nkonko

(2000)

mua kualukila ku mbangilu wa Munyaku

Pa malu a (bibidilu bia) kabukulu

M.5_1 : lukonko 1

Mbikidilu ya kale (1°)

Mena a kale (dina: Kabala)

Tatu Albert Nkongolo Ciongo, wa mu Cikongo cia Kizito, udi wela babadi ba Munyaku nkonko idi ilonda eyi:

M.5_1 : 1.1. Muetu mu Baluba emu, dina dia Kabala didi diumvuija cinyi? Kabala mmuntu anyi? Uvua nganyi? Kabidi ngua bena nganyi? Bualu ku Kankelenge kudi Kabala, ku Kalambayi kudi Kabala, ku Miabi kudi Kabala, ku Ciaba kudi Kabala.

M.5_1 : 1.2.. Kadi ku Citolo kudi paku Kabala anyi?

Pa nsombelu wa pa bantu

M.5_1 : lukonko 2

Tatu Albert Nkongolo Ciongo, wa mu Cikongo cia Kizito, udi webeja kabidi se:

Pa nsombelu mu diku (1°)

M.5_1 : lukonko 2.1.    Kuetu kunu tudi tumona, padi muana yeye muenze bibi, muledi mulume udi wamba ne: mmufuane bamansebende; muledi mukaji pende ne: mmufuane bena kuabo. Kadi padi muana wenza bualu buimpe, baledi aba badi bamba ewu ne: mmumfuane, ewu ne: mmumfuane.

Ke padi muanetu webeja babadi ba Munyaku se: bine baledi aba, kabavua benzaku pabo malu mabi, babo baledi bababela anyi? Badi bamba miaku eyi bua cinyi?

Tatu André Muanetu, wa mu Cikama, udi wela babadi ba Munyaku nkonko idi ilonda eyi:

Pa nsombelu mu diku (2°)

M.5_1 : lukonko 2.2.     Padi mulume ne mukaji bacikale babuelelaku mu dibaka, badi baleja dinangangana dia bungi. Kadi bua cinyi panyima pa imue ngondo mukaji udi utuadija kubikila bayende ne: nkalumiana?

Anu pa buine bualu ebu, Munyaku udi webeja pawu ne: mu cine cikondo cia momumue eci, mulume usombela ubikila pende mukajiende bishi?

Nsombelu ne bakuabo (1°)

M.5_1 : lukonko 2.3.     Bua cinyi misangu mivule padi muntu ufua, bantu ba bungi badi anu ne muoyo wa kujadika ne: "Mufue ewu uvua muntu muimpe"?

Nsombelu ne bakuabo (2°)

Bintu bia bukoleshi

M.5_1 : lukonko 2.4.     Mu misoko yetu, padi muntu mulume uya kusela nsongakaji, tudi tumona bamulomba bintu bikuabo ne: ‘mBia bukoleshi’. Pamue apa mulume muine awu udi mua kuikala mulonge malonga mabandile. Kadi bua cinyi bende baledi kabena bamulombela pabo bintu bia bukoleshi? Kabavua batata pabo mua kumukolesha anyi?

Pa nsombelu ne bakuabo (3°)

M.5_1 : lukonko 2.5.     Dimue dituku dia cibilu, bantu babidi bavua banue maala bakuacike. Pavuabo bamona mashinyi iya, kabavua bumuka mu cibeba nansha. Kadi ku luseke luabo kuvua kazolo; kumvua muadi wa mashinyi, kunyemako, e kushiya njila. Bana betu ngambilayi tung: lungenyi ludi kudi nzolo anyi ludi kudi muntu?

Pa nsumuinu ya bankambua

M.5_1 : lukonko 3.

Pa ngumvuilu wa lusumuinu (1°)

Muanetu Kabuya Jean Paul, wa mu Bakua Cimuna, udi webeja babadi ba Munyaku se: " Kudia nsua mpa nsua ", bidi biumvuija cinyi?

Pa malu a kabukulu

M.5_1 : lukonko 4.

