kumanya mianda ya bisamba (2°)

Tatu Kazadi Badibanga wa ku Lukalaba udi ukonka se mMisoko kayi ya mu Bakua Kalonji idi ne bamfumu ba bitadi?

Malu maciompakana

M.7_1-2    lukonko 11.

Muanetu André Nzengu wa ku Kabeya Kamuanga mmukonke se:

(1) M.7_1-2 : 11.1.

Muntu ukuna tumbele mu budimi bua bende

Muntu kampanda uvua usaama, e kuyaye ku ciondopelu. Mutumba nende ushala e kusumba tumbela, kuya kakuna mu budimi bua muine mubeedi ewu. Dia dinowa, badi mua kuabanyangana bia mu budimi ebu ne muenabu bungi bua muomumue anyi ? Nudi nuamba penu bishi bua ngenzelu wa muena mutumba ewu ?

(2) M.7_1-2 : 11.2.

Mujika udi mua kudia bumfumu ku Baluba anyi?

Mfumu kampanda wa kabukulu uvua mufue lufu lua cikoso. Kushiyaye muanende wa balume wa mvula 25. Muana ewu kena ne bukole bua kuteeka mukaji kumbelu to. Patudi tuamba apa, muana ewu udi ujinga kupingana pa muaba wa tatuende.

Udi mua kudia bumfumu muikale anu bujika nanku anyi ? Filayiku diandamuna bilondeshila bilela bia Baluba.

(3) M.7_1-2 : 11.3.    Muivi nnganyi?

Muntu mukuabo nyewu muye ku budimi bua bende e kutuula ciomba, muena budimi pende kamanyi. Nenku padi ewu ubanga dicipa, ke uvua mutuule ciomba e kuiya kutonda cilema ciende.

Pashishe muana kampanda uvua muangate cisanji cia tatuende e kusumbisha. Tatu ukonka muanende bualu ebu, ewu e kuvila, kulaka ne mu dikasa. Ku babidi aba muivi i nnganyi?

(4) M.7_1-2 : 11.4.    Muena kanemu nnganyi?

Ku bantu babidi aba: muntu mukole ne muana, udi mua kudianjila kuleja mukuende kanemu nnganyi?

Malu maciompakana

M.7_1-2    lukonko 12.

(5.1°) Pa bintu bia bumpianyi

Muanetu Kadima Alexis, wa kua Mulumba Malaba, udi webeja se:

Padi tatu kampanda, pa kufua, ulaya mukajiende bintu, bu mudi mici ya bimuma, mabue, madimi ne bikuabo, mmuenze bimpe anyi?

Malu maciompakana

M.7_1-2    lukonko 13.

(5.2°) Pa bintu bia bumpianyi

Muanetu Célestin Cilombo, wa ku Kabeya Kamuanga, udi webeja pende se: Mufue yeye mushiye diyi ne: Bana betu kabashadi kupiana mukajianyi ne bintu bianyi to. Bana babo aba badi mua kuenza bishi?

Pa bibidilu bietu bia kabukulu

M.7_1-2    lukonko 14.

Pa dibaka ne buena nzubu (3°)

"Cibindi cikadi cifue mu cisa cietu anyi?"

(Muanda musomona mu "Njila uyile ...")

Muanetu Jean Roger Kabuya, wa ku Katomba, mmufunde mukanda ulonda muanda mubiamubi uvua muenzeke kuabo eku wamba ne :

Tatu kampanda mmuangate mukaji wa mu lufuila, pashishe e kuangata kabidi muakunyi wa mukaji ewu. Nenku tatu Roger udi webeja se : Ngenzelu wa nenku mmuakanyine cisa cietu anyi ?

Nsumuinu ya bankambua

M.7_1-2    lukonko 15.

Pa tusala ne misambu (3°)

Mamu Kapinga Marie-Jeanne wa kua Kipanga, ku Ngandanjika, mmufundile pende babadi ba Munyaku tusambu tua kale, tuvua bamamu bimba ku cinu diba divuabo batua.

Tuine etu bavua batuimba kudi bamamu basatu, basangile ku cinu. Mamu udi uleja se: Mu tuine tusambu etu muvua malongesha mimpe, avua bamamu bapesha bana babo. Telejayi numvue.

Ntuatua kaboko kamue,

Mulume mmukandimine,

Mu cibanda cia mua Kanyiki,

Mudi njilu ne bibota,

Makonda bikuama naka.

Citupu bituulu mukaluijakane,

Wanyi bayanyi ukadi muibidile

Ndia amu njilu butamba kaleji kasaba,

Nansha bufuku kuminaye naka,

Milowo bu ya Mutombo wa bajika

itucileyi nayo Mbombo kaci,

Mbombo pende wamutua cikonyi.

Kutua nkuntuile malaba,

Bucia kabidi e kutua

Kuipika nshima ya mbala,

Kuipka yanyi e kudia,

Mamuenu wa mu kabua ka citende,

Wamanyi kunkola kuciyipu kuenu,

Ukadi cia pa muoyo cikuma nduu,

Mesu mu kasamba kasaba ciaa,

Uya kua muanebe bianza bitupu,

Muambule kabondo kuuja ngaji,

Ne tutala tutuye munda mutupu,

Se ntua kapesha muananyi kuya kuoshaye,

Kulaala kua muanebe ngondo mujima.

Bua kupula tusambu etu, mamu Marie-Jeanne udi wamba se: Wewe Munyaku muana'a yenga, pamue ne babadi bebe bonso, patulayi ngenyi milenga idi munda mua tusambu etu.

Nsombelu wa mu bantu

M.7_3    lukonko 1.

