Mandamuna

2002

02A

Milambu ya kabukulu

Mua kupita nayo lelu (4°)

M.6_10    lukonko 1.1.

M.7_1-2    diandamuna 1

Ku lukonko luela kudi muanetu Mbaya Yemeya wa ku Kaseki, pa cilumbu cia muntu uvua mulambule muanabo ndola 400; tudi bapete mandamuna kudi betu aba:

Tatu Célestin Cilombo wa ku Kenankuna ne Symphorien Mukendi wa ku bakua Mulumba, mbandamune, baleja se:

Padi muana wa mukulumpe mudi wa mulambu yeye muselangane ne biuma ebi, kadi citupa cikuabo cia biuma ebi e kushala, musedianganyi enze nacio mudiye musue, bualu bikadi bintu biende.

Tatu Crispin Cimanga wa mu bena Cibuabua, Tshiamanga Nkashama wa ku bena Cimpuma, Mpoyi Constantin wa ku bena Mpunga, Nkongolo Albert wa mu Kizito, Musenga Patrice wa ku Citolo, Maweja Crispin wa mua Macici ku Muene-Ditu ne Félicien Kazadi wa ku Ciala, mbandamune baleja se: Ndola idi mishala eyi nya tatu uvuabo balambule ne muanende udiye muselele.

Tatu Honoré Kabongo wa ku Miabi udi wamba yeye se: Lukonko elu luvua ne buteyi munda mualu. Ndola eyi kayena itangila kabidi mulambudianganyi to, ikadi ya bende ya uvuaye mulambule; yeye ke udi mumanye muapitaye nayo.

02B

Milambu ya kabukulu

Mua kupita nayo lelu (4°)

M.6_10    lukonko 1.2.

M.7_1-2    diandamuna 2

Pa milambu mu bumpianyi ne mu kabandu

Tudi bapete mandamuna a kudi betu aba:

Tatu Maweja Crispin, Céléstin Cilombo ne Mpoyi Constantin, badi baleja se: Tatu yeye mulele bana ba mu bumpianyi, pashishe yeye kudiselela mukaji mukuabo e kulela ba mu kabandu, padiye ufua, bana ba mukaji udiye mudiselele awu ke badi ne bukenji bua kuakidila milambu ya kudi bena diku.

Muanetu Félicien Kazadi ne Tharcisse Ciamanga badi baleja se: bana ba mu bumpianyi ke badi ne bua kuakidila milambu ya bena diku; bualu bobo ke bakulumpe.

Wetu Albert Nkongolo Ciongo udi uleja se: bana ba mu bumpianyi mbakulumpe ku dimona diba, ba mukaji mudiselela mbakulu mu diku. Nanku bobo aba ke badi ne bukenji bua kudia milambu idi ifuma kudi bena diku.

Tatu Crispin Cimanga udi wamba pende se: pikala tatu uvua mupiane mukaji, mumuteke kuinshi kua lubanza, diba adio milambu ya bena diiku idi ituudila kudi bana ba kuinshi eku. Kadi pikalaye muteke wende udiye mudiselele bu mukalenga muadi, diba adio milambu idi iya amu kudi bana ba muine ewu. Bualu muana wa kuinshi kua lubanza, nansha mulela panyima pa bakuabo ba ku mutu, udi anu kumpala kuabo.

02C

Milambu ya kabukulu

Mua kupita nayo lelu (5°)

M.6_10    lukonko 2.1.

M.7_1-2    diandamuna 3

Tudi bapete mandamuna a kudi betu aba:
Tatu Ciamanga Nkashama ne Jean-Pierre Kalala, bamba ne: Bua mulambu wa cisululu, muntu udi ufila mbuji ne nzolo kudi mukulumpe udi ne bukenji bua kumuela lupemba.

Tatu Kazadi Félicien udi usakidila se: Muntu udi mua kufila dikalu nansha cilamba ne mfualanga mitentekapu.

Tatu Albert Nkongolo, Honoré Kabongo ne Crispin Maweja badi baleja pabo se: Bua mulambu wa cisululu, muntu udi ufila cidiye nacio bilondeshila mudimu udiye wenza. Cilejilu: Cidima udi mua kulambula bia pa madimi, muena mudimu pende udi mua kulambula difutu diende dia mbedi.

02D

Milambu ya kabukulu

Mua kupita nayo lelu (5°)

M.6_10    lukonko 2.2.

M.7_1-2    diandamuna 4

Tatu Mpoyi Constantin, Albert Nkongolo, Félicien Kazadi ne Crispin Maweja mbafile mandamuna mushindu wa muomumue, bamba ne: Udibo balambula mulambu wa cisululu udi ufila pende nzolo wa ditokesha nende mulambudi kuisu. Pikalaye muntu wa muoyo mulenga, udi mua kutapa mbuji, bilondeshila cidibo bamulambule.

Tatu Tshiamanga Lumina udi uleja se: Pikala mulambudi mudiselele, udi uya ne mukaji kudi mukulumpe, mbuji ne nzolo bitentekapu. Mukulumpe udi wela mukaji lupemba, umualuja kudi muenaye, ushala ne mbuji ne nzolo.

Anu yeye tatu Lumina pamue ne Kalala Jean-Pierre badi basakidila, bamba ne: Udibo balambula udi wangata wende nzolo, usanga ne wa mulambudi, wakula nayo ku diba dia dilolo, pakadi panshi patalale. Padibu bucia, udi wawula cilota, ushipa nzolo eyi, wipikisha nshima. Pashishe udi wela mulambudi lupemba. Panyima pa ebi, e kudiabo nshima.

Tatu Félicien Kazadi udi usakidila wamba ne: Mu buena Nzambi, bamue badi bakoma muanda ewu ne disambila.

Tatu Honoré Kabongo pende udi wamba ne: udibo balambula kena ne cia kuenza to.

02E

Nsombelu wa mu bantu

Pa buena Kristo buetu (1°)

M.6_10    lukonko 3.2.

M.7_1-2    diandamuna 5

Bua mapengama a bamamu

Bana betu aba, Célestin Cilombo, Tharcisse Tshiamanga, Albert Nkongolo Ciongo, Félicien Kazadi, Maweja Crispin, Jean Pierre Kalala ne Mpoyi Constantin, badi bamba ne: Padi bamamu baya mu mapengama a matuku mulongo, bashiya midimu yonso ya nzubu kudi babayabo ne bana, badi benza cilema. Ngenzelu ewu, nansha ku tototo, nansha ku ndandanda, wadiakulela bipupu bivule mu mbanza. Kabidi kena umvuangana menemene ne Muaku wa Mvidi Mukulu to.

Pa nanku bonso badi bafile mandamuna aa, badi balomba bamfumu ba Ekeleziya wetu, bua batangileku muanda ewu biakane, patucidi ku nsensa apa, bualu bamamu banekeshi.

02F

Pa bibidilu bietu bia kabukulu

Ku Baluba eku (10°)

M.6_7-8    lukonko 14.3.

*tangila: M.6_10: diandamuna 13 (01III)

*tangila: M8_6-7: d25 (03SSS)

M.7_1-2    diandamuna 6

Bilondeshila Lukonko luelulula kudi Munyaku pa muanda ewu wa cizaka, lua se: Nuenu babadi, nudi mua kutandulaku ciledi cia lungenyi lua cizaka ne kipacila kalu anyi?

Tatu Tharcisse Ciamanga mmuandamune wamba ne: Kenzela ka cizaka kudi bamamu kadi anu ka kuinyika tatu mpala panshi, bua kikadi ne diyi dia bukokeshi mu nzubu to. Tatu Lumina udi wamba kabidi se: meme nkadi mudimukile bantu abo, nuenu penu nuadimukayi.

- Muanetu Crispin Maweja wa ku Muene-Ditu udi uleja pende se: Mu diiku kampanda muvua mujuke bilumbu bivule, bua pavua mamu mukunguishe mu mutu; bualu bapakishi ba cizaka basombele ne cibidilu eci. Pashishe muanetu ewu udi usakidila miaku mikuabo, wamba ne: Kenzela ka cizaka kadi mubidi, kadi musatu. Bamamu bavule bavua benza bualu ebu bua kulama mulume kumbelu, bua kikadi wenda ulalakana mu ditunga to. Kakuabo kenzela nka se: mamu ne bayende bikale anu babidi mu dibaka diabo. Ka ndekelu nka se: Mulume atutubile, kikadi kabidi ne diyi mu lubanza nansha.

02G

Nsombelu wa mu bantu

Pa buena Kristo buetu (1°)

M.6_10    lukonko 3.3.

*kt. M.7_3    diandamuna 1

M.7_1-2    diandamuna 7

Muanetu Kabongo Kabangula wa ku Miabi ne Cimanga Nkelende wa mu bena Cibuabua badi bamba ne: Mpekatu ne cibindi mbifuanangane, kabidi bidi biamba bualu bumue. Padi muntu utupakaja mukenji muela, mmuenze bubi; diba adio mmubunde cibindi.

Kadi tatu Lumina udi wamba ne: Mpekatu ne cibindi mbintu bibidi bishilangane. Mpekatu udi ufuma ku dienza bualu bubi, ku dijinga dibi anyi ku dialakana. Kadi cibindi ciocio cidi cifuma ku divuambula muntu unudi nende ne buku anyi ne bulela bufuanangane ne buku.

Cilejilu: muana mupende muledi ncibindi; muntu muakule miaku ya bundu kumpala kua mamuenende, anyi nsongakaji muluishe tatuende muenu, cidi anu cibindi.

02H

Nsombelu wa mu bantu

Pa buena Kristo buetu (1°)

M.6_10    lukonko 3.3.

*kt. M.7_1-2    diandamuna 7

M.7_3    diandamuna 1

Tudi ne mandamuna a kudi betu aba :

Placide Kabangu wa ku Kalenda-Kashile, André Nzengu wa ku Kabeya Kamuanga ne Cimanga Nkelenda wa mu bena Cibuabua; mbandamune bamba se :

Mpekato ne cibindi bidi biamba bualu bumue. Cibindi anyi mpekato se mbubi buonso budi muntu wenza.

02I

Nsumuinu ya bankambua

ngumvuilu (3°)

M.6_10    lukonko 4

M.7_3    diandamuna 2

"Muana wa Nkanga kabula katoba"

Tatu Ciamanga Lumina, Cimanga Nkelenda, Musenga Patrice wa ku Citolo ne Maweja Crispin wa ku Muene-Ditu, mbandamune mushindu wa muomumue bumvuija se :

"Cikela kacisombele cilela lukulu to". Muana udi upiana ngikadilu ya tatuende anyi ya mamuende.

"Kana ka nyoka kadi ne luaku lulengu".

Tatu André Nzengu mmufile diumvuija edi : Muana mutekete utu pende wafika munda.

Tatu Cimanga Nkelenda mmumvuije yeye se : Muntu yonso udi ne buende bubi.

02J

Malu a bankambua

Pa tusala ne misambu (1°)

M.7_1-2    lukonko 1.1. ne 1.2.

M.7_3    diandamuna 3

"Wa mu lushiba lua Ciunza wa Ciunza, mudi lushiba luika milungu kuinshi…"

Tatu Tharcisse Ciamanga wa ku bena Cimpuma udi umvuija se : mu Cilenge muvua lushiba lunene, luvua luenda lumu. Kadi pavuile batoka kuasa ngaala wa mashinyi, ke bamamu kuciompokabo, e kuambula ditunga mu mutu.

" Mu kendi mbuji mu Cibombo"

Tatu Lumina Ciamanga mmumvuije se : muaku mbuji udi uleja bantu ba muoyo mutoke anyi bajindu.

"Muendenda nyunyi mikoko"

Tatu Lumina Ciamanga udi umvuija se : nyunyi mikoko mbakole (baloji).

02K

Malu a bankambua

Kumanya mianda ya bisamba (2°)

M.7_1-2    lukonko 10.

M.7_3    diandamuna 4

Mu Bakua Kalonji

Ku lukonko luela kudi tatu Kazadi Badibanga wa ku Lukalaba bua kumanya misoko ya bakua Kalonji, idi ne bamfumu ba bitadi, tatu Albert Nkongolo Ciongo wa mu Kizito udi uleja se :

Mu bakua Kalonji mudi musoko amu umue, wa bena Kabeya Nkongolo, udi ne bukalenga bua citadi : ke bena Kayemba, bena Mukendi ne bena Kalala.

Tatu Ciamanga udi wamba yeye se : Badi ne bukalenga bua citadi mu bakua Kalonji badi anu bena Lukusa lua Mbuyamba ne bena Kabeya Nkongolo. Munda mua bine babidi aba, Lukusa ne Kabeya, mudi nzubu mishilangane.

02L

Nsombelu wa mu bantu

Muanda wa difuta dia tulasa

M.6_10    lukonko 5

M.7_3    diandamuna 5

Tulasa mpa kudila wa ciula anyi?

Muanetu Liévin Kanyinda wa ku Cilundu ne Placide Kabangu wa ku Kalenda-Kashile mbandamune se : Tulasa ki mpa kudiila wa ciula to. Mu bualu ebu Mbulamatadi wetu udi ne dibanza dia kuakaja bidi binyanguke ne kufila bulongolodi bujalame.

02M

Nsombelu wa mu bantu

Pa buena Nzambi (2°)

M.6_10    lukonko 6

M.7_3    diandamuna 6

Tatu Liévin Kanyinda udi wamba ne : Bambi ba mafi, badi babudika lelu ewu, badi batatakaja bantu bikole. Mvidi Mukulu yeye, bua padiye mumanyi wa bionso, udi ne wende mushindu udiye wondopa bantu bende. Bidi bambi aba benza, bikale badingila Nyuma wa Nzambi, mbia patupu.