Mu Baluba (1°)

Tatu Cisuaka François wa kua Kasumbi, udi webeja babadi ba Munyaku se:

Tusombele tumvua, padi tatu mufue, bamba ne: mbamudie kudi mukajiende; kadi katuena banji kumvua bambaku bua mamu mufue ne: mbamudie kudi bayende to. Nanku badi mua kudiangana badi anu bamamu anyi? Cidi mua kutujadikila ne: bualu ebu mbulelela ncinyi?

Pa bibidilu bietu bia kabukulu

M.7_3    lukonko 2.

Kumanya mianda ya kale (3°)

Tatu Athanase Cimanga ne tatu Benoît Cibangu ba kua Nkuadi badi bebeja babadi ba Munyaku se: Pavua bena kale bamba ne:

M.7_3    lukonko 2.1.    Cienda ne mudiadia, Katomba ne mpaya; Cienda kumona bikoja, Katomba e kuimba; mbasue kumvuija cinyi? Kabidi civua bantu babidi aba benze ncinyi?

M.7_3    lukonko 2.2.    Ciambilu eci: Kunuina mayi pa lukasu cidi ciumvuija cinyi?

M.7_3    lukonko 2.3.    Bua cinyi muipu udi washila bamansebende nzubu wa buipu pa lukita lua umue wa kudibo? Kabidi bua cinyi muine nzubu ewu udi ne bua kujika anu dituku dimuedimue? Pashishe muashi ewu udi ne cia kuowa mayi ku bianza. Mbua cinyi?

Pa bibidilu bietu bia kabukulu

M.7_3    lukonko 3.

Kumanya mianda ya kale (4°)

Tatu Albert Nkongolo Ciongo, wa mu Kizito, mmuele babadi ba Munyaku lukonko elu:

nDishilangana kaayi didi pankaci pa Mukalenga wa nsesu ne Mukalenga wa cisaka?

Nsombelu wa mu bantu

M.7_4-5    lukonko 1.

Bamfumu ba buloba (1°)

Tatu Oscar Badibanga Nsambuka wa ku Citolo udi wela lukonko ludi lulonda elu:

Bamfumu bavule ba miaba idi mbongo basombele bakosesha bina ne bangata bia lukama 50. Kadi bua cinyi bamfumu ba misoko idibo bosha makala, baloba anyi benga manyi, bobo balombe kantu, bidi bimueka bu cilema ku mesu a bantu nansha a Mbulamatadi, neaa ne: mmulombe cintu cia buena kalaba? mMuomo anyi?

Nsombelu wa mu bantu

M.7_4-5    lukonko 2.

Nsombelu mu diku (1°)

Kansungasunga ka bena diku

Mamu Bijika Monique wa ku Citolo Cibila udi ukonka se:

Mu meku etu onso tudi tulela bakaji e kulela ne balume. Kadi tudi tumona misangu mivule, padi muntu mukaji utandangana ne muntu mulume wa mu diku diabo, batatu bavule badi bakuata ku cia muntu mulume, bamba ne: Wa balume ke wetu muntu; ewu neaye kua bende. Bana betu, muntu mukaji yeye kena ne mushinga mu meku etu anyi? Ngandamunayiku, bualu ndi ndaala bitabeela.

Malu a bankambua

M.7_4-5    lukonko 3.

Kumanya malu a bisamba (5°)

Kasongo Martin wa ku Katanda udi webeja se:

Mu dikola dianyi, mvua mumanye ne: Tudi bantu bamue, tuetu bena Kapuya ne bena Muembia; bualu tudi mu citupa cimue cia buloba, bikale kabidi ne mfumu umue. Kadi lelu, nkadi mmona matapuluka, mikalu ne mvita munkaci muetu. mBua cinyi? Ndi ndomba butoke kudi babadi betu, bualu ndi muledibue ku matunga a kule.

Nsombelu wa mu bantu

M.7_4-5    lukonko 4.

Mu Baluba (2°)

Mena a bana ba mapasa

Tatu Katumbayi Emmanuel, wa ku Ngandanjika, udi webeja babadi ba Munyaku se:

Ku bana ba mapasa banayi, tudi bamanye Mbuyi, Kabanga ne Katuma. Kadi muinayi diende nnganyi?

Pa bibidilu bietu bia kabukulu

M.7_4-5    lukonko 5.

Ku Baluba eku (1°)

Pa disoma bia pa madimi

Tatu Dieudonné Cikala, musombele kua Mpemba'a Nzewu, udi ukonka se:

mMushindu kaayi uvuabo basoma bia pa madimi cikondo cia bankambua betu?

Malu maciompakana

M.7_4-5    lukonko 6.

(6) Munyaku ngua bantu bonso

Muanetu Cimpanga Mutekemena, wa mu Inera ku Ngandanjika, udi webeja babadi ba Munyaku se: Kacia Munyaku watuadija, katuena banji kubalaku mifundu ya luseke lua bakua Kande to. mBua cinyi? Bobo ki mbamanye Munyaku anyi peshi ki mbamanye difunda?

Nsombelu wa mu bantu

M.7_4-5    lukonko 7.

Nsombelu ne bakuabo (1°)

Muanda wa bivi

Muanetu Mbuyamba Gilbert, musombele mu Cikongo cia François wa Bulenga mu SNEL, udi webeja babadi se:

Bana betu, tuenze cinyi bua bena mucima, badi benda ne bia lufu ku bianza bufuku, kabayi baladika bantu tulu?

Tuvudije mbua mu mpangu yetu; tunyunguluile mpangu ne bimanu bitumbuke anyi peshi tuvudije bia mvita mu nzubu?

Pa nsumuinu ya bankambua

M.7_4-5    lukonko 8.