Tatu Ciamanga Lumina wa ku Bena Cimpuma udi usakidila pende se : Bantu badi badingidija malu mushindu ewu, bafuisha binabo, mbakanyine cibawu.

02N

Pa Ciluba cietu

Ngakuilu muimpe

M.6_10 : lukonko 7.1-2-3

M.7_3    diandamuna 7

1. Pa ciambilu cia ne : Ntu ngikalangana ku Mbujimayi

Muanetu Liévin Kanyinda udi uleja se : Muntu udi wamba ciambilu cia nenku, udi unyanga muakulu. Ciluba cijalame cidi ne : ntu ku Mbujimayi, ndi musombele ku Mbujimayi, anyi ne: nkuetele ku Mbujimayi.

2. Pa biambilu bibidi ebi:

            - Mu difika diende panu, Yezu udi ututumina bupole ;

            - mu difika diende panu, Yezu udi utuadila bupole.

Tatu Ciamanga udi wandamuna se : Ciambilu cimpe ncia se : Yezu udi ututuadila bupole.

3. Pa miaku eyi : kakunduluila, nkankunduluila

Tudi bapete mandamuna abidi mashilangane.

Tatu Ciamanga udi uleja se : Muaku kakunduluila ke Ciluba cijalame.

Tatu Cimanga Nkelenda wa mu bena Cibuabua udi wamba se : muaku nkankunduluila ke Ciluba cijalame.

02O

Nsombelu wa mu bantu

Mu Baluba (°)

M.6_10    lukonko 8

M.7_4-5    diandamuna 1

Tatu Liévin Kanyinda Nkese, musombele ku Cilundu, mmufile diandamuna didi dilonda edi:

Tatu yeye musampulule kalamba ka muinshi kumpala kua bana bende, bidi bienza bundu. Kadi nansha biobio nanku, bualu ebu ki ncibindi to. Kadi muana yeye mutute muledi bua muine ngenzelu ewu, udi upia cibindi, bualu mmudiatakaje mukenji wa Mvidi Mukulu ne wa bankambua.

02P

Pa nsumuinu ya bankambua

Ngumvuilu (1°)

M.7_1-2    lukonko 3.1.

*kt M 8_6-7: d1

M.7_4-5    diandamuna 2

"Kuakaya Nkola kuakashikila"

Tatu Benoît Ilunga ne Dismas Mukudi ba ku Ngandanjika ne tatu Ciamanga Lumina wa ku bena Cimpuma, mbandamune bamba ne:

Nkola mmuntu udibo bakanda ku malu kayi umvua, wenza amu cidiye musue. Kabidi padibo bamubela kena uteleja. Nanku, diba didiye ukatutakena ne malu mamupite bukole, udi ushisha kuvuluka bionso bivuabo bamuambilambile. Ke bakulumpe ne: Kuakaya Nkola, kuakashikila

02Q

Malu a bankambua

Kasumu

M.7_1-2    lukonko 5.

M.7_4-5    diandamuna 3

Wetu Benoît Ilunga ne Dismas Mukudi mbumvuije ciambilu eci ne:

Mua Kanyiki tuanda mmuntu mujima, kadi cibidilu ciende cibi ke cidibo bamupeela dina edi dia mu nsenda. Cilema ciende cinene ncia dilola dia mianda ya bende.

Tatu Ciamanga Lumina udi wamba pende se: Mua Kanyiki tuanda mmuntu uwudi kuyi mua kuambila muanda webe wa munda to. Bualu udi wimana apa e kusansa, wimana papa e kusansa.

02R

Milambu ya kabukulu

Mua kupita nayo (1°)

M.7_1-2    lukonko 8.

M.7_4-5    diandamuna 4

Benoît Ilunga ne Dismas Mukudi badi bamba ne:

Mbimpe baledi ba nsongakaji baluje bintu bionso bivua nsongalume mufile, nansha kamue kakashadi to. Bualu muanabo ke udi mubenge dibaka ku bukole.

Ciamanga Nkashama mmumvuije pende se:

Bu mudi muana wa bakaji mubenge dibaka ku bukole, tatuende alujile muku wende bintu bionso bidiye mufile. Kadi pikala nsongalume mumane kuendela pa mbuji wa nyima, nanku kabena bamupingajilaye to.

02S

Pa bibidilu bietu bia kabukulu/milambu

Pa dibaka ne buena nzubu (2°)

M.7_1-2    lukonko 7.2.

M.7_4-5    diandamuna 5

Tatu Tharcisse Ciamanga mmuleje se:

Bua aba badi basombe nanku, padibo bafika cikondo cia kuselesha wabo muana, mbimpe bangate lupetu lua muanabo awu, bakapeshe tatuende wa mukaji, pa mutu pa lupetu luvuaye mua kudiila wende muana. Kubenga kuenza nanku, nkudikebela bilumbu bidi kabiyi mpuilu.

02T

Pa bibidilu bietu bia kabukulu

Pa dibaka ne buena nzubu (2°)

M.7_1-2    lukonko 7.1.

M.7_4-5    diandamuna 6

Tatu Benoît Ilunga ne Dismas Mukudi mbafile diandamuna edi:

Mikalu ya bena nzubu idi ifumina ku malu mabi adibo benzelangana. Tatu ubenga bubi budi mamu wenza, mamu pende ubenga bubi budi tatu wenza. Nenku padi umue wa kudibo upatakana ne mianda yonso eyi, udi mua kukosa mikalu.

Tatu Ciamanga Lumina udi wamba pende ne:

Mikalu ya mu nzubu nansha ya mu meku idi ifuma ku dipalangana bintu, bu mudi mpetu ya mishika; ku matandu mashilangane nansha ku dibengangana dia mu nzubu; kabidi ne ku amue meyi mabi, bu a ne: Wewe ne meme, anu bangase munu apa.

02U

Malu maciompakana

kumanya malu a bisamba (2°)

M.7_1-2    lukonko 11.2.

M.7_4-5    diandamuna 7

Tatu Tharcisse Ciamanga udi wandamuna se:

Mfumu yeye mufue, muanende udi bujika kena mua kupiana bukalenga to, bualu bukalenga batu babulambila. Kadi pikalaye kayi ne mukaji, benyi bobo bamukuata bufuku, wabalambila nnganyi? Diba adio badi mua kupiana bukalenga kudi tatuende mukuabo ta muanabo wa mu diku.

02V

Pa bibidilu bietu bia kabukulu

Pa dibaka ne buena nzubu (1°)

M.7_1-2    lukonko 6.1.

M.7_4-5    diandamuna 8

Tatu Ciamanga Lumina mmuandamune se:

Ku kale, bu muvuabo bamba mukaji ne: mmupika, ke pavuabo bamuenzeja bua kulaala mu lufuila cidimu cijima. Cidimu cimane kujika nanku, bavua bamupiana. Kadi bua bakaji ba lelu kabiciena nanku to. Bobo bakadi ne dipanda. Bakadi bamba ne: Padi mulume mufue, mukaji kena kabidi ku mikenji nansha. Ke mukadibo badienzela malu abo nanku.

02W

Nsombelu wa mu bantu

Nsombelu ne bakuabo (5°)

M.6_7-8    lukonko 17

Bena dialakana dia mubidi mbena diakabi

M.7_4-5    diandamuna 9

Pa muanda wa tatu uvua muende ne mukaji wa muena mutumba nende, tatu Fortunat Ntanga wa mua Mpemba'a Nzewu ku Ngandanjika, mmumvuije ne: Dilongolola dia muanda wa nenku divua dienzeka bilondeshila bisamba ne bibidilu bia bantu:

- bamue bavua bafuile mukaji luse, usomba bua bana;

- bakuabo bavua bamufucisha cibawu, usomba;

- bakuabo bavua bashipa dibaka, e kuipata mukaji kashidi;

- Aba pabo bavua bashipa bena cilema bonso babidi anyi bashipa mukaji nkayende.

Nanku, bana betu, tumanye se: Bubi buonso budi bulela lufu. Mbimpe tubunyeme, bu mutusombele tunyema nyoka. Cikole tuvuluke se: Kristo mulongeshi munene mmutubele bua tufuile muena bubi luse.

02X

Pa bibidilu bietu bia kabukulu

Pa dibaka ne buena nzubu (3°)

M.7_1-2    lukonko 14.

M.7_4-5    diandamuna 10

Tatu Ciamanga Lumina mmufile lungenyi, uleja se:

Tatu udi muangate mukaji e kuangata ne muakunyiende amanye ne: mmuenze bibi; kabidi ne: eci ki ncibidilu cietu cia Baluba to. Bidi bikengela bua babasange pa kubatuangaja makasa.

02Y

Pa bibidilu bietu bia kabukulu

Pa dibaka ne buena nzubu (1°)

M.7_1-2    lukonko 6.2.

M.7_4-5    diandamuna 11

Bilondeshila mishindu ya mabaka ivua miteela ku tudiomba cikondo kampanda, tatu Ciamanga Tharcisse udi umvuija se:

Kalaba kakunze nki dibaka to, nansha kakese. Kalaba kakunze i mmbuji wa kapianyina, udi bana babo ne mukaji balomba kudi muntu udi mumupiane.

02Z

Nsombelu wa mu bantu

Nsombelu wa bena nzubu (4°)

M.6_10    lukonko 9

M.7_4-5    diandamuna 12

Tatu Liévin Nkese wa ku Cilundu udi ufila mubelu udi ulonda ewu ne:

Bana betu, bakulu bambile se: "Kulekela buebe buina, e kuya kabuela ku bua cituuya". Mulopo mmupeshe mulume wende mudimu musunguluke ne mukaji wende pende musunguluke. Bamamu badi kuulu kule mbimpe kubafila ku nzubu idi mua kubambuluisha bimpe ku dilela. Nenku, padi bamanyi bashikuluke ba mudimu ewu bikaleku, dibuejakaja malu didi difuma ku cinyi?

02AA

Malu maciompakane

Pa bintu bia bumpianyi (1°)

M.7_1-2    lukonko 12.

M.7_4-5    diandamuna 13

Pa muntu mushile mukajiende bintu bionso

Pa muanda wa tatu uvua mushiile mukajiende bintu bionso, Tharcisse Ciamanga mmuambe ne: Tatu ewu ki mmuenze bimpe to; mmutupakane bikole. Kadi mbimpe kulondesha ne kumanya muvua nsombelu wende ne bana babo.

Kadi nuenu babadi betu, nudi bumvue penu bishi bua diandamuna edi?

02BB

Milambu ya kabukulu

Mua kupita nayo lelu (6°)

M.6_10    lukonko 10

M.7_4-5    diandamuna 14

"Mudi wa mulambu lekela madiaka"

Tatu Liévin Kanyinda Nkese, musombele ku Cilundu, mmufile butoke wamba ne:

Mudi wa biuma udi ne cia kuakidila muana wa bakaji ne babayende, bualu mbenyi bende. Udi ne cia kubapa nshima, maala ne bikuabo bionso. Kena mua kunana tatuende wa nsongakaji bintu bidisha baku nansha.

Bua aba badi kabayi pabuipi ne mudi wa mulambu, tatuende wa nsongakaji udi wakidila baku. Diba adio didia ne dinua diabo didi anu mu makuta adibo bafila aa. Nanku adi ashala, udi uatumina muenawo.

Tatu Kabengela Celeka wa ku Ngandanjika mmuandamune pende se:

Bu muakunyi udibo baselela kudi mukuluende mumone se: mukuluende ewu mmuntu wa muoyo mulenga, bualu mmumutemeshile mudilu, yeye uvua ne bua kuakidila baku bende, kubabueja mu nzubu. Pashishe kuangata muana ne babayende e kubatuma kudi mukuluende, bua atue citungu cia buku.

02CC

Malu maciompakana

Pa bintu bia bumpianyi (2°)

M.7_1-2    lukonko 13.

M.7_4-5    diandamuna 15

Tatu Ciamanga Lumina mmuandamune ne:

Padi mufue yeye mubenge ne bintu biende, bana babo badi mua kubenga pabo bua kudidisha madilu ende. Kabidi muntu kena mua kupiana bintu bia muanabo ku bukole to. Bualu yeye mubiangate ku bukole, udi mua kupanga tulu mu nzubu.

02DD

Malu a bankambua

Kumanya mianda ya bisamba (1°)

M.7_1-2    lukonko 9.

M.7_4-5    diandamuna 16

Tatu Ciamanga Tharcisse mmuandamune ne:

Mfuki wa bantu bonso aba mMulopo Kasonga. Kuende ke kudibo bafumine. Muaba udibo awu ke muabo mubalela.

02EE

Malu a bankambua

Pa tusala ne misambu (2°)

M.7_1-2    lukonko 3.2.

kt*M7_9: d2

M.7_4-5    diandamuna 17

Tatu Ciamanga Lumina mmuandamune ne:

Kasambu aka bavua bakimba diba divuabo bambule mfumu pa cipoyi ta pa mikolu, bua kumufikisha mu musoko kampanda.

Pavuabo bafika nende kuvuaye uya, kabavua bamutula diakamue panshi to. Bavua batungunuka ne kuimba kasambu aka, basesa, batua kumpala batua panyima. Bavua bamutuula panshi anu pavua bena muaba awu babapesha kantu ka mutuulu.

02FF

Malu a bankambua

Pa tusala ne misambu (3°)

M.7_1-2    lukonko 15.

M.7_4-5    diandamuna 18

Tatu Ciamanga Tharcisse mmuandamune ne:

Mamu wa kumpala udi wimba bimpe; mamu muibidi mmulongeshi mubi menemene; mukaji muisatu yeye mmupotele mamuenende ku ndekelu kua kasambu kende.

02GG

Pa bibidilu bietu bia kabukulu

Ku Baluba eku (4°)

M.6_7-8    lukonko 4.3.

M.7_4-5    diandamuna 19

Tatu Emmanuel Katumbayi wa ku Ngandanjika muandamune se:

Udi muenze bimpe mmuana udi mufike ku madilu, nansha kayi ne kantu ka kuadidisha nako.

02HH

Pa bibidilu bietu bia kabukulu

Mua kupita nabio lelu (1°)

M.7_1-2    lukonko 2

M.7_4-5    diandamuna 20

Tatu Mukudi Dismas ne tatu Ilunga Benoît ba ku Ngandanjika, mu Kabanda, mbandamune ne:

Kale, kumpala kua muntu kuasaye nzubu mupiamupia, uvua wanji kukuata cibanza ne mukalenga muadi wende. Bamane kuasa nzubu, bavua badia nshima ya dibanji bilondeshila kabukulu ketu. Kadi bua bena lelu, disambila pamue ne dibenesha dia nzubu kudi Musadidi mukulu mbimane mukiya wonso.

Tatu Ciamanga Tharcisse wa ku bena Cimpuma udi uleja yeye se:

Pa bankambua betu, muntu uvua uya ne mukalenga muadi muaba uvuaye musue kuasa nzubu. Mamu ewu uvua ushipa kazolo, wipika nshima, udia. Tatu kavua udia nshima eyi to. Pashishe buupuila cisuku anu pinapu. Panyima, badi baasa nzubu ne babanzamu.

Apo bua bena lelu, muntu yonso udi wenza cidiye musue. Kadi mbimpe kuvuluka se: Kuena mua kudianjila kubuela mu nzubu mupiamupia ne mukaji wa ku mutu to, nansha kakese.

Tatu Pascal Kabemba wa mu Lukelenge, munu mu Mbujimayi, mmumvuije pende se:

Bua kabuela mu nzubu webe mupiamupia, angata amu diku diebe dijima, ukabuela mu nzubu anyi mu lupangu lupialupia. Pawudi ne bakaji babidi, uyaya kabanza ne mukalenga muadi.

Pawikala mumane kumuipata, cikole mushale ne bana bende, udi wangata umue wa ku bana aba, uye kalala nende mu nzubu; bua atemeshemu mudilu wa tukunyi. Nenku padibu bucia, wewe ubuele mu nzubu ne bena diebe.

02II

Pa bibidilu bietu bia kabukulu

Ku Baluba eku (4°)

M.6_7-8    lukonko 4.2.

M.7_4-5    diandamuna 21

Munyaku pawu udi unuebeja se: Nudi nuamba penu bishi bua diandamuna edi pa kuteleja lukonku luvua luela?

02JJ

Malu maciompakana

Muena kanemu nnganyi?

M.7_1-2    lukonko 11.4.

M.7_4-5    diandamuna 22

02KK

Malu maciompakana

Muivi nnganyi?

M.7_1-2    lukonko 11.3.

M.7_4-5    diandamuna 23

Tatu Benoît Ilunga ne tatu Dismas Mukudi badi bamba ne:

Ku bivi babidi aba, wa ciomba ne wa cisanji, muivi menemene ngua cisanji; bualu kena mutondele tatuende bubi buende to. Nansha Mikanda Minsanto mine idi ileja se: "Watonda ne walekela, nebamufuile luse".

Tatu Tharcisse Lumina mmuambe pende se: Muana uvua mupane cisanji cia tatuende ke muivi menemene. Kadi uvua muibe ciomba, mbimueke se: uvua muibe bua nzala. Ke padiye mutonde cilema ciende.

02LL

Malu maciompakana

Mu budimi bua bende

M.7_1-2    lukonko 11.1.

M.7_4-5    diandamuna 24

Tatu Benoît Ilunga ne tatu Dismas Mukudi mbambe bobo ne:

Muntu uvua mudime budimi bua mutumba nende muikale mu lupitadi, mmuenze cilema cinene. Bualu mbimueke se: uvua ujinga lufu lua muinende ewu, bua yeye kuangata bintu biende, pamue apa nansha mukajiende muine. Lungenyi elu ndubi menemene. Pa nanku, bamupeshe tumbela anu tukese, tua muvuaye mudime mu budimi ebu, anyi bamupala mene.

Tatu Ciamanga udi usakidila pende se: Muena budimi amupeku ndambu wa tumbela, bua pavuaye mudime; bualu bu budimi buikale amu ne cisuku, yeye muenabu kavua mua kupeta kantu nansha.

02MM

Nsombelu wa mu bantu

Pa Baluba (1°)

M.7_3    lukonko 1

M.7_6-7    diandamuna 1

Tudi bapete mandamuna kudi betu aba :

- Tatu Félicien Kazadi wamba ne: basombele badiangana ku buloji badi anu bamamu ; bualu bobo ke badi bapite kuikala ne muoyo mubi, kabidi bapita kupatula malu masokome a mu nzubu.

- Tatu Lukusa Mukinayi udi uleja yeye se: bantu bonso badi anu badiangana ku buloji, bualu tukadi bamone bienzeke. Kadi buloji bua muntu mukaji budi butamba kutumba nangananga mu diku dia babayende.

- Tatu Ciamanga Lumina udi wamba pende ne: badi bapita kudiangana mbamamu, bualu bobo ke badi ba bungi. Bantu balume bobo bungi buabo mbushadile. Nanku pa bantu lukama batatu badianganyi badi mua kuikala anu babidi cianana.

Munyaku pawu udi unuebeja se: Pa kuteleja lukonku luvua luela pa cilumbu eci cia didiangana ku buloji, ne pa kumvua mandamuna mafila kudi bana betu aba, nudi nuamba penu bishi? Kadi ku dienu dimona, mandamuna aa ne lukonku luine mbiakanangane anyi?

02NN

Pa bibidilu bietu bia kabukulu

Kumanya mianda ya kale (3°)

M.7_3    lukonko 2.1.

M.7_6-7    diandamuna 2

Tatu Nkashama Lumina, Lukusa Mukinayi ne Félicien Kazadi mmbafile diandamuna edi:

Ciambilu eci cidi cileja muvua bantu babidi aba bikale bumvuangana bikole, kabidi bikale bilobo binene bia mvita. Nanku muntu mubunde Katomba mmubunde Cienda.

02OO

Pa bibidilu bietu bia kabukulu

Ku Baluba eku (1°)

M.7_4-5    lukonko 5

M.7_6-7    diandamuna 3.1.

Ku lukonko luela pa muanda wa disoma dia biakudia bipiabipia mu kabukulu ketu, tatu Mpoyi Cimankinda mmuleje se:

Pavua tatu muikale ne bakaji bavule, dituku dia disoma, uvua ulaala kua mukalenga muadi. Nenku dituku divua dilonda bavua baya kupola cintu ne cintu mu budimi. Pashishe bavua babiipika pamue. Ke tatu kubidiaye ne bana ba kua mukalenga muadi nkayabo. Bamane kujikija mushinga ewu, bena mu lubanza bonso badi bashisha kudia pabo bintu bipiabipia.

02PP

Malu a kabukulu

Mua kupita nawo lelu (2°)

M.7_4-5    lukonko 10

tangilayi M7_9: d18

M.7_6-7    diandamuna 3.2.

Ku lukonko luela pa muanda ewu, muanetu Mpoyi Ciumankinda mmuandamune ne:

Muena Kristo kena mua kudia mbuji wa mabuki to, bualu kuenza nanku nkulekela diitaba bua kupingana ku kabukulu.

Tuvuluka se: Padibo bafila mbuji ewu, badi bamba ne: Diilayi wenu udi mufue. Diba adio bidi bishala bu ciovo cibuela.

02QQ

Malu a kabukulu

Mua kupita nawo lelu (3°)

M.7_4-5    lukonko 11.1. ne 11.2.

*kt M 8_4-5: d20

M.7_6-7    diandamuna 3.3.

Pa muanda ewu, Mpoyi Cimankinda udi uleja se: Nzubu wa bakishi badi bamuasa kudi mujike nansha kudi mubake. Bidi momumue bua nkambua. Kadi ewu yeye diende dimukuna didi ne mishinga mivule

Badi bamukuna anu ngondo muikale kuulu.

Mukunyi udi udianjila kusebela kaaba kumfundu kua nzubu anyi ku lupengeleka, wimba cina kine kaaba aku, mutue binu panshi, mukuate muela manza abidi.

Pashishe udi uya kanyokola katamba ka cikusukusu, ukatuula musangu anu umue, uya nako kakuata mu bianza bibidi biela muulu, kayi utangila panyima. Padiye ufika, udi ukeela mu cina kayi ukalongakaja to, nansha koko kasendame; pashishe udi wela buloba kuinshi.

Padibu bucia, udi ukeba nsongakaji wa mu diku diabo, ucidi kamama, bua iipike nshima ne misangi, ayelele nkambua, miteeka pa dibeji dia dikuenda.

Bua kumana mushinga ewu tatu udi ne bua kulaala kua mukalenga muadi, kabidi diba dia kukuna nkambua udi ne bua kuikala ku makasa kutupu …

02RR

Pa nsumuinu ya bankambua

Ngumvuilu (3°)

M.7_4-5    lukonko 8.4.

kt*M7_9:d17

M.7_6-7    diandamuna 4

Tatu Boniface Citenga ne tatu Mbulayi Barthélemy mmbumvuije, bamba ne:

Muaba ewu bankambua badi baleja mudi muntu mua kulela muana mumufuane.

02SS

Pa bibidilu bietu bia kabukulu

Kumanya mianda ya kale (3°)

M.7_3    lukonko 2.2.

M.7_6-7    diandamuna 5

mBandamune kudi tatu Ciamanga Lumina, Lukusa Mukinayi ne Kazadi Félicien, baleja se: Muanda ewu bavua bawenza pavua cintu cijimine. Diba adio uvua muciibe uvua utanduka.

Tatu Lukusa Mukinayi mmusakidile ne: Diba dia lufu bavua mua kunuina mayi pa lukasu bua kumanya kudilu lufume.

02TT

Pa bibidilu bietu bia kabukulu

Kumanya mianda ya kale (3°)

M.7_3    lukonko 2.3.

M.7_6-7    diandamuna 6

Muanetu Félicien Kazadi wa kua Ciaba mmuandamune ne:

Kazubu aka muipu uvua ukaasa bua kukobolola mansebende mufue. Dikaasa dimane kujika, bavua bamupe mukaji nansha mbuji.

Munyaku udi unuebejulula se: Diandamuna dia muanetu Félicien ndijikije nyota yetu bilondeshila lukonku luvua luela anyi?

02UU

Malu a kabukulu

Mianda ya bisamba (6°)

M.7_4-5    lukonko 27

kt *M7_9: d1

M.7_6-7    diandamuna 7

Tatu Kambala Léonard, musadidi ku Cilowa Luabanya nteta, mmuleje se:

Bana betu ba mua Lusangu, badi mu njila wa ku Cibombo, mbakua Kalonji. Pamuangelabo kuabo, kufikabo mu bakua Dishio. Mfumu Mbombo Cimpanga kubakidila e kubapa muaba wa kuasa, bu muvuaye muenze bua bakua Nyanga, Bajila Kasanga, bakua Mpuka ne bena Cilunda.

02VV

Malu a kabukulu

Ku Baluba eku (2°)

M.7_4-5    lukonko 12

M.7_6-7    diandamuna 8

Tatu Boniface Citenga ne Mbulayi Barthélemy mmbaleje se: Padibo bateeka mfumu mu nkuasa, badi bamuimbila biombelu ebi: Mudimba, ciondo, madimba, nshiba ne bipuidi.

Kadi muanetu Kabeya Frédéric wa mua Macici, ku Ditu, udi wamba yeye ne: Mfumu, dia dimuteeka mu nkuasa, badi bamuimbila madimba nkayawo. Biombelu bikuabo badi babimba ciabio cikondo. Cilejilu : Nsambi diba dia mvita, bisanji diba dia disanka, bipuidi ne bikasa diba dia ditangalaja madilu.

02WW

Nsombelu wa mu bantu

Mu Baluba (2°)

M.7_4-5    lukonko 4

*tangila ne kuinshi ku 7_9: d16

*kt M8_8: d12

M.7_6-7    diandamuna 9

Mena a bana ba mapasa

Tatu Boniface Citenga wa mua Kanyana ne Barthélemy Mbulayi wa mu Inabanza, ku Ngandanjika, mmbandamune ne:

Wa kumpala : Mbuyi Cingu,
Muibidi : Kabanga nansha Nsanza,
Muisatu : Katuma,
Muinayi : Mbalayi.

NB. Bua mena a bana ba mapasa tangila kabidi: M. 8_8 : diandamuna 12

02XX

Nsombelu wa mu bantu

Nsombelu mu diku (1°)

M.7_4-5    lukonko 2

*kt M7_9: d15

*kt M8_6-7: d11

M.7_8    diandamuna 1

Ku lukonko lua pa kansungansunga ka bena diku luela kudi mubadi wetu Bijika Monique, mamu Mushiya Christine wa mu Kasavubu mmuandamune, ubela muinende ewu ne:

Bilondeshila mushinga udi batatu bangata nawu mukaji kuonso eku, pawudi musue kusomba bimpe, epuka nabo bilumbu. Cianana, wewe mutembangane nabo bukole, badi bakuipata, anyi bakuyile ku cifufu cibi. Cikole umanye ne: Bobo pabo badi anu balela bana ba bakaji, babaselesha kabidi babadile biuma. Nanku, tuamba ne: Mbanyishe mua kudia bia nsambu e kudia ne bia cibawu pamue anyi?