Ngumvuilu (3°)

André Kambaja wa mu Inera ku Ngandanjika udi ulomba diumvuija ku bidi bilonda ebi:

    8.1. Kasumbu ka malenga, mulela nkayenda bu badi basambombo.

    8.2. Cintu cinsukala.

    8.3. Waya ku Bakuba kuanji kuteya, wamona Bakuba muteyateyabo.

    8.4. Cikela kaciya kulela lukulu.

    8.5. Bakufinga bantu, kabakufingi nsona.

    8.6. Mukulu kutumba, mmulela wa muabi.

muanu ne mufuanu

Pashishe muanetu udi webeja ne:

    8.7. Mufuanu ne muanu ncintu cimue anyi?

Pa nsumuinu ya bankambua

M.7_4-5    lukonko 9.

Ngumvuilu (4°)

Tatu Katumbayi Emmanuel wa ku Ngandanjika udi webeja babadi ba Munyaku se:

Tusombele tumvua bamba ne:

"Mianda katonda bakole,
katonda basela, katonda bajika,
itondele ntontonji
wanyingalala pankaci".

Ntontonji mmunyingalale pankaci bua mianda anyi peshi ke muende mudi Mulopo mumufuke? Lusumuinu elu ludi ne dilongesha kaayi?

Malu a kabukulu

M.7_4-5    lukonko 10.

Mua kupita nawo lelu (2°)

Tatu Cimanga Athanase wa ku Citandayi udi webeja se:

Tuetu bena Kristo tudi mua kudia mbuji wa mabuki, udibo bafila kudi bena kabukulu anyi? Pandi ngebeja batudi nabo mu ditaba, badi bangambila ne: Mbuji wa cimunuji tudi tudia, bualu kabena bakula nende ku bakishi to.

Nuenu babadi nudi nuamba penu bishi pa muanda ewu?

Malu a kabukulu

M.7_4-5    lukonko 11.

Mua kupita nawo lelu (3°)

Munganga Ngoyi Mukudi, wa ku Ngandanjika, udi wela babadi ba Munyaku nkonko eyi:

11.1.    Bua kuasa nzubu wa bakishi kumbelu, bidi bikengela bua muntu ikale anu mumane kuikala ne mukaji anyi?

11.2.    Nkambua wa lubanza badi bamukuna bishi? Kabidi nnganyi udi umukuna?

11.3.    Pavua bakaku ne muoyo, tuvua tudia nabo nshima. Kadi padibo bafua, tuetu kuinyika yabo nshima ne: nya bakishi. Kabidi bua kuipika mine nshima eyi, badi basuna mayi kudi kana ka bakaji kacidi kamama. Kadi nshima iboba e kumvua bamba ne: Muana mukaji kena uyidia. Bidi muomumue ne bua nshima ya nkambua. Badi bayidia anu kudi bamamu. Kadi udi ufila bionso bidibo beelela nkambua se ntatu. Bana betu, mudibio bienzeka amu mbiakane anyi?

Malu a kabukulu

M.7_4-5    lukonko 12.

Ku Baluba eku (2°)

Pa biombelu

Tatu Kambaja André wa mu Inera udi ukonka se:

12.1.    Ku mishindu yetu yonso ya biombelu: bipuidi, madimba, bisanji bia nzadi, bikasa, nsambi, nshiba ne bikuabo, nciombelu kaayi cisombelebo bimbila mfumu, diba didibo bamuteeka mu nkuasa?

12.2.    nCiombelu kaayi cidi cipite bikuabo ku buneme? Kabidi badi mua kuimba biombelu bionso pa bualu buonso patupu ne miaba yonso anyi?

Pa Ciluba cietu

M.7_4-5    lukonko 13.

Ciluba cimpe (1°)

M.7_4-5    lukonko 13.1.

Tatu Kambaja André udi webeja se:

13.1A.    Ku biambilu ebi bibidi : cia ne:"Udi ne bidimu binga?" ne cia ne :"Udi ne bidimu bianga?" cimpe nciepi?

13.1B.    Binga ne bianga bidi biamba bualu bumue anyi mbishilangane?

Ciluba cimpe (2°)

M.7_4-5    lukonko 13.2.

Pa Ciluba cietu

M.7_4-5    lukonko 14.

Mfundilu muimpe (1°)

Wetu Kalala Jean-Pierre wa mu Kizito udi webeja babadi ba Munyaku, badi bashikuluje mfundilu wa Ciluba se:

Tudi tumona bafundi bavule banemekela dileta dia "v" pa kuteeka "m" kumpala, bakuabo pabo badinemekela ne "n". Mfundilu muimpe nnguepi?

Nsumuinu ya bankambua

M.7_4-5    lukonko 15.

Tatu Albert Nkongolo Ciongo, wa mu Cikongo cia Kizito wa Bulenga munu mu Mbujimayi, udi wela nkonko idi ilonda eyi, wamba se:

15.1.    Ciambilu eci cidi cimvuija cinyi: "Muena Ngeleka wa ku biamu biambula bikuabu". Biamu ncinyi? Bivua biambule bikuabu bishi?

15.2.    "Kukenda menu mukendele Bukasa bua Cibangu", mmuomumue ne cinyi?

Bukasa bua Cibangu nnganyi? Uvua wa bena nganyi?

Nsumuinu ya bankambua

M.7_4-5    lukonko 16.

Tatu Kambaja André udi ukonka se:

Tusombele tumvua bamba mu kasala ka bena Kanyiki ne: "Wabashibela mutoke, babanyangana bijimba".

16.1.    Mutoke uvuabo bashipa, uvua mushipeela cinyi?

16.2.    Bijimba ebi mbijimba kaayi?

Pa milambu

M.7_4-5    lukonko 17.

Mua kupita ne milambu (2°)

Tatu Albert Nkongolo Ciongo udi webeja se:

Meme ndi muana'a bute mu diku dietu. Bena diku badi biiya kundambula lupetu lua tatu, pende mucikale ne muoyo, kadi musombele ku musoko wetu. Meme mudie lupetu elu, ciyi mumutuminelu, ndi muenze bibi anyi? Cidi mua kungenzekela ncinyi?

Pa bibidilu bietu bia kabukulu

M.7_4-5    lukonko 18.

Pa dibaka (4°)

Tatu Pascal Kabemba, musombele munu mu Mbujimayi, mmuele pende nkonko eyi:

18.1.    Muntu udi ne bakaji babidi. Dibaka diende ne mukaji wa kumpala e kufua. Panyima yeye kusela mukaji mukuabo muisatu. Nanku tudi mua kuamba se: mukaji muisatu ewu ke mmuadi mpinga anyi peshi ncitumbatumba?

18.2.    Pikalaye muadi mpinga, mu malu a mu lubanza elu, bana bende badi babuela mu mulongo wa bana ba mukalenga muadi uyile anyi?

18.3.    Bana ba cikala'a muadi pabo badi bashala amu ba ku mutu wa lubanza anyi?

Malu maciompakana

M.7_4-5    lukonko 19.

(8) Nsombelu wa bena mabaka lelu

Tatu Kasongo Martin wa ku Katanda udi webeja se:

Mufuki wa dibaka mMaweja; bu mudiye mufuke bintu bionso bisanga nteta. Yeye ufukile mulume kumpala, pashishe kufukaye mukaji, bua se: mbakumbajangane ne benze muntu mujima.

Kadi lelu wa Ndaya ewu, bidi bantu benza mu mabaka abo bidi bilonda lungenyi elu lua Mufuki anyi? Ngandamunayikoko babadi nanyi ba Munyaku.

Pa bibidilu bietu bia kabukulu

M.7_4-5    lukonko 20.

Pa dibaka (5°)

Tatu Katumbayi Emmanuel wa ku Ngandanjika udi webeja babadi ba Munyaku se:

20.1.    Muntu yeye ne bakaji basambombo, kutuadijila ku muinayi, tudi mua kubabikila ne mbanganyi mu lubanza?

20.2.    mBua cinyi mukalenga muadi ne cikala'a muadi kabena mua kusesukila mu nkumba umue?

Pa nsombelu wa mu bantu

M.7_4-5    lukonko 21.

Nsombelu mu diku (2°)

Tatu Oscar Badibanga Nsambuka wa ku Citolo udi wela nkonko eyi se:

21.1.    Suayi nundeje bimanyinu bidi bijadika se: mukaji mmuinyike bayende?

21.2.    Muntu yeye mutute mukaji'a muanende, mmuenze bimpe anyi bibi? Umvuijayiku.

Malu a kabukulu

M.7_4-5    lukonko 22.

Ku Baluba eku (3°)

Pa bukalenga

Mamu Muadi Scolastique wa mu Inera ku Ngandanjika udi wela nkonko eyi ne:

22.1.    Munda mua mukalenga muya kuikala bana ne bapika anyi? Bualu tudi tumvua bamba ne: Bana ba mukalenga muadi ke bakalenga, bana ba bakaji bakuabo mbapika? mMuomo anyi?

22.2.    Bana ba matumba makuabo kabena mua kudia bukalenga muabo anyi?

Pa nsombelu wa mu bantu

M.7_4-5    lukonko 23.

Mu Baluba (3°)

Pa disedibua dia pa mikawu

Mamu Bijika Monique wa ku Citolo udi ukonka se:

Mukaji yeye mufuishe bayende anyi dibaka diende diodio dinyanguke, kadi yeye kupetangana ne mulume mukuabo, musue kumusela, nansha pa bakaji batanu, mbibi anyi?

Kadi padiye ufika mu lubanza, ulaalamu mvula mulongo, udi umvua bakenende bamuela nsenda ne: Mukaji wa cikunda mukole, ndumba wa kale; kavua muanji kupeta to; lelu washishi kupeta. Bakenende aba badi benza bimpe anyi?

Padi dibaka dia muntu diodio difua, kena mua kusedibua ku dibaka dikuabu anyi? Ngandamunayiku bakuetu. Mbintonde bikole.

Malu a kabukulu

M.7_4-5    lukonko 24.

Pa buena nzubu (6°)

Tatu Cikala Dieudonné wa kua Mpemba'a Nzewu udi webeja se: Ku bakaji aba babidi, wa kumpala ne muibidi, udi mua kudianjila kakuna bintu mu budimi bua bayabo nnganyi?

Pa nsombelu wa mu bantu

M.7_4-5    lukonko 25.

Pa mianda ya ditaba (1°)

Tatu Katumbayi Emmanuel udi webeja se:

Basadidi ba Nzambi, bobo basuike dibaka;. kadi umue wa ku bena nzubu aba udi upangila mukuabo, bua kumujimija. Nanku padi bambi basulula dibaka edi, badi ne cilema ku mesu a Nzambi anyi?

Pa nsombelu wa mu bantu

M.7_4-5    lukonko 26.

Pa mianda ya ditaba (2°)

Tatu Kambaja André wa mu Inera udi wela lukonko se:

Bana betu, badi batulomba misangu mivule bua tukudimune ngenzelu yetu, e nanku bupole bubuele mu ditunga dietu.

Kadi ngenzelu itudi mua kukudimuna mine nngenzelu kaayi?

Malu a kabukulu

M.7_4-5    lukonko 27.

Muanetu Albert Nkongolo Ciongo mmuele babadi ba Munyaku lukonko ludi lulonda elu:

Bana betu badi mu njila wa ku Cibombo, badibo babikila ne: mBa mua Lusangu, mba ku luseke kaayi? Lua bakua Dishio, bena Mpuka anyi Bakuanga?