02YY

Nsombelu wa mu bantu

Nsombelu ne bakuabo (1°)

M.7_4-5    lukonko 7

*kt M8_4-5: d19

M.7_8    diandamuna 2

Muanda wa bivi badi benda ne bia lufu bufuku

Mamu Mushiya Christine udi wandamuna ne: bua kuluisha bubi ebu, mbimpe tuvudije mbua mu mpangu yetu.

02ZZ

Malu a kabukulu

Ku Baluba eku (3°))

M.7_4-5    lukonko 22.1.

*kt M8_6-7: d10

M.7_8    diandamuna 3

Ku lukonko luela pa muanda ewu, mamu Christine mmuandamune ne: Munda mua mukalenge mudi mua kulela mpika.

Monayi: Bua kupiana bukalenga nansha kuakidila milambu ya kudi bena diiku, anu wewe muikale wa kuinshi kua lubanza. Bena ku mutu bobo badi mua kuangula mpasu anu kuinshi kua lubanza, koko kubutuke anyi kubule muntu wa nsongo.

02AAA

Malu a kabukulu

Mianda ya bisamba (6°)

M.7_4-5    lukonko 27

kt *M7_6-7: d7

M.7_9    diandamuna 1

→ Tudi bapete diandamuna kudi tatu Jean-Pierre Kamba wa ku Cibombo ne Kadima Constantin, wa ku bakua Cimuna, baleja se: Bana betu badi mu njila wa ku Cibombo, badibo babikila ne: mba mua Lusangu, mbakua Kalonji ba bakua Mukendi, mu Cilengi.

Bana betu aba bavua baye muitu, ku luseke lua Nzaba, muaba udibo babikila ne: mua Makangu, bua kuosha makala. Ke mutoke kubumbusha aku e kubateeka kumpenga kua njila wa mashinyi, muaba udibo mpindiewu. Kadi bu muvuabo kabayi ne mfumu, ke kutekabo Lusangu mukulumpe, bua kuikalaye mubalombodi.

→ Anu pa muanda wa bena mua Lusangu ewu, tatu Stanislas Mbaya wa mu Cikama, udi usakidila se : Ilunga Lusangu unudi numvua awu, uvua musalayi wa kale, mumane kushala mujika’a ngondu. Pumukilaye ku busalayi, kujingaye bua kuya kaasa muaba wa pa nkayende. Ke kulombaye muaba kudi Mbulamatadi, e kuasa.

02BBB

Malu a bankambua

Pa tusala ne misambu (2°)

M.7_1-2    lukonko 3.2.

kt*M7_4-5:17

M.7_9    diandamuna 2

Tatu Stanislas Mbaya udi ufila diandamuna dishilangane ne dia tatu Nkashama Lumina, wa ku bena Cimpuma. Didi nunku: Musambu ewu bavua bawimba, mfumu muikale pa makaya a bena cipangu cia bukalenga : ke Ntita ne Muadiamvita. Pinapo, Ntita mumane kuowesha mfumu mayi a bukalenga, bilondeshila bisamba, udi umubandisha kuulu kua nzubu anyi kua muci wa mulemba. Pashishe, bamane kumumanyina mishinga ya bukalenga yonso, udi utulukila pa makaya a batuambi aba. Diba adio badi bamushikika mu cipoyi, baasa nende musesu, bende bimba kasambu ako, batangile mua Cikala Muamba‘a Ilunga. Padibo bafika nende muinamu, badi bamutulula panshi. Bualu muine Cikala ewu mmulunda wende munene; uvua mumutudile bintu bia bukalenga mupite bakuabo. Yeye ewu ke usombela upeta muanzu wa bu Luaba.

02CCC

Malu a kabukulu

Ku Baluba eku (5°)

M.7_8    lukonko 1.1.

*kt M8_2-3: d4

M.7_9    diandamuna 3

Tudi bapete diandamuna dia kudi tatu Ciamanga Lumina wa ku bena Cimpuma, wamba ne: Ku kale, bavuabo bajidika mpuku wa mpanga bavua anu bana ba balume ne bamue batatu bakulumpe bine. Bualu bavua beela meji se: mpuku wa mpanga udi wenzejangana kamunda ka mulondu.

02DDD

Pa milambu

Mua kupita ne milambu (2°)

M.7_4-5    lukonko 17

M.7_9    diandamuna 4

Ku lukonko luela kudi muanetu Nkongolo Ciongo pa muanda wa milambu, tudi bapete diandamuna dia momumue kudi betu aba: Tatu Stanislas Mbaya wa mu Anuarite Cikama, Joachim Kabuta wa ku bakua Cimanga, Kashimba Florent wa ku Ngandanjika, Kadima Constantin wa ku bakua Cimuna ne Kamba Jean-Pierre wa ku Cibombo. Bunayi buabo badi bamba se: Kabatu bapiana mukaji’a mufue bayende mucikale ne muoyo to. Nanku, nansha wewe muikale muana’a bute wa muntu, padibo biya kukulambula lupetu lua tatuebe, yeye mucikale ne muoyo, kuena mua kudidilalu to. Inda ukamupe bintu biende; yeye ke wamanya mua kupita nabio. Pikalaye musue kukupa, acio ncimutangile anu yeye. Kadi wewe mudienzele, umanye ne : Udi mudikebele mambu.

02EEE

Malu maciompakana

Pa malu maciompakana

M.7_8    lukonko 1.2.

M.7_9    diandamuna 5

Tatu Lumina mmuandamune se: Musodia, nyoka ne ngandu kabisombele bilela to; apo bidi biela mayi.

02FFF

Pa nsombelu wa mu bantu

Nsombelu ne bakuabo (5°)

M.7_8    lukonko 2

* kt M8_4-5: d27

M.7_9    diandamuna 6

Pa muanda ewu wa nkoleshilu, tatu Ciamanga Nkashama Lumina mmuandamune, wamba ne: Kalekale, mu madilu ke muaba uvua bantu balejila budisangi buabo. Bualu bavua biya ne bia didia, bua kudiila bonso pamue. Momo amu ke muvua bana ba nshiya bapetele pabo mushindu wa kuvukulaku cipesa cia nshima. Kadi pikala bakulumpe ba lelu, basomba mu madilu, meji matuma anu ku diabanyangana dia bintu bia mufue, kabayi bapesha bana ngenyi ne mibelu milenga bidi mua kubalubuluja, badi benza cilema.

02HHH

Pa Ciluba cietu

Pa ngumvuilu wa Ciluba (2°)

M.7_6-7    lukonko 11

*kt M8_4-5: d3

*kt M8_4-5: d24

M.7_9    diandamuna 8

►Pa muanda wa bumuana’a ciota,
muanetu Muya Cinowa wa ku Kenankuna mmuandamune wamba ne: Miaku eyi : Cifingu, ndondo, bujilanga ne bumuana ’a ciota idi yamba bualu anu bua momumue. Mbuena kuamba se: mmeyi masuika, adibo ne bua kutumikila kudi bonso badi benze cipungidi.

►Pa muaku « Bulungenyi »,
muanetu Mpoyi Stéphane wa ku Kenankuna mmufile diumvuija edi ne : Bulungenyi mmuomumue ne: muena dianyi ta muena bijila.

Munyaku pawu udi webeja babadi se: Diumvuija dia muaku 'bulungenyi' edi didi pa diodio anyi?

02III

Pa nsombelu wa mu bantu

Pa nkoleshilu (1°)

M.7_8    lukonko 3.2.

M.7_9    diandamuna 9

Mubadi wetu Ciamanga Lumina mmuandamune ne: Bana ba kale mbatuadije ku bunsenji too ne pa Beleji. Ba lelu pabo mbatuadije mu cikondo cia dipanda too ne ku lelu.

02JJJ

Pa Ciluba cietu

Pa ngumvuilu wa Ciluba (1°)

M.7_6-7    lukonko 7

M.7_9    diandamuna 10

Tudi bapete diandamuna dia kudi wetu Stéphane Mpoyi Mukendi, umvuija nkongo eyi mushindu ewu :

►Cifuana mawu: ngewu udi uvuluka bayende ku didia, kayi umupua muoyo mu nsombelu nansha.

►Mudie lupemba: ngewu udi mutoke munda, kayi ciji, uleja ende malu patoke.

►Kadi mbua cinyi: mmuena diyoyo, muena ngandamuinu mibi, muena bicikila tuboya.

►Angacila pinapo: mmuselele dishikila, mubule dinanga dilelela dia bayende mu muoyo.

02KKK

Pa Ciluba cietu

Mfundilu muimpe (1°)

M.7_4-5    lukonko 14

M.7_9    diandamuna 11

Pa muanda wa dinemekela dileta dia ‘v’, mbandamune kudi Jean-Pierre Kamba wa ku Cibombo, Edouard Kabeya Ciamala wa ku Muene-Ditu mu Cibangu Mpata ne Constantin Kadima wa ku bakua Cimuna, bamba ne: Mu Ciluba cietu, dileta dia ‘v’ badi badinemekela anu ne dileta dia ‘m’. Cilejilu: mvula, cimvundu, amu nanku. Aba badi bangata dileta dia ‘n’ banemekela nadio ‘v’ badi batupakana.

02LLL

Pa nsombelu wa mu bantu

Pa Baluba (3°)

M.7_4-5    lukonko 23

*kt M 8_6-7: d14

M.7_9    diandamuna 12

Pa disedibua dia ciakabidi

Bilondeshila lukonko luela kudi mamu Monique Bijika wa ku Citolo pa budi kuulu ebu, mukulumpe Joachim Kabuta udi wamba ne: Mukaji yeye mufuishe bayende, anyi dibaka diende diodio difue, udi anu mua kusedibua muaba mukuabo, nansha yeye muitanu, kakuena mukandu to. Kadi pikala bakenende badiye usangana bamuela nsenda, ajike bisosa mu macio, bualu acio mmukawu.

02MMM

Pa bibidilu bietu bia kabukulu

Pa dibaka (5°)

M.7_4-5    lukonko 20.1 ne 2

*kt M8_6-7: d12

M.7_9    diandamuna 13

13.1. Ku lukonko luela kudi tatu Katumbayi, bua kumanya mena a bakaji basambombo ba mu lubanza lumue, tatu Joachim Kabuta ewu ne Justin Kasonga wa kua Kanyaka, mbandamune se:

13.2. Bua disesukila mu nkumba umue

Tatu Joachim udi uleja se: Bakaji babidi ba kumpala aba, kabena mua kusesukila mu nkumba umue to. Bidi amu bua kupesha mukalenga muadi kanemu kende.

02NNN

Pa bibidilu bietu bia kabukulu

Pa dibaka (4°)

M.7_4-5    lukonko 18.1.

*kt M8_4-5: d14

*kt. M 9_4 : diandamuna 5

M.7_9    diandamuna 14

Pa muanda wa dibaka ne bumuadi mpinga, mukulumpe Joachim mmuleje se: Muntu yeye ne bakaji babidi, dibaka diende ne mukaji wa kumpala kufuadio, panyima yeye kusela mukuabo, kena mua kuamba se: muine mukuabo ewu wenji muadi mpinga to. Bua kupetaye bumuadi mpinga, anu yeye mumupingaje kuinshi kua lubanza. Kabidi muine mukaji awu udi usumba bana ba mukenende awu ne nzolo, nansha bakadi bamane kufua bine. Yeye kayi muenze nanku, badi bamuashila wende nzubu anu pa muaba wa mukaji muisatu, udibo babikila ne: Citumbatumba.

02OOO

Nsombelu wa mu bantu

Nsombelu mu diku (1°)

M.7_4-5    lukonko 2

kt*M7_8: d1

*kt M8_6-7: d11

M.7_9    diandamuna 15

Ku lukonko luela kudi mamu Bijika Monique wa ku Citolo, pa muanda wa matandu munkaci mua muana wa balume ne wa bakaji mu diku, mbandamune kudi kudi tatu Kashimba Florent wa ku Ngandanjika. Udi wamba se: Padi muana wa balume utandangana ne wa bakaji, mbimpe muledi anji akonkonone bualu, amanye cidibo bafuila; pashishe afile mubelu. Kadi, kutua anu ku cia muana wa balume neaa yeye ke udi utancisha dietu diku, wa bakaji udi ukatancisha kua bende, acio nditupakana dinene.

Anu pa buine bualu ebu, wetu Constantin Kadima wa ku bakua Cimuna udi wamba pende ne : Mu diku, bana bonso badi ne mushinga wa momumue, bualu bonso mbantu bafuka kudi Mulopo ku disua diende. Kabidi bonso, balume ne bakaji, badi bakumbajangana, bualu kakuyi umue kakuena mukuabo.

02PPP

Nsombelu wa mu bantu

Mu Baluba (2°)

M.7_4-5    lukonko 4

*tangilayi kulu eku ku M7_6-7: d9

*tangilayi kuinshi eku ku M8_8: d12

M.7_9    diandamuna 16

Pa muanda a bana ba mapasa banayi, tatu Florent Kashimba wa ku Ngandanjika mmufile diandamuna difuanangane ne dikavuabo bafile mu Munyaku wa cipungu cia 7: 6+7: diandamuna 9.