Pa nsombelu wa mu bantu

M.7_6-7    lukonko 1.

M.7_6-7    lukonko 1.1.    busheme ne bululu (1°1)

Muanetu Stéphane Mpoyi Mukendi, musonsodi wa bbtm ku Kenankuna, udi wela lukonko elu ne: Nsombelu wa bena nzubu ku ntuadijilu mmusheme. Kadi bua cinyi ku ndekelu udi wenza ne bululu ?

M.7_6-7    lukonko 1.2.    dibaka ki mbilela to (1°2) (biangata mu cibambalu cia "Njila uyile ...)

Pa nsombelu wa mu bantu

M.7_6-7    lukonko 2.

Tatu Mpoyi Stéphane ewu udi webeja kabidi ne:

Muntu musungula kudi ditunga bua kuakuila bantu, kubalombola ne kubimanyina, mmuakanyine bua kusungudibua mu Ekeleziya bu mukulu wa ciota anyi?

Pa nsombelu wa mu bantu

M.7_6-7    lukonko 3.

Nsombelu mu diku (3°)

Muanetu Jean-Pierre Ciyombo, wa mu Cikongo cia Inabanza mu Mbujimayi, udi wela babadi nende lukonko elu:

Muku, museleshi anyi musedianganyi, udi mua kufila mashi ende bua kuelabo tatuende muenu anyi? Pikalabio mua kuenzeka, bidi mua kulela mukiya wa kulongolola anyi ?

Pa nsombelu wa mu bantu

M.7_6-7    lukonko 4.

Nsombelu ne bakuabo (2°)

Muanetu Citala Jean-Claude, wa mu Kasaka kakulu ka bbtm, udi wela babadi lukonko ludi lulonda elu:

Bua cinyi lelu baledi bavule, bua kuselesha muana wa bakaji, badi balomba lupetu amu mu tubeji tua ndola? Nansha bua mpangu, bidi anu momumue. mBua cinyi ?

Malu maciompakana

M.7_6-7    lukonko 5.

(9) mukana ne mate

Tudi ne nkonko miela kudi Tatu Pius Lukanda Kanyinda, wa ku bakua Kanda, musombele munu mu Mbujimayi:

5.1.    Basombele bamba ne : Muana yeye mubiolele ku dibeela dia mamuende, dibeela edi didi diwula. Ambayi : cidi cifikisha dibeela edi ku diwula ncinyi? Muana udi ne misanda mukana anyi?

5.2.    Muntu yeye mutuile mate pa bunyawu, muminu udi umuwula. Bidi bienzeka nanku bua cinyi?

Pa Ciluba cietu

M.7_6-7    lukonko 6.

Muanetu Mukuna Cimankinda, wa kua Ciaba, udi webeja se: mfundilu muimpe wa miaku idi ilonda kuinshi eku nguepi?

Pa Ciluba cietu

M.7_6-7    lukonko 7.

Pa ngumvuilu wa Ciluba (1°)

Tatu Mukuna Cimankinda ewu udi wela lukonko lukuabo:

Mu Kasayi emu basombele bamba ne: bakaji badi nkongu inayi:

(1°) lua "Cifuana mawu", (2°) lua "Mudie lupemba", (3°) lua "Kadi mbua cinyi" ?, (4°) lua "Angacila pebe pine apu". Nkongu eyi inayi idi yumvuija cinyi?

Pa nsombelu wa mu bantu

M.7_6-7    lukonko 8.

Nsombelu ne bakuabo (3°)

Muanetu Roger Ntambua wa ku Luanga udi wela pende babadi ba Munyaku lukonko elu:

Mu mbanza yetu emu mudi bana bapange mukanda too ne wa "i", baledi pabo bawumanye. Mu imue mbanza payo usangana mulume mumanye mukanda, mukaji muwupange, ne mu mikuabo usangana bana balonge kalasa, tatuabo kayi mumanye mukanda.

Ke padi muanetu Roger webeja se: Cia kuenza ncinyi bua kufikisha bantu aba ku diumvua buneme bua dimanya dia mukanda?

Pa nsombelu wa mu bantu

M.7_6-7    lukonko 9.

Nsombelu ne bakuabo (4°)

Muanetu Kasonga Martin, musombele ku Katanda, udi wela babadi ba Munyaku lukonko wamba ne:

Nsongakaji kampanda muikale mu lufuila lua bayende kabidi mushale ne bana ba nshiye babidi, kuyaye kudi bena diku diabo, bua kulomba diambuluisha. Abo e kumupesha citupa cia mfualanga. Ke nsongakaji kutuadija dienduluka nayo bua kupetela bana ciakudia.

Dimue dituku, yeye ufuma mu cisalu, kututakenaye ne basalayi. Aba kumubambidika bua ashale mukajiabo. Yeye kukandamana muende muonso e kupanga.

Pa bualu ebu, muanetu Kasonga udi ukonka se: Nsongakaji ewu udi mua kupingana kudi babayende cina bua bobo kumulongolola anyi?

Malu a kabukulu

M.7_6-7    lukonko 10.

Muanetu Tuku Félicien wa ku Ngandanjika, mu Kabanda, udi webeja se:

Patudi tufika ku mayi a Kalelu, tudi tumona Manzonzo mikale dia munu dia bakua Mulumba. Kadi mmunyi mudibo bamba mu kasala ka mu Kasansa ne: Kasansa wa ku Manzonzo? Manzonzo aa nga mu Kasansa anyi peshi nga bakua Mulumba ?

Pa Ciluba cietu

M.7_6-7    lukonko 11.

Pa ngumvuilu wa Ciluba (2°)

Tatu Richard Kolela Mukinayi wa ku Lukalaba, ne tatu Kabeya Frédéric wa mua Macici, ku Muene-Ditu, badi beela lukonko lua momumue, bebeja se:

11.1.    Miaku eyi: Cifingu, ndondo, bujilanga, bumuana'a ciota idi yumvuija cinyi? Idi yamba bualu bumue anyi peshi idi yamba malu mashilangane?

11.2.    Kadi padi bantu babikilangana ne: Bulungenyi, mbasue kuamba cinyi?

Malu a kabukulu

M.7_6-7    lukonko 12.

Muanetu Richard Kolela Mukinayi udi webeja kabidi se:

Tudi tumvua bamba ne: Pa kale, bavua baselangana ne kapapa. Kadi cidi muaku ewu kapapa uleja ncinyi?

Pa nsombelu wa mu bantu

M.7_6-7    lukonko 13.

Nsombelu mu diku (4°)

Pa dibenga kuakuilangana mu diku

(Biangata mu cibambalu cidi dina ne: "Bana betu kolayi")

Tuapeci mukanda mufunda kudi mamu Mitongo Alphonsine wa ku Katombe:

Pa nsombelu wa mu bantu

M.7_6-7    lukonko 14.

Nsombelu mu diku (5°)

Mona bualu: nsonga mmutute mukaji'a tatuende

"Mawayawaya ku buina bua cibenda, muana wakabunda bualu, shandi wakadiowa"

(Biangata mu cibambalu cia "Njila uyile ...")

Muanetu François Ngoyi, musonsodi mua Kanyana, mmufunde uleja muanda wa dikema udiye mumone, wamba ne:

Kuvua tatu kampanda muikale ne bakaji bende babidi. Wa kuinshi ukavua mukoleshe bana, muibidi ucivua yeye anu kuulu kule bua musangu wa kumpala.

Dimue edi tatu kuya ku luendu. Mumane kuya, disaama kukuata muana wa kuinshi kua lubanza. Bana betu, umvuayi cilumbu. Muana'a bute wa tatu ewu e kuya kabikila balunda bende ne: Tuyayi muetu, mamu mukuabo mmukuate muakunyanyi ku buloji. Balumiana bafika, kukuatabo mamu e kututa, kuvuula ne bilamba. Pashishe kuambulabo mudilu e kumuosha pambidi. Kadi bana betu, palukila tatu, neapite bishi ne muanda ewu?

Malu a kabukulu

M.7_8    lukonko 1.1.

Muanetu Mutombo Joseph, wa kua Musakaci ku Ngandanjika, udi webeja se:

Ku kale, tuvua tumvua bakulumpe bamba ne: Bana kabena mua kudia mpuku wa mpanga to. Bavua babakandika nanku bua cinyi?

Malu maciompakana

M.7_8    lukonko 1.2.

(10) Pa bilandadi

Tatu Mutombo Joseph, wa kua Musakaci ku Ngandanjika, udi webeja kabidi se:

Nyama yonso idi ilandala panshi bu mudi musodia ne nyoka, idi yela mayi anyi idi ilela bana diakamue?

Pa nsombelu wa mu bantu

M.7_8    lukonko 2.

Nsombelu ne bakuabo (5°)

Mamu Ntumba Thérèse wa ku bena Cimpuma udi ukonka se:

Bua cinyi musoko wetu wa bena Cimpuma kawena wowo ne cisalu? Udi ukonka nanku pa kumona bungi bua ntatu idi bantu ba mu muine musoko ewu bapeta padibo bakasakula ku bena Kabimba; bualu koko eku badi babasuya bikole ne muanda wa disangisha dia bintu.

Pa nsombelu wa mu bantu

M.7_8    lukonko 3.

M.7_8    lukonko 3.1.

Muanetu Mbaya Mununu Léonard, wa kua Musakaci, nyewu wela pende babadi ba Munyaku tukonko tudi tulonda etu:

Patubo bamba ne: «muana'a nshiya utu ukolela mu madilu», mbasue kuamba cinyi? Kabidi, pikala bakulumpe batandangana mu madilu, bafuila bintu, bapanga mua kulubuluja bana pa malu a milambu mu diku, kabena pabo batumpa bana anyi?

Basombele bamba ne: «Bana ba lelu beelele nsuya manyi...» Kadi ba kale mbabangile pa cikondo kaayi, kabidi mbashikidile muaba kaayi? Ne ba lelu pabo…?

Malu maciompakana

M.7_9    lukonko 1.

(11) Pa malu maciompakana

M.7_9    lukonko 1.1.    Mvita ya bena mutumba (11°1)

Tatu Oscar Badibanga Nsambuka, musombele ku Citolo, udi webeja babadi ba Munyaku se: Muena mutumba nyewu ututa muena kuende, wewe kuya bua kubasunga, bua kikadi wavua kumushipa, Mbulamatadi pende wavua kutuasa cilumbu. Kadi utuula anu makasa, awu kukututa muci ku disu, padio kufua. Udi mua kupita bishi ne muena mutumba awu ?

M.7_9    lukonko 1.2.    Wa Kabola (11°2)

Amu yeye tatu Oscar ewu mmusue kumanya ne:  Nyama wa ngandu ne Kabola muntu badi ne bulela kaayi ? Bualu, mu cisa cietu cijima cia Baluba, bantu badi bambilangana ne : Ngandu yeye mukuate muntu, nuenu bamuela diyi ne : Wa Kabola lejakoko, udi upatula cidimba cia muntu pamutu pa mayi. Lungenyi elu ndufume penyi ?