Anu tatu Kasonga Justin wa kua Kanyaka udi wamba se : Muana muinayi badi bamubikila ne : Ciendesha.

02QQQ

Pa nsumuinu ya bankambua

Ngumvuilu (3°)

M.7_4-5    lukonko 8.1 ne 3 ne 4

M.7_9    diandamuna 17

Muanetu Constantin Kadima wa ku bakua Cimuna ne Justin Kasonga wa kua Kanyaka mbafile diumvuija dia tusumuinu etu :

►    Kasumbu ka malenga : mmumue ne : Mulela nkaya bu badi basambombo. (kt*M8_6-7:d2)

►    Waya ku Bakuba kudianjidi kuteya : mmomumue ne : Kumpala kua kuenza bualu mbimpe kuanji kuela meji anyi kuebeja bakuabo.

►    Cikela kaciyakulela lukulu : mmomumue ne : Mudi muana ke mudi ne baledi bende. (kt*M7_6-7:d4)

02RRR

Malu a kabukulu

Mua kupita nawo lelu (2°)

M.7_4-5    lukonko 10

tangilayi M7_6-7: d3.2.

M.7_9    diandamuna 18

Tatu Joachim Kabuta mmuandamune se: Mbuji wa mabuki udibo bafila awu, mbua kumuanga nende madilu. Tudi tumudia kakuyi dibanza to, bualu kena utangila malu a buena Kristo buetu to.Bivua’a kuikala bibi bu bobo bamuelela bakishi.

Betu aba : Florent Kashimba ne Kadima Constantin, ku lukonko elu, mbafile mandamuna mafuanangane ne avua mapatuke mu Munyaku wa cipungu cia 7.

Mandamuna

2003

(Ke citupa cia kumpala cia mandamuna 2003, cidi cibuela mu mandamuna 2002)

03A

Pa kabukulu ketu

M.5_6-7: lukonko 13

tangilayi M. 5_8-9: diandamuna 4

ne M6_1-2: d6

M. 8_1 :    diandamuna 1

Ku lukonko luela bua kumanya cisa cituadijile dilomba mbuji ewu, tatu Jean-Pierre Kamba wa ku Cibombo, mmufile diandamuna dishilangane ne akavua mapatuke. Udi uleja se: Bakuanga ke batuadijile muanda ewu.

03B

Pa kabukulu ketu

Pa mianda ya kale ya mu bisa bietu (8°13)

M.7_9: lukonko 2.13.

M. 8_1 :    diandamuna 2

Diashila dia mamu nzubu

Muanetu Kamba Jean-Pierre udi uleja se : Muana kena mua kuashila mamuende nzubu, kabiyi ku diyi dia tatu nansha.

03C

Pa kabukulu ketu

Pa mianda ya kale ya mu bisa bietu (8°9)

M.7_9: lukonko 2.9.

* kt M8_4-5: d22

M. 8_1 :    diandamuna 3

Dipiana dia mukaji'a mufue

Wetu Jean-Pierre ewu udi wandamuna se : Muntu kena mua kupiana mukaji’a muakunyiende nansha wa mansebende to.

03D

Milambu ya kabukulu

Mua kupita nayo (3°)

M.7_9    lukonko 3.2.

*kt M8_4-5: d15

 Pa diselangana

Amu yeye tatu Kamba Jean-Pierre mmuandamune se : Mu diku dia bantu kamuena mua kupangika muntu udibo mua kulambula mulambu nansha.

03E

Pa nsombelu wa mu bantu

Nsombelu mu diku (3°)

M.7_6-7    lukonko 3

*kt M8_4-5: d32

M. 8_2-3 :    diandamuna 1

Tatu Martin Kasonga wa ku Katanda, tatu Kazadi Félicien wa ku Ciala ne Mpoyi Médard wa kua Ciaba, mbandamune ne : Muntu kena mua kulekela muku wende ufua bua mashi to. Pikala mashi abo umvuangana, tatu muenu udi ufila ende bua kupandisha muku wende. Nansha muku pende udi mua kufila mashi bua kuelabo tatuende muenu. Muanda ewu kawena ulela mukiya wa dilongolola to. Pikala muku musue, udi mua kufila kantu kakese, bua kuenza bu udi musumbe mashi aa.

03F

Malu a kabukulu

Pa mianda ya kale ya mu bisa bietu (8°)

M.7_9    lukonko 2.2.

*kt M8_8: d2

M. 8_2-3 :    diandamuna 2

Muanetu Mpoyi Cimankinda udi wamba se : Mbuji wa mabuki bavua bamufila bua kuleja budisangi bua buena muntu. Munyinyi wende bavua bawabanyanaga mubishi. Muntu yonso uvua ukuta diende dibuki, ukaleja muende ne : Ke dibuki dia mua kampanda edi.

03G

Pa nsombelu wa mu bantu

Pa nsombelu wa mu dibaka (1°)

M.7_6-7    lukonko 1.1.

* kt M 8_4-5: d29

M. 8_2-3 :    diandamuna 3

Ku lukonko luela pa muanda wa busheme ne bululu mu dibaka, tatu Martin Kasongo wa ku Katanda mmuandamune nunku :

Pawudi uselelaku mukaji, kena mua kukubikila ne Mutombo to. Udi ukusamuna amu ne : Pierre. Wewe pebe udi umusamuna ne : Monique.

Kadi panudi nuibidilangana, disamunangana didi dijika.

03H

Malu a kabukulu

Ku Baluba eku (5°)

Pa nkoleshilu wa kale

M.7_8    lukonko 1.1.

*kt M7_9: d3

M. 8_2-3 :    diandamuna 4

Ku lukonko elu, Tatu Martin Kasongo musombele ku Katanda udi wandamuna ne : Bavua bakandika bana didia dia mpanga bua kubepula ku disama dia kamunda

03I

Pa nsombelu wa mu bantu

Pa bamfumu (2°)

M.7_6-7    lukonko 2

*kt M 8_4-5: d31

M. 8_2-3 :    diandamuna 5

Ku lukonko elu, Martin Kasonga ne Kazadi Félicien mbambe ne : Muntu yeye muikale ne lumu luimpe, kabidi ne ngenzelu milenga, usamba bana ba nshiya ne bakaji bakamba; utacila ne wakuila bantu badiombola, wa nanku badi mua kumusungula mu bulombodi bua ditunga ne bua Ekeleziya. Bualu ngikadilu yende eyi idi ilengelela bantu.

03J

Pa Ciluba cietu

Ciluba cimpe (1°)

M.7_4-5    lukonko 13.2.

M. 8_2-3 :    diandamuna 6

Tatu Clément Cibuabua wa kua Ciaba mmufile diandamuna ku lukonko luela kudi Kasaka kakulu pa dibueja dia miaku mienyi mu Ciluba bu mudi : district, quartier, commune... Tatu udi uleja se :

Muakulu onso udi uledibua, ukola, ukulakaja ne ufua. Ciluba cietu civua ne miaku mikuabo ku diledibua diacio, kadi mine eyi ikadi mijimine mukana mua bantu. Cilejilu "Nkuetele munange nkunda bikole" ;  bavule badi bamba se : "Nsombele munange nkunda bikole".

Kabidi nansha mu mfualansa mudi miaku mikuabo ya ci-Anglais ne ya ciena-Latin, idi milame amu mbikidilu wayo. Cilejilu "football". Mu Ciluba muine emu mukadi miaku mienyi mivule: mpengela, mbekeci, nzumiji…

Nenku bua kubuejamu miaku mikuabo, mbimpe tuanji kuolola yonso itukadi bakonyangaje mu ngakuilu. Kabidi mbimpe tuetu bonso tuluangane mvita mikole bua kunemesha muakulu wetu.

03K

Malu maciompakana

Pa malu maciompakana (9°)

M.7_6-7    lukonko 5

M. 8_2-3 :    diandamuna 7

Muanetu Félicien Kazadi mmuandamune ne :

Dibela disombela diwula bikole padi muana mubioleleku. Kadi kabiena bifuma ku misanda ya muana to. Kabidi kutuila mate pa bunyawu kudi kuwuja muminu bushiwa. Ebi bidi bienzeka bua kuleja bukole bua Nzambi.

Lukonko lusakidila kudi Munyaku: Kadi nuenu babadi bonso nudi nuamba penu bishi bua diandamuna edi?

03L

Malu a bankambua

Kumanya malu a bisamba (5°)

M.7_4-5    lukonko 3

M. 8_2-3 :    diandamuna 8

Tatu Bruno Mulumba wa kua Muembia mmufile diandamuna didi dilonda edi :

Muembia ne Kapuya mbantu bamue, bu mudi bena Mpiana ne bakua Mulumba : Odia’a Kalanga ne Mbiya’a Kalanga. Kapuya ne Muembia badi pabo mushindu awu. Kadi mvita ne matapuluka bidi munkaci muabo mbilela kudi bukalenga bua kalume nkaya buyile ebu. Buobu ebu buvua kabidi busongakaje bena Nkashama Nomba ne bena Kazadi pamue ne Muembia ne Kapuya wabo.

Munyaku udi wela tatu Bruno tuasakidila bua mandamuna ende mafila ku nkonko mikuabo. Wowo awo akadi mamane kupatuka mu Minyaku mishale.

03M

Pa nsombelu wa mu bantu

Nsombelu ne bakuabo (2°)

M.7_6-7    lukonko 4

M. 8_2-3 :    diandamuna 9

Muanetu Félicien Kazadi mmuandamune nunku :

Muanda wa mfualanga ewu ndisama dinene didi dikuate ditunga dietu. Bidi bikengela bua Mbulamatadi wetu atate mua kudiondopa. Kabidi alongeshe bantu buneme bua mfualanga ya ditunga dietu mu tulasa, mu bitendelelu, mu bisalu …

Tatu Mpoyi Jean Médard udi wamba pende ne: Mbimpe kuselesha nansha kupana lupangu mu mfualanga yetu ya bena Kongo. Ndola kayena mua kuikala cipiminu cia mishinga yetu to.

03N

Pa Ciluba cietu

M.7_6-7    lukonko 6

M. 8_4-5 :    diandamuna 1

Muine tatu Félicien Kazadi wa ku Ciala ewu udi uleja se: Mfundilu mulenga wa miaku eyi nyewu :

Tshiota, mbua, kayi , nyawu. Mfundilu ewu ke utuvua balonge pa mumpela Kaciabala. Dikudimuna ne dishintulula dienu dia mfundilu wa miaku diapangishi bana ba lelu difunda mukanda wa Ciluba. Bakulu pabo ne: Tuye lumue …

03O

Malu a kabukulu

Pa mianda ya kale (7°)

M.7_6-7    lukonko 10

M. 8_4-5 :    diandamuna 2

Anu tatu Félicien Kazadi ewu mmuandamune se: Manzonzo ki nga bakua Mulumba to; apo adi asanganyibua mu Kasansa menemene. Pikalawo a bakua Mulumba, badi bayimba mu kasala kabo bishi ? Bu Kabena ne Kantshimbe, bikale binemenene ku Kasansa, diba adio Manzonzo ngabo.

03P

Pa Ciluba cietu

Pa ngumvuilu wa Ciluba (2°)

M.7_6-7    lukonko 11

*kt M7_9: d8

*kt M8_4-5: d24

M. 8_4-5 :    diandamuna 3

Tatu Félicien Kazadi ne wetu Mpoyi Médard wa ku bakua Sumba mbumvuije ne: Padi muntu ubikila mukuabo mushindu ewu mmusue kuleja se : muine ewu nshakena nende wa muena nzubu nanyi. Tatu Félicien mmusakidile ne: Muaku muine bulungenyi mmufume ku muakulu wa cisawudi.

03Q

Pa nsumuinu ya bankambua

M.7_4-5    lukonko 8.7

M. 8_4-5 :    diandamuna 4

Muanetu Albert Nkongolo Ciongo wa mu Kizito udi wamba se : mufuanu ne muanu mbintu bibidi bishilangane. Mufuanu ndifuanyikija dia bualu ; muanu pawu nkasumuinu.

03R

Malu a kabukulu

Pa didila muku

M.7_9    lukonko 2.6.

M. 8_4-5 :    diandamuna 5

Tatu Mpoyi Cimankinda Jean-Médard mmuleje se: Muntu yeye mukadila muku wende ne tungimba tua mu Ekeleziya mmuenze bimpe.

Tatu Joachin Kabuta wa ku Lufingila mmuambe yeye se: Ekeleziya ki mmuasa bua kudilangana nende ku buku to; apu mbua kulongesha. Madimba, bipuidi nansha nsambi mbikumbane mua kudila nabio.

03S

Pa nsombelu wa mu bantu

Nsombelu ne bakuabo (4°)

M.7_6-7    lukonko 9

M. 8_4-5 :    diandamuna 6

Wetu Félicien Kazadi mmuleje ne: Mamu ewu kena mua kupingana kudi bena diku dia babayende bua bamulongolole to. Kabidi kena muena cibawu to. Nansha ku kale, pavuabo bakuata mukaji ku bukole, kabavua bamuasa tshilumbu to; bavua bamba se: Malu aa menzeke mu mpukapuka.

Tatu Mpoyi Cimankinda Jean Médard mmusakidile se : Mukaji ewu, bu mudiye mubambidika kudi basalayi, kabena bamulongolola bua lufuila nansha; apo badi bamupiana kudi bena diku dia babayende cianana.

03T

Pa nsombelu wa mu bantu

Nsombelu mu diku (2°)

M.7_4-5    lukonko 21.2.