M.7_9    lukonko 1.3.    Mena a meba mu Ciluba (11°3)

Muanetu Edouard Kabeya wa ku Muene-Ditu udi ulomba babadi betu se: Bamufundileku, mu Ciluba, mena a meba, bilondeshila dilondangana diawo mu dituku ne cidiwo umvuija.

M.7_9    lukonko 1.4.

    Tulasa tudiashila ne tua Mbulamatadi (11°4)

Wetu Constantin Kadima Kashikija, musombele ku bakua Cimuna, udi webeja se:  Tudi tumona balongi ba mu cidimu cia ndekelu, cia tulasa tubandile nansha tupuekele, tua mu bilongelu bidiashila, bua kuenzabo mateta a njikijilu wa malonga, anu Mbulamatadi muambe diende diyi. Pashishe, yeye Mbulamatadi ewu mmuvudije mu bilongelu ebi tukiyakiya tupite bungi. Ambayi bana betu, ndishilangana kayi didi pankaci pa tulasa tudiashila ne tua Mbulamatadi ?

Muanetu Sylvano Kabamba wa ku Miabi udi webeja se: Mfumu wa Baluba, mukalenga Kabamba’a Ngomba ka Milemba, baledi bende bavua ne mena kayi ? Yeye muine uvua mumune ngomba ya bungi anyi peshi uvua udia ngomba bikole, bua padiye muangate dina edi dia Kabamba’a Ngomba ?

M.7_9    lukonko 2.2.    Mbuji wa mabuki (8°2)

Mamu Julienne Kalenga, wa mu Cikongo cia bena Cibuabua, udi ukonka ne: Ku misoko, padi muntu mukulumpe ufua, bakulumpe ba ditunga, bana babo ne mufue, badi bambila bana bende ne : Patuilayi tatuenu mbuji wa mabuki. Mabuki aa adi umvuija cinyi ?

M.7_9    lukonko 2.3.    Bana ba Nkashama (8°3)

Wetu Kabeya Frédéric, wa ku Muene-Ditu mua Macici, mmuele pende lukonko ludi lulonda elu: Ntu ngumvua bamba ne: bakua Kande, bakua Ndoba, bena Citolo ne bakua Bowa mmbana ba Nkashama. Kadi civua cifikishe bena muntu aba ku diabulukangana ncinyi? Bobo bine aba, wabo mujilanga nnganyi?

M.7_9    lukonko 2.4.    Bana ba Nkosekela (8°4)

Mubadi wetu, Kalala Jean-Pierre wa mu Kizito, mmuele lukonko lusua kufuanangana ne ludi kumutu elu. Udi webeja se: Kanyana, Citolo, Ndoba, Muembia ne Kapuya wabo mmbana ba Nkosekela. Pashishe tudi tumvua bamba kabidi se: bobo aba mbadie bujilanga. Nanku bana ba muntu umue badi mua kudia bujilanga anyi? Kadi Ndoba udibo bateela ewu, ntatu anyi mmamu ?

M.7_9    lukonko 2.5.

"Mpamba kua Mulandala" (8°5)

Mbeele babadi ba Munyaku lukonko kudi wetu Dieudonné Mutombo wa mu Kasavubu. Udi webeja ne: Pasombela bampamba bimba mu musambu ne: Mpamba kua Mulandala, tudi tumvua diakamue se: batedi ku Kalambayi. Nanku ku Kalambayi ke kupatukile mpamba wa kumpala anyi ?

M.7_9    lukonko 2.6.    Didila muku (8°6)

Tudi ne lukonko luela kudi tatu Cimpanga Dominique, musombele ku Ngandanjika mu Nkolongo. Udi ukonka se: Ku kale, pavua muku uya kadila tatuende muenu, uvua ukeba bangomba. Kadi lelu utudi ewu, muntu yeye muye kadila muku wende mu buena Nzambi ne tungimba tua mu Ekeleziya, mmuenze cilema anyi?

M.7_9    lukonko 2.7.

"Ntumba Keta ku Muene-Ditu" (8°7)

Tatu Jean Constantin Kazadi wa mu Cikongo cia Inabanza wa mu Lourdes, munu mu Mbujimayi, udi ukonka se: Pasombelabo bamba ne: "Newudikonke, bu Ntumba Keta ku Muene-Ditu", mbasue kuamba cinyi ? Ntumba Keta uvua nganyi ? Civuaye muenze cine ncinyi?

M.7_9    lukonko 2.8.

Kafidila ka mbuji wa buledi (8°8)

Mutufundidi wetu Kabeya Frédéric, wa ku Muene-Ditu, udi ukonka babadi se: Pa kale, cilele cia difidila muana wa bakaji mbuji wa buledi civuaku anyi ? Kafidila ka muine mbuji ewu kavua bishi ? Ncisamba kayi cia Baluba cituadijile muine muanda ewu ?

M.7_9    lukonko 2.9.    Dipiana mukaji (8°9)

Mubadi wetu Cimpanga Dominique, wa ku Ngandanjika, mmuele babadi lukonku elu ne: Muntu udi mua kupiana mukaji’a muakunyiende nansha wa mansebende anyi ?

M.7_9    lukonko 2.10.    Nkonko mishilangane (8°10)

Tatu Florent Kashimba, wa ku Ngandanjika, udi webeja bakulumpe nende. Nkonko yende nyoyo eyi:

M.7_9    lukonko 2.10.1.    Malu a Manda Kampema: Cikondo citufumine kua Mulopo Kasonga, Manda Kampema uvua bujike anyi uvua ne mukaji ? Pikalaye muselangane, uvua ne bana bungi munyi ?

M.7_9    lukonko 2.10.2.    Musangana wa bena Manda: Muine muaba udi bena Manda baase ewu, bavua basanganepu bantu anyi peshi pavua anu cipeela ? Nenku musangana wa bena Manda nnganyi ?