M. 8_4-5 :    diandamuna 7

Tatu Albert Nkongolo Ciongo udi uleja se : Tatu udi ututa mukaji’a muanende udi utupakana bikole. Mubidi wa mukaji’a muana ngua kucina, bualu yeye mmuku.

03U

Malu a kabukulu

Ku Baluba eku (4°)

M.7_6-7    lukonko 12

M. 8_4-5 :    diandamuna 8

Mubadi wetu Mpoyi Jean Médard udi wamba ne : Ku bintu bivuabo baselangana nabio pa kale, kuvua kapapa. Dina edi dia kapapa mmbikidilu mukuabo wa busanga bua kambuita, mu bukese buabu.

03V

Malu a kabukulu

Pa mianda ya kale ya mu bisa bietu (8°)

M.7_9    lukonko 2.10.1.

M. 8_4-5 :    diandamuna 9

Tudi bapete mukanda wa kudi wetu Yapanu Cléophas, ku Muene-Ditu. Tatu Yapanu mmuandamune ku lukonko luela mu Munyaku pa bena Manda. Bilondeshila diende dikebulula, udi wamba ne :

Manda Kayemba Ngomba Ciminyi mmufumine kua Kayemba'a Ngomba. Mande ewu uvua cilembi. Mu luendu luende, kufikaye mu musoko kampanda, kusanganaye Luambua Manda Mujangi, muikale mfumu. Yeye e kuanji kutudila muine muaba awu. Ku bungi bua matuku, kuselaye Katende muana wa Luambua ; kulelabo nende bana.

Luambua umona nanku, kuambaye se : Ciena mua kusomba pamue ne muku wanyi to. Kumuangalaye e kusabuka dishiya dia Lusema, kuya kasa mu muaba udibo babikila ne : mua Lobo. Pa kumuka, kushilaye muanende wa balume Malaba diyi se : Shala ulame Katende wenu ne bana bende.

Ke mufikile Manda ku dishala mu muaba udiye lelu ewu. Dina dia Kampema mmudipete pavuaye utamba kumbula mienza ya tumpema. Nanku Malaba yeye e kushala bu musangana muine muaba awu.

03W

Malu a kabukulu

Pa mianda ya kale ya mu bisa bietu (8°)

M.7_9    lukonko 2.11.

M. 8_4-5 :    diandamuna 10

Bilondeshila bikavuaye mumvue kudi bakulumpe ba bena Kayembe, tatu Cléophas Yapanu udi ulonda muvua bena Kayembe badi mua Mpiana ne badi mu bakua Kalonji batuadije. Bakulumpe bavua bamuambile se : Pafumine bankambua kua Mulopo Kasongo, bavua batambakane bikole bua kupeta pa kuasa. Bakulumpe betu badi baleja kabidi se : Mpiana Kabamba'a Maciocio uvua muase mu buloba bua Bak’Odile, muaba udi dina ne : mu Nsumpi.

Yeye mumane kufua, bafue kabidi kudi Cibuabua uvuaye musombele, bana ba Mpiana bayile mu buloba bua Ngandanjika, ku mikalu ne mukua Mulumba. Pinapo mpanyima pa cimvundu cikole civua cienzeke ku bak’Odile mu Nsumpi. Ke Ngandanjika kubitabijila bua kuasabo muaba awu. Kadi kubafundilaye dibangu dia kuikalabo bamulambula milambu.

Bana ba Mpiana bapeta muaba nanku, kuambilabo bavua bashale se : Tuapeci buetu buloba, tuyayi tukenze etu makalenge.

03X

Malu a kabukulu

Pa mianda ya kale ya mu bisa bietu (8°12)

M.7_9    lukonko 2.12.2

*kt M8_9: d1

*kt M9_2-3: d12

*Kutangila kabidi: M9_9: diandamuna 3

M. 8_4-5 :    diandamuna 12

Tatu Mpoyi Cimankinda udi wamba ne : Basangana ba mua Ciaba ki mbakua Kalonji to. Bualu Baluba bonso mbasangane bantu aba bamane kuasa mu buloba budibo abu.

Bobo Basangana aba ke bavua bangule Cimanga Luasambuta mu difuma diende dia ku Nsanga’a Lubangu. Mumane kusomba, Luasambuta kuselaye Mpunga wa Basangana. Kulelabo nende muana wa balume diende nKalonji.

Ke kudi lungenyi lua bamue lufumina, bua kuamba se : Basangana ba mua Ciaba mbakua Kalonji. Kalonji ewu wenzele diku dinene bua bungi bua bakaji bavuaye nabo

03Y

Pa nsombelu wa mu bantu

Nsombelu mu diku (2°)

M.7_4-5    lukonko 21.1.

M. 8_4-5 :    diandamuna 13

Ku lukonko luela bua kupatula bimanyinu bidi bileja se: mukaji mmudiatakaje bayende, betu aba, Nkongolo Ciongo wa mu Kizito ne André Nzengu wa ku Kabeya Kamuanga, mbandamune nunku:

Mukaji udi muinyike bayende panshi udi umuenekela ku diyi dia bukokeshi didiye nadio pa bionso. Cidiye wamba ke cidi bayende wenza; kena mua kutontolola kalu to.

Mulume yeye muikale ne dina dia Mukendi, mukaji udi umubikila anu ne : mMukendi, mulume pende ne: mmua Mukendi.

03Z

Pa bibidilu bietu bia kabukulu

Pa dibaka (4°)

M.7_4-5    lukonko 18.1.

*kt M7_9: d14

*kt. M 9_4 : diandamuna 5

M. 8_4-5 :    diandamuna 14

Muanetu André Nzengu mmuandamune se : Padi mukaji wa kumpala ufua, anyi ushibeya dibaka, muibidi udi wangata muaba wa mukalenga muadi.

Kadi wetu Albert Nkongolo Ciongo udi wamba yeye se : Mukaji muisatu ke udi ushala muadi mpinga. Muine ewu uvua mua kulama muaba wa citumbatumba anu pacivua wa kumpala muikalepu.

03AA

Milambu ya kabukulu

Pa bupue kabupu bua milambu

Mua kupita nayo (3°2)

M.7_9    lukonko 3.2.

*kt M 8_1: d4

M. 8_4-5 :    diandamuna 15

Mubadi wetu Jean Médard Mpoyi mmuambe ne : Muana yeye mulambule tatuende nzolo, mbuji anyi cintu kayi cionso, muledi udi wenza muenacio diakamue. Muana kena ne cilumbu cia kulondesha tatuende bua kumanya muapitaye nacio to. Nansha tatu musele mukaji mukuabo ne lupetu lua ku bintu abio, kakupingaja mulambu kudi muana nansha.

03BB

Malu a kabukulu

Pa mianda ya kale ya mu bisa bietu (8°7)

M.7_9    lukonko 2.7.

M. 8_4-5 :    diandamuna 16

Muanetu Jean Médard Mpoyi udi wamba se :

Ntumba Keta usombelebo bamba ewu mmukaji uvua kayi utuila mianda. Ubengele mua kulonda mibelu ya mu dibaka, kuanyishaye mua kuambula ditunga pa mutu. Kuyilaye e kushikilaye. Ke padibo bashala batuisha ewu yonso udi kayi umvua se : Neudikonke, bu Ntumba Keta.

03CC

Malu a kabukulu

Pa mianda ya kale ya mu bisa bietu (8°8)

M.7_9    lukonko 2.8.

M. 8_4-5 :    diandamuna 17

Babadi betu Jean Médard Mpoyi ne Joachim Kabuta wa ku bakua Cimanga mbambe ne : Biangacile ku bankambua, cilele cia difila mbuji wa buledi civuaku.

Nansha muvua mbuji ifidibua ya bungi pamutu pa mubidi mfualanga, mbuji wa buledi uvua anu ne wende muaba musunguluke. Kafidila kende kavua ka diela mamu kalumbandi bua bulami ne bukoleshi buimpe bua muanende wa bakaji

03DD

Pa Ciluba cietu

Ciluba cimpe (1°)

M.7_4-5    lukonko 13.1.

M. 8_4-5 :    diandamuna 18

Batatu aba, Albert Nkongolo Ciongo wa mu Kizito ne Kabeya Frédéric wa ku Muene-Ditu, mbandamune mushindu umue, bamba ne :

Muaku " Binga " ne " Bianga " idi yamba bualu bumue. Binga nngakuilu wa Baluba bonso. Bianga udi upita kumvuika mukana mua bakua Kanda, bena Citolo, bakua Ndoba ne bakua Bowa ...

03EE

nsombelu wa mu bantu

Nsombelu ne bakuabo (1°)

M.7_4-5    lukonko 7

*kt M 7_8: d2

M. 8_4-5 :    diandamuna 19

Muanda wa bivi badi benda ne bingoma

Tatu Albert Nkongolo Ciongo wa mu Kizito ne tatu Stanislas Mbaya wa mu Cikama mbandamune ne : Kuikala ne mbua mu mpangu ki nkubumana to. Tudi ne bua kudisuika mu bijengu bitudi basombele ne kukebela pamue njila ya mua kudisungidila. Bualu bivi bine aba mbasombele mu mbanza yetu amu.

03FF

Malu a kabukulu

Mua kupita nawo lelu (3°)

M.7_4-5    lukonko 11

*kt M 7_6-7: d3.3.

M. 8_4-5 :    diandamuna 20

Wetu Albert Nkongolo Ciongo mmufile diandamuna dishilangane ne makuabo akavua mapatuke mu Munyaku. Udi wamba se: Nzubu wa bakishi bavua bamuasa anu kudi muntu udi ne lubanza. Mujika kena ne dianyisha edi to.

03GG

Pa nsumuinu ya bankambua

Ngumvuilu (3°)

M.7_4-5    lukonko 8.6.

*kt M8_6-7: d6

M. 8_4-5 :    diandamuna 21

Muanetu Albert Nkongolo Ciongo udi umvuija se : Bua muana’a bute kuikalaye muntu mulubuluke mu diku diabo, bisombela ku mpukapuka.

03HH

Malu a kabukulu

Pa mianda ya kale ya mu bisa bietu (8°9)

M.7_9    lukonko 2.9.

* kt M 8_1: d3

M. 8_4-5 :    diandamuna 22

Tatu Médard Mpoyi udi umvuija se:

Muntu udi mua kupiana mukaji’a muakunyi ta wa manseba mu Baluba emu, nansha kakuyi diyi dishiya kudi mufue.

Wetu Augustin Kasongo wa ku Ciala mmumvuije pende se: Dipiana mukaji'a manseba nansha wa muakunyi nki cibindi to. Bualu mufue muine usombela ufila dianyisha. Malu aa ngandi mumvue kabidi mumone.

03II

Milambu ya kabukulu

Pa bupue kabupu bua milambu

Mua kupita nayo (3°)

M.7_9    lukonko 3.1.

M. 8_4-5 :    diandamuna 23

Muanetu Mpoyi Médard udi wamba se :

Bobo balambule mudiambike mishika ya mu diku diabo ki ncilema to. Cikole udi ufila amanye se : Kakuena ciamupingajilabo to. Nansha bana babo ne Mudiambike kabena mua kumufucila nansha.

03JJ

Pa Ciluba cietu

M.7_6-7    lukonko 11

Pa ngumvuilu wa Ciluba (2°)

* kt M8_4-5: d3

* kt M7_9: d8

M. 8_4-5 :    diandamuna 24

Wetu Félicien Kazadi mufile diandamuna edi: Miaku yonso eyi idi imvuija se : Bantu aba mbalunda ba menemene; umue kena mua kupangila mukuabo nansha kakese. Miaku eyi yonso idi yamba bualu bumue.

Tatu Mpoyi Cimankinda mmuandamune yeye se: Miaku eyi mmishilangane, bilondeshila ngenzelu misunguluke ya ku bualu ne bualu.

Bua bisamba bibidi ta bivule kuenzabio cifingu, benabio bavua basumba muntu mukaji; mbuji ne nzolo. Dia didifinga, bamfumu bavua badisala, bangata mashi abo, baela mu nyinyi wa nzolo; babipikila pamue. Pashishe bavua bacibula muntu mukaji awu bidimba, bamujika ne muoyo ku kala kua njila, bia mutu bipatuke. Dina diende ke divua dishala dina dia cifingu.

Didia mayi divua dienzeka munkaci mua bantu ta mua misoko. Bena mayi badi basanga mfualanga, basumba nzolo; pashishe basomba muaba umue. Diba adio badi bambilangana muanda munene udibo badiila mayi.

Panyima badi bacibula nzolo mikolo ne mapuapua. Muntu yonso udi udisala, mashi adi apatuka awu, badi baasambakaja ne nyinyi wa nzolo, babipikila pamue. Padibio biboba, badi bangata kapese ka nshima ne ka nyinyi wa ku bipumpu, belela bakishi. Pashishe bantu bonso badi badia, bienda bilondangana, biangacile ku wa kumpala uvua mufile mashi too ne ku wa ndekelu.

Ebi bijika, muntu yonso udi upatula diyi wamba ne : Wa kudiatakaja ndondo ewu, pa kupangila mukuende, wafua cibawu. Bakishi baamutapa.

Ngenzelu wa ditua ndondo mmufuanganane ne wa didia dia mayi. Kadi mbishilangane nunku:

Ditua dia ndondo divua dienzeka mu cikondo cia biyole nansha bipupu bikole : mvita, ndululu, cifuaka cia bantu ne bikuabo. Diba adio, bamfumu ba musoko bavua basumba mukoko wa cimpanga ne muluma’a mbua. Pashishe bavua bangata malenga, nkombo ne bikondakonda, baya mu masangu a njila bua kutua ndondo. Pinapo mukoko ne mbua mbimane kulembeleja ku muci.

Mukulumpe anyi mfumu uvua udianza kuela lusanzu, umanyisha cidibo batuila ndondo. Ujikija, ke bakuabo bonso kuenza pabo momumue, benda balondangana, bilondeshila milongo yabo.

Bamane kushipa nyama eyi, badi badia nyinyi wayo muosha, anu kudi batatu nkayabo, bamujikija pa cibanza. Panyima bavua bangata kaseba ka nkashama, bosha mushila, bawela mu mayi avuabo ne bua kunua.

Bantu badi benza cifingu, badia mayi anyi batua ndondo badi bababikila ne: mbajilanga, anyi bamuana’a ciota.

03KK

Malu maciompakana

Munyaku ngua bantu bonso

M.7_4-5    lukonko 6

*kt M8_6-7: d18

*kt M9_5-6: d1

M. 8_4-5 :    diandamuna 25

Tatu Albert Nkongolo mmuambe se : Ku bakua Kanda kudi bantu bavule, bamanye dibala ne difunda. Kabidi mbajadike se Munyaku udiku. Cidibo bapange nnjila wa kulonda. Bakulu pabo ne : Nyingu kufuba nkupanga basonsodi.

03LL

Malu a kabukulu

Pa mianda ya kale ya mu bisa bietu (8°15)

M.7_9    lukonko 2.15

M. 8_4-5 :    diandamuna 26

Muanetu Mpoyi Cimankinda udi wamba ne : Muntu yonso wendenda ewu, nansha yeye wa mu cisa kayi, mmusue bua bamunemeke, banemeke kabidi cisa ciabo. Pikalabo bamubikila munkaci mua bakuabo ne : kantu ka bena, nansha ne : ka bakua, diba adio udi mua kufika munda ne kafikila.

03MM

Pa nsombelu wa mu bantu

Nsombelu ne bakuabo (5°)

M.7_8    lukonko 2

*kt M 7_9: d6

M. 8_4-5 :    diandamuna 27

Tatu Martin Kasongo mmuleje se : muanda wa cisalu udi utangila mfumu wa musoko. Nanku, nuenu bena Cimpuma disangishayi, nuyile mfumu, bua anuleje cia kuenza.

03OO

Pa nsombelu wa mu bantu

Pa nsombelu wa mu dibaka (1°)

M.7_6-7    lukonko 1.1.

*kt M 8_2-3: d3

M. 8_4-5 :    diandamuna 29

Wetu Tatu Kacindi Luka wa ku bakua Cimanga mmufile yeye butoke ebu ne:

Nsombelu wa mu dibaka udi wiya bululu padi dinanga dijika mu nzubu. Dibaluluilangana bilema ke didi dipingana pa disamunangana. Pa nanku, nuenu bana ba Munyaku bonso, alujayi dinanga mu nzubu, bua numone mua kukolesha lulelu luenu bilenga.

Kadi tatu Evariste Muntu'a Cibumbu, wa ku Muene-Ditu, mmusakidile pende ne:

Dibaka nkasaka kambuile muene meji; kabidi mbudimi bua meba. Buanga bua luondapu se: nKuepela dienda ne balunda babi; bena mukoso.

03PP

Pa nsombelu wa mu bantu

Pa nsombelu wa mu dibaka (1°2)

M.7_6-7    lukonko 1.2.

M. 8_4-5 :    diandamuna 30

Tatu Evariste Muntu mmuandamune ku lutatu lua mamu Cilanda Thérèse wa ku Ngandanjika wamba ne:

Nkolelu wa kale mmushilangane ne wa lelu. Nansha bua diselangana dia kale dine, muntu kavua udienzela to. Uvua wanji kuebeja bakulumpe ba mu musoko ngikadilu ya nsongakaji. Kadi lelu, tudi tumona muana ufika ne muntu ne: Papa ke bayanyi ewu, anyi ne: Ke mukajianyi ewu. Dina diende Fidèle anyi Claude; tukadi bamane kumvuangana.

Muledi yeye muambe ne: alondeshe bimpe muanda ewu, muana udi wamba ne: Nuenu babenge wanyi ewu, nyaya naka.

Bansonga ba lelu mbasue kudia lukasa, nanku nsombelu wabo mu dibaka udi ulonda mudi malu abo abanga. Bakulu pabo ne: Kashingi kanguila mu manaya, kadi kajimina anu mu manaya.

Pa bualu ebu, nuenu bamamu nudi ne bua kubela nsongakaji bikole bua ikale midimuke.

03QQ

Pa nsombelu wa mu bantu

Pa bamfumu (2°)

M.7_6-7    lukonko 2

*kt M 8_2-3: d5

M. 8_4-5 :    diandamuna 31

Tatu Kacindi Luka mmufile diandamuna dishilangane ne makuabo akavua mapatuke mu Munyaku, wamba ne:

Mudimu wa Nzambi udi lukuna ne mudimu wa bulombodi bua ditunga. Bualu misangu mivule tukadi bamone bantu balenduke ne balenduishe bakuabo pa kuyipalakaja. Nanku muanetu, enza mudimu umue, bua upeta difutu diawu.

03RR

Pa nsombelu wa mu bantu

Nsombelu mu diku (3°)

M.7_6-7    lukonko 3

*kt M 8_2-3: d1

M. 8_4-5 :    diandamuna 32

Tatu Evariste Muntu'a Cibumbu mmuleje se: Museleshi anyi musedianganyi kena mua kuelesha muku mashi ende to. Mu bibidilu bietu, muntu mutute muku wende, mutule mashi ki mmuenze bimpe to. Ke mudibio ne bua dimuelawo kabidi.

Kuetu kutufumina ku Nsanga'a lubangu, cintu acio mmukiya munene; muoyo kawukudingi

03SS

Pa nsombelu wa mu bantu

Nsombelu mu diku (5°)

M.7_6-7    lukonko 14

M. 8_4-5 :    diandamuna 33

Pa muanda wa nsonga uvua mutute mukaji'a tatuende

Tatu Evariste Cibumbu mmufile lungenyi wamba ne:

Nsonga ewu ne balunda bende ki mbenze bualu ebu mu mpukapuka to. Mamuende ke udi mufile diyi dia kutucisha mukenende ewu. Nansha tatuende kayi muambe diyi, bamonyi ba bualu ebu mbanane kujingila muenzavi ewu diakabi.

Muana kena ne bukokeshi bua kubuela mu malu a mu lubanza lua tatuende nansha.

03TT

Pa nsombelu wa mu bantu

Nsombelu mu diku (4°)

M.7_6-7    lukonko 13

M. 8_4-5 :    diandamuna 34

Ku lukonko luela kudi mamu Mitongo Alphonsine, pa dibenga kuvulukangana mu diku lelu ewu, tatu Evariste Cibumbu mmuleje se:

Bantu mbalekele diakuilangana cikondo eci, bualu lungenyi lua bu katadi wa pa buende ke ludi luasakaja meku. Bena nzubu ba lelu badi bamba ne: Diku didi anu mukajianyi ne banyi bana; kabidi ne: Malu a mu diku ki mmantangile to. Muoyo wa bunkonga mmujike.

Ke padi bantu bavule bashale ba bitangilayi.

03UU

Pa nsumuinu ya bankambua

Ngumvuilu (1°)

M.7_1-2    lukonko 3.1.

*kt M 7_4-5: d2

Pa tusumu ne ngakuilu muciungulule (1°)

M. 8_6-7 :    diandamuna 1

“Kuakaya Nkola, kuakashikila”

Ku diumvuija dikavua dipatuke mu Munyaku, tatu Liévin Kanyinda Nkese wa ku Cilundu mmumvuije se: Nkola uvua muntu wa Bayembi. Uvua muena malu makole. Kavua uteleja bakuende to. Yeye uvua wela menji a kukokesha bionso bia panuapa. Kadi bua ditambisha diende edi, yeye kushikila e kubula bionso. Nansha bakaji, Nkola wakabapanga. Ke kudi kasumu ako kafumine.

03VV

Pa nsumuinu ya bankambua

Ngumvuilu (3°)

M.7_4-5    lukonko 8.1.

*kt M7_9: d17

M. 8_6-7 :    diandamuna 2

Pa dikumbu dia ne

“Kasumbu ka malenga, mulela nkayende bu badi basambombo”

Tatu Liévin Kanyinda mmumvuije se :

Muaba ewu badi banyina kabidi bakacila pa kumona muntu umue wenza malu manene kabidi mimpe, mupite bantu cisumbu. Nansha mu meku etu, muana mulela umue kuabo anyi balele bakese, imue misangu basombele batanta, bapite bavua baledibua mulongo mujima.

Ne tatu Tharcisse Ciamanga mmusakidile pende ne : Kasumu aka kadi katumbisha muntu udi mumueke ne : ngua cipanda, kabidi muikale cilobo munkaci mua bakuabo. Wa nanku, badi bamutekemena mu malu mavule.

03WW

Pa nsumuinu ya bankambua

Ngumvuilu (3°)

M.7_4-5    lukonko 8.2.

M. 8_6-7 :    diandamuna 3

Pa “Cintu cinsukala”

Tatu Liévin Kanyinda mmuleje ne : Muaba ewu badi bumvuija mudi muci mutupite tuetu bantu bena lungenyi. Kulu kuawu, meshi adi atapa, kuinshi buowa bumena. Tuetu tufika, kukuata meshi, kutula buowa, e kutapa muci, kuandamuna nkunyi ya kulamba nayo.Tuetu bantu, buetu bulenga budi ku cinyi ?

Tatu Ciamanga Lumina mmumvuije yeye ne : “Bintu bivule, bilenga bileke”.

03XX

Pa nsumuinu ya bankambua

Ngumvuilu (4°)

M.7_4-5    lukonko 9.

M. 8_6-7 :    diandamuna 4

Pa « Mianda katonda bakole …
itondela ntotonji, wanyingala pankaci”

Tatu Tharcisse Ciamanga ne tatu Liévin Kanyinda mbaleje se: Ntotonji ke muende mudibo bamufuke kudi Mulopo. Kadi kasumu aka nkasue kuamba ne: Mu nsombelu wetu wa panu, muntu yonso udi usambakena ne yende ntatu. Cimpe nkukola muoyo bua kuyitekesha padiyo imueka.

Wewe kuyi mudibange mukaba, udi mufuane kunyana bu ntotonji nansha kufua mene. Bakulu pabo ne: “Panu mpasangana pakole, …”.

03YY

Pa nsumuinu ya bankambua

Ngumvuilu (3°)

M.7_4-5    lukonko 8.5.

M. 8_6-7 :    diandamuna 5

Pa “Bakufinga bantu, kabakufingi nsona”

Tatu Liévin Kanyinda ne tatu Tharcisse Ciamanga mbumvuije se :

Panu apa, muntu udi ne mushinga mupite bintu. Nanku yeye ke wa kunanga ne kutacila kumpala kua bionso.

03ZZ

Pa nsumuinu ya bankambua

Ngumvuilu (3°)

M.7_4-5    lukonko 8.6.

*kt M 8_4-5: d21

M. 8_6-7 :    diandamuna 6

Pa “Mukulu kutumba, mmulela wa muabi”

Tatu Tharcisse Ciamanga Lumina mmumvuije ne: Mukulu udi utumba ngewu udi muangate bukulu buende ne mushinga, muditeke nabu pa wende muaba. Awu badi bamuanyisha. Kadi udi kayi wenza nanku, badi bamuelela kasumu ka se: “Mukulu muindila …”

Tatu Liévin Kanyinda mmusakidile ne: Kelela ka kasumu aka kavua nunku: Mu meku etu a bungi, bamuana’a bute kabasombele ne lungenyi nansha. mBapange nsombelu mulenga ne bena diku; kabidi mbuwule ne lutambishi lua ne: bionso bia mu diku mbianyi, mianda yonso mmintangile anu meme. Ke padi malu abo anyanguka. Ditungunuka diabo disombele dikese. Mukulumpe yeye mutante, amu pende muikale wa diakalenga. Mu meku, bana bakunyi ke badi bapita kutanta; bua bakulumpe bidi ku mpukapuka.

03DDD

Malu a kabukulu

Ku Baluba eku (3°)

M.7_4-5    lukonko 22

*kt M 7_8: d3

M. 8_6-7 :    diandamuna 10

Pa bukalenga ne nsombelu mu meku

Bana betu aba, Patrice Mukengeshayi wa mu Mbujimayi, Ciamanga Tharcisse ne Kanyinda Liévin, mbandamune ku lukonko lua mamu Muadi Scholastique wa mu Inera, bamba ne:

Tatu yeye ne bakaji ba bungi, munda muende kamuena mulela mpika to. Bana bende bonso badi ne bua kuangatangana ne mushinga wa muomumue. Bualu muana nansha yeye wa kuinshi kua lubanza, kena ne bukenji bua kupana muanabo wa ku mutu nansha wa ku citumbatumba to.

Nansha mu Mikanda Minsanto tudi tusangana se: Bana bavuabo bapepeja ke bavua bapete dibenesha disunguluke kudi Mufuki.

Nanku muntu yonso udi upetula bana ba tatuende, udi upepeja ne Mubafuki muine.