M.7_9    lukonko 2.10.3.    Muanda wa Bakwa Malaba: Bakua Malaba ba bakua Kalonji ne bakua Malaba badi kua Manda, tudi tumvua bamba ne: mbantu bamue, kabaya kuselangana. Kadi cidi cibafikishe ku diabulukangana ncinyi ?

Tatu kampanda uvua mupiane mukaji’a muanabo, e kulelaye nende bana babidi ba balume. Bana aba bakola, yeye e kubaselela. Kadi, bua padi tatu ewu kayi mulele muana wa bakaji; cienzaye ncinyi bua mulambu wa mayi a munda ?

M.7_9    lukonko 2.11.

Muanda wa Bena Kayembe (8°11)

Tudi ne lukonko luela kudi wetu Musangu Cidinda, musombele mu Inera ku Ngandanjika, udi ukonka se: Bena Kayembe ba bakua Kalonji ne bena Kayembe ba kua Mpiana, mbantu bamue anyi peshi mbisamba bibidi bishilangane ?

M.7_9    lukonko 2.12.

Nkonku ibidi pa malu a bisamba (8°12)

Muanetu Dieudonné Mutombo Kokola, wa mu Kasavubu, mmuele nkonko yende: nYoyo eyi:

Mu kasala ka bena Nshimba, basombele bamba ne: “Nshimba Cikole mujilanga”. Kadi tuetu tudi bamanye se : Cikole eci cidi mu bakua Mulumba. Nanku bena Nshimba aba badi ne mfuki wabo mu bakua Mulumba anyi ?

Padibo bamba bena Ciaba ne : mBasangana ba bakua Kalonji, mbasue kuamba ne: Bakua Kalonji, pafuminebo ku Nsanga’a Lubangu, bavua basangane bena Ciaba bamane kuasa anyi ? Pikalabio nanku, mmunyi mudibo mua kubabikila ne mbakua Kalonji ? (NB. Tangila kabidi lukonko luela pa ndelanganyi ya Kalonji Milabi: M 8_9 : lukonko 6 )

Pa diashila mamu nzubu (8°13)

Muanetu Dominique Cimpanga mmukonke babadi ba Munyaku muanda udi ulonda ewu: Tatu yeye mufue, e kupianabo mukajiende kudi muanabo; kupita matuku mulongo, uvua mumupiane ewu e kumuipata. Nenku, bana ba mawu ewu, bavuaye mulele ne bayende wa mu kabandu ufuile, badi mua kumuashila nzubu mu mbanza yabo nansha kumusumbila cilamba cia kuvuala anyi ?

Tatu Kasonga Martin wa ku Katanda, udi webeja se: Mudiambike wa Maweja, yeye muledibue mu diku didi ne mishika ya bungi, badi mua kumulambula mulambu anyi ?

M.7_9    lukonko 3.2.    Pa diselangana (3°2)

Tudi ne lukonko luela kudi tatu Odia Robert, wa mu Kabanda ku Ngandanjika. Ludi nunku: Muana yeye mulambule tatuende mbuji ne nzolo bia ku mudimu wende, tatu e kubiteeka panshi, pabio kulela, e kuvulangana. Ku diambuluisha diabio, tatu kuselaye mukaji mukuabo, e kulelabo nende muana wa bakaji. Kadi ambayi tung’, paselabo muana ewu, tatu neafile biuma bia mulambu kudi muanende uvua mumulambule pende mbuji ne nzolo anyi nealambule muntu mukuabo ?

M.7_9    lukonko 3.3.

Nkonko mikuabo ibidi (3°3)

Tatu Léonard Mbaya wa kua Musakaci udi ukeba butoke. Nkonko yende idi nunku:

Kuetu, bua kudikuula ku bupika bua milambu ya mu diku, muntu uvua usela mukaji muibidi, bua se: Bana banyi kabashadi ku bupika bua nzubu uvuaye yeye ukalambula milambu to. Kadi mmunyi mudi bana, bamane kusulula ku buine bupika ebu, batungunuka pabo lelu ne disela bakaji bibidi ?

Wa kulambula nnganyi?

Bana betu, mmu diku kayi, nansha cisamba kayi, mukadiku lupetu lua mulambu lupanga wa kululambulabo ?

Pa Ciluba cietu

M.7_9    lukonko 4.

M.7_9    lukonko 4.1.    Ngumvuilu (3°1):

Ku Kabeya Kamuanga, mbatufundile kudi tatu Stéphane Mpoyi Mukendi. Udi ulomba babadi nende diumvuija dia miaku idi ilonda eyi:

    ► Kusela ne bundu,

    ► Kulela ne bundu,

    ► Kubenga kulela ne bundu,

    ► Kuyukila ne bundu,

    ► Kuikala mubanji ne bundu,

    ► Kuikala mulanda ne bundu,

    ► Mufule bu dishi,

    ► Lumu katuidi mukosu, ludi anu ne walu udilu lulumba,

    ► Wapita badia kupici balumbulula,

    ► Cishibeele kabotubotu mmvula wa mudimbi ?

M.7_9    lukonko 4.2.    Ngumvuilu (3°2):

Tatu Dominique Cimpanga, wa ku Ngandanjika, udi ukeba  diumvuija dia miaku idi ilonda eyi:

    ► Ina’a banza,

    ► Ilunga’a Mbiya,

    ► Ina’a muana ?

M.7_9    lukonko 4.3.    Ngumvuilu (3°3):

Tatu Stanislas Mbaya, musombele mu Cikama, udi ujinga pende

 diumvuija dia miaku eyi:

    ► Bualu bua munda kuambidi mukajiebe,

    ► Kudi bulunda ne mpulushi,

    ► Katenda kateyateya kuteyi?