03EEE

nsombelu wa mu bantu

Nsombelu mu diku (1°)

M.7_4-5    lukonko 2

*kt M7_8: d1

*kt M7_9: d15

M. 8_6-7 :    diandamuna 11

Kansungasunga ka bena diku

Tatu Kacindi Luka wa ku bakua Cimanga mmuandamune ku lutatu lua mamu Bijika Monique wa ku Citolo, wamba ne:

Cidibo bambidila muntu mukaji mu meku ne: Wewe kuena wa muetu, udi wa kua bende; se mbualu mamu udi umuka muabo mumulela, uya katancisha diku dia kuanaka. Nenku kuabo ukadi ukenda buenyi. Eci ki ncipendu to, mamu Bijika.

03FFF

Pa bibidilu bietu bia kabukulu

Pa dibaka (5°)

M.7_4-5    lukonko 20.1.

*kt M7_9: d13

M. 8_6-7 :    diandamuna 12

Mbikidilu wa bakaji mu lubanza

Tatu Tharcisse Ciamanga mmuandamune ku lukonko luela kudi wetu Katumbayi Emmanuel, bua kumanya mbikidilu wa bakaji basambombo ba mu lubanza lumue. Udi uleja nunku:

Wa kumpala udi Mukalenga Muadi, muibidi Cikala’a Muadi, muisatu Ntomena anyi Cimona Muadi, muinayi Manganda anyi Cimona Cikala, muitanu Ndaku; muisambombo udi ku luseke lua bitumbatumba.

03GGG

Pa nsombelu wa mu bantu

Pa mianda ya ditaba (1°)

M.7_4-5    lukonko 25

M. 8_6-7 :    diandamuna 13

Pa dishipa dibaka

Tatu Tharcisse Ciamanga mmuambe se: Bambi ba Nzambi, bobo basulule dibaka dia mukaji udi musue kushipa bayende, mbenze bimpe. Bualu Nzambi muine ki mmusue se: muntu apangile muinende to. Nansha bakulumpe betu mbambe se: “Mudia nende ki mmufuisha, mbilenga wamutuma ne muoyo waya”.

Munyaku pawu udi webeja babadi se: Bushiwa, muambi wa Nzambi udi ne bukokeshi bua kusulula dibaka dia bende anyi? Nansha yeye muanyishe dituma dia mukaji kuabo, ngenzelu ewu ke disulula diena dina dia dibaka anyi?

03HHH

Pa nsombelu wa mu bantu

Pa Baluba (3°)

M.7_4-5    lukonko 23

*kt M 7_9: d12

M. 8_6-7 :    diandamuna 14

Pa disedibua dia pa mikawu

Tatu Patrice Mukengeshayi wa mu Mbujimayi ne tatu Tharcisse Ciamanga mbafile diandamuna ku lukonko lua mamu Bijika Monique wa ku Citolo, bamba ne:

Pikala mukaji musue se: bamusele pa bakaji bakuabo, bidi amu bimpe, pamutu pa yeye kuditua mu ditunga ne kututakena ne "bulele ki mbuseba".

Wewe mamu, pawudi muye ku dibaka dia nanku, kuteleji biambamba bia bakenebe abo to. Bobo mbena ne: "Bicikile, tuboye". Lamata amu udi mukusele.

Munyaku pawu udi anu utekemena mandamuna enu mavule, adi mua kufila butoke pa cilumbu eci.

03III

Malu maciompakana

Pa malu maciompakana (11°)

M.7_9    lukonko 1.1.

M. 8_6-7 :    diandamuna 15

Mvita ya bena mutumba (11°1)

bua matandu a bena nzubu

Wetu Stéphane Mpoyi Mukendi wa ku Kamuanga mmuandamune se: Muena mutumba yeye mushipe mukuende disu ne: "Bua cinyi mmuvue kusunga matandu anyi ne muena kuanyi?", muena disu ewu afile cilumbu kudi Mbulamatadi, bua acikose. Cibi yeye muanetu ewu kadienji nzuji nansha.

03KKK

Nsombelu wa mu bantu

Mianda ya mu misoko yetu

Bamfumu ba buloba (1°)

M.7_4-5    lukonko 1

M. 8_6-7 :    diandamuna 17

Pa kantu ka buena kalaba mu misoko ya mbongo

Tatu Liévin Kanyinda mmuambe ne: Mabua a mbongo adi bu kapumbu anyi nguvu mushipa. Muntu udi ukosela apa, munga ukosela papa. Kadi bamue bamfumu badi bakolela bantu anu bua lukinu.

Ne tatu Ciamanga Lumina mmuleje se: Misandu mikuabo eyi kabena bayenza kudi bantu bavule bu mudibio bua mbongo nansha. Kabidi bipeta bidiyo ipatula kabiena kufuanyikija ne bia mbongo to.

03LLL

Malu maciompakana

(6) Munyaku ngua bantu bonso

M.7_4-5    lukonko 6

*kt M8_4-5: d25

*kt M9_5-6: d1

M. 8_6-7 :    diandamuna 18

Pa muanda wa bakua Kanda ne Munyaku

Tatu Kacindi Luka wa ku bakua Cimanga mmuambe se: Mu musoko, muomo kamuyi muntu udi muambule mpala bua kutabeja bakuabo, mbikole. Muetu munu mu bakua Cimanga, bu kabiyi bua tatu Kabuta Joachim, tuetu katuvua mua kumanya Munyaku to. Bidi bia muomumue ne bua bakua Kanda. Kabena ne mubasonsodi nansha.

03QQQ

Malu maciompakana

Pa malu maciompakana (11°)

M.7_9    lukonko 1.3.

*tangila diandamuna: M8_10 : d9

M. 8_6-7 :    diandamuna 23

Pa mbikidilu wa meba mu Ciluba (11°3)

Tatu Stéphane Mpoyi Mukendi wa ku Kabeya Kamuanga mmuandamune ku lukonko luela pa dilondangana dia meba mu Ciluba. Umvuayi:

·        Diba pa cijengu: Mundankulu

·        Diba dia 1:     Mulu mutubuke

·        Diba dia 2:     Pa muadi wa mukuku

·        Diba dia 3:     Nzolo wa kumpala

·        Diba dia 4:     Nzolo muibidi

·        Diba dia 5:     Kabundubundu

·        Diba dia 6:     Lunkelu

·        Diba dia 7:     Dindadinda

·        Diba dia 8:     Dinda

·        Diba dia 9:     Musamba’a nzolo

·        Diba dia 10:     Mubanduku anyi Misasa

·        Diba dia 11:     Kabambakena

·        Diba dia 12:     Mujalamu

·        Diba dia 13:     Musendamu

·        Diba dia 14:     Mpulumuku

·        Diba dia 15:     Ndinga balambi

·        Diba dia 16:     Cilembalemba

·        Diba dia 17:     Cilemba’a nkuci

·        Diba dia 18:     Ndengeja babi

·        Diba dia 19:     Kajimba’a buenyi

·        Diba dia 20:     Musombosombo

·        Diba dia 21:     Kalala balanda

·        Diba dia 22:     Cilu cia kumpala

·        Diba dia 23:     Cilu cibidi.

Munyaku udi webeja babadi se: nudi nuamba penu bishi pa mena a meba aa ne dilondangana diawo?

03UUU

Malu a kabukulu

Pa mianda ya kale ya mu bisa bietu (8°2)

M.7_9    lukonko 2.2.

*kt M8_2-3: d2

M. 8_8 :    diandamuna 2

Mbuji wa mabuki

Tatu Nkongolo Ciongo udi umvuija se : Mbuji wa mabuki badi bamudia kudi bisamba bionso bia Baluba. Kadi mushindu wa dimudia mmushilangane. Mu bimue bisamba bantu bonso badi bamudia ; mu bikuabo, anu Bamuadiamvita ke badi ne bukokeshi bua kumudia. Cia kumanya cia se : nyinyi wende badi bamuabanyangana anu mubishi.

Tatu Stephane Mpoyi Mukendi wa ku Kabeya Kamuanga mmumvuije se : Mbuji wa mabuki kabena bamulombela bantu bonso to. Badi bamulombela anu bakalenga ba majamu, ditunga nansha musoko. Mabuki aa se ngadi bena musoko basuikila nyinyi wa pa buende, mushilangane ne wa ditangalaja nende madilu. Mabuki aa adi apingana pa avua mukalenga usuika pende pacivuaye ne muoyo.

Tatu Felicien Kazadi wa ku Ciala udi wamba yeye se : Mu Kasayi emu, mbuji wa mabuki kabena bamudia kudi bisamba bionso to.

Tatu Cimanga Mpinga Luasambuta wa ku Ngandanjika mmuambe se : Bana betu bena ditaba , nuenu bonso nudi ne bua kudia mbuji wa mabuki; bualu kabena bakuila nende ne nku nkambua ne nku bakishi to. Nansha mu kabukulu ketu bantu bavua badile kakuabo anyi tatuabo nshima eyi bua kuleja dinangangana diabo. Kakuena dibanza bua muena ditaba to.

03WWW

Malu a kabukulu

Pa mianda ya kale ya mu bisa bietu (8°14)

M.7_9    lukonko 2.14.

M. 8_8 :    diandamuna 9

Mfuki wa musambu wa Munyaku

Tatu Stéphane Mpoyi Mukendi mmuandamune ne: Munyaku udi uleja didisuika dia bantu pamue. Civuabo belamu, nansha citudi tuelamu mpindiewu se nngenyi, malu, nsumuinu, nkonko, mandamuna ne mianda yonso idi mua kuakaja nsombelu wa bena Munyaku bonso.

Tatu André Nzengu wa ku Kabeya Kamuanga mmuandamune ne: Kale, bavua bimbe musambu wa Munyaku wa nsona kudi bena Manda, bakua Mulumba ne bena Nsana. Bavua bawimba bua kuleja diumvuangana divuabo nadio ne bua kulondelangana malu avuabo nawo mu misoko.

03ZZZ

nsombelu wa mu bantu

Pa Baluba (2°)

M.7_4-5    lukonko 4

*kt M7_6-7: d9

*kt M7_9: d16

M. 8_8 :    diandamuna 12

Pa bana ba mapasa

Tatu Ciamanga Tharcisse mmufile diandamuna dishilangane ne akavua mapatuke mu Munyaku (tabgila M7_6-7 diandamuna 9 ne M7_9 diandamuna 16) pa mena a bana ba mapasa. Udi wamba ne :

Muana muinayi tudi tumubikila ne : Katuma cindonda anyi Mulonde Katuma

03CCCC

Pa Ciluba cietu

Ngumvuilu wa miaku (3°)

M.7_9    lukonko 4.2.

M. 8_8 :    diandamuna 16

Diumvuija dia miaku

Tatu André Nzengu mmuandamune ku lukonko luela kudi wetu Cimpanga Dominique wa ku Ngandanjika. Umvuayi !

• Ina’a banza : mmukaji musela, musombe kumbelu kua bayende.

• Ilunga’a Mbiye : mmukaji udi kayi musela, muikale muana muabo.

• Ina’a muana : mmukaji mumane kulela, nansha mu dibaka nansha mu ditunga.

03DDDD

Pa Ciluba cietu

Ngumvuilu wa miaku (3°)

M.7_9    lukonko 4.3.

M. 8_8 :    diandamuna 17

Diumvuija dia miaku

17.1.

Pa ngakuilu wa ne : Bualu bua munda kuambidi mukajiebe.

Tatu André Nzengu udi umvuija ne : Badi bakolesha muanda ewu mu cisa cietu, bualu mukaji yeye muikale ne meji mabi, kabidi ne mianda ya ku mishiku, uyaya wenda usansa bualu bumuambila mu kayowayowa.

Tukadi bamone bantu bashibeyangane bua bualu busokome bukalasula kudi mukaji.

17.2.

« Kudi bulunda ne mpuluishi »

Wetu Nzengu André mmuleje se : Muanetu, pawudi muenzavi kuena mua kudia bulunda ne mpuluishi to ; bualu yeye wende mudimu ngua kukuata benzavi mu nkongo yabo yonso.

03EEEE

Malu a kabukulu

Pa mianda ya kale ya mu bisa bietu (8°12)

M.7_9    lukonko 2.12.2.

*kt M8_4-5: d12

*kt M9_2-3: d12

M. 8_9 :    diandamuna 1

Ku lukonko luela pa cilumbu cia Basangana ba mua Ciaba, Munyaku 7:9 lukonko 2.12.2., tatu Tentula Florent wa mu Mbujimaji mmufile diandamuna, wamba ne :

Basangana ba mua Ciaba ki mbakua Kalonji to. Nansha Ciaba Mulombo muine uvua wa Bayombo. Bualu budi nunku. Cimanga wa bakua Njikala uvua musele muana wa Ciaba Mulombo. Ke Mulombo kumupeshaye muaba wa kuasa. Panyima pa matuku, bana babo ne Cimanga kumutancila e kuasa pabo muine muaba awu. Ku kakese ku kakese, bobo kuvulangana. Pamuene Ciaba Mulombo nanku, kubashilaye muaba awu e kuya kasa ku Dibungi. Ke pavua ba kale bele kasumuinu ne:  "Ciaba Mulombo civuluka pashishe, pavuile bakua Njikala kambi" .

03RRRR

Malu maciompakana

Pa malu maciompakana (11°)

M.7_9    lukonko 1.3.

*tangila diandamuna  M8_6-7 : d23

M 8_10    diandamuna 9

Pa mbikidilu wa meba mu Ciluba (11°3)

Tatu Ciamanga Lumina, mmusakidile diandamuna ku dia tatu Mpoyi Stéphane divua dipatuke mu Munyaku 8_6-7 , wamba ne : Diba dia citema ke dia misasa. Musamba’a nzolu ndiba dia dikumi, Mubanduku anyi Kabambakena ndiba dia dikumi ne dimue.