Mbikidilu ya miaba (2°)

Muanetu Nkombo Alphonse, wa mu Cikongo cia Anuarite, udi wela babadi ba Munyaku nkonko eyi:

Ku kale mu matunga etu, tuvua tumvua babikila miaba mikuabo ne: "mMu nsesa". Mine ayo mmiaba kayi? Pashishe mikuabo bavua bayibikila ne: mmatongo. Wowo matongo avua pawu miaba kayi?

Bonso bena mu nsesa ne bena ku matongo, bavua ne biabo bitupa bia malaba bisunguluke anyi peshi bavua cianana?

Mbikidilu ewu udi mua kuikala mufumine ku difuilakana dia maloba anyi?

Pa nsombelu wa pa bantu

M.5_1 : lukonko 5.

Nsombelu wa bena lelu (1°)

"Kabotoboto sesa panshi ..."

(Bualu busomona mu cibambalu: "Njila uyile ...)

Tudi ne mukanda mutufundila kudi muanetu Dieudonné Buzangu wa ku Mwene-Ditu, mu Cibangu Mpata. Udi utulondela bualu buvuaye mumone ku luine luseke alu. Budi nunku:

Nsongalume kampanda uvua ne mukaji umue, kujingaye bua kusela muibidi. Kadi bua kumueneka bu ucidi bujike, yeye kuanji kutuma mukajiende wa kumpala kuabo.

Mumane kudishadila nanku, kubuelaye mu ditunga e kupeta muana wa bakaji muikale ulonga mu cidimu citanu cia tulasa tubandile. Nsongalume ewu kuyaye kadileja kudi baledi ba muana wa bakaji e kubambila ne: " Meme ciena ne mukaji mukuabo to. " Ke kufilaye biuma bionso bivuabo bamulombe e kuangata mukaji. Ufika ne mukaji kuende, abidi mmale asatu mmipi, mulumiana e kuya kalonda wende wa diambedi awu. Mukaji mupiamupia umona nanku tokutoku... mbuum ! E kuasaye mumusedi cilumbu ne: " Wewe se uvua mungambile ne: ‘Ciena ne mukaji mukuabo.’ Kadi ewu nnganyi? " Mulumiana ne: " Udi mukusele mmeme, ki mukaji mukuabo ewu nansha. "

Baledi ba nsongakaji ewu kupetabo bualu ebu; kuyabo kanyenga muanabo wa bakaji, bamba ne: " Ucidi muana, kena mua kusomba pa mikawu to. " Cibi kabavua bamanye ne: nsongakaji ukavua ne difu ngondo isatu. Kadi panyima kujingululabo bualu ebu, e kuya kafunda nsongalume ku tubadi, bamba ne: " Muntu ewu mmunyangile wetu muana tulasa. mBimpe atufute, atufundile ne mukanda wa dijadika se: palela muanetu ewu, muana udi ushala wetu, kabidi netumufundishe ku yetu mikanda. " Balumbuluishi pabo e kulonda anu muvua baledi ba mukaji bambe amu.

Ke padi muanetu Dieudonné Buzangu webeja babadi ba Munyaku se:

• Muntu udi mua kuangata muana wa muanende wa bakaji, e kumufundisha ku yende mikanda nansha kumuselesha anyi?

• Muana muine ewu udi mua kudia bukalenga mu cisamba cia bamamuende anyi?

• Baledi ba nsongakaji ewu mbenze bimpe anyi mbenze bibi?

• Mulume ewu yeye muakule, muana udi mua kupeta dikasa dibi anyi?

Pa Milambu ya kabukulu

M.5_2-3 : lukonko 1.

Mua kupita nayo lelu (1°)

Muanetu Cilumba Nicodème wa ku Bakua Sumba Bakua Kamba, udi ulomba babadi ba Munyaku lungenyi pa bualu budi bulonda ebu, wamba ne: Tatu kampanda mmuseleshe muanende wa bakaji wa mulambu. Kuangataye biuma, e kupesha ditumba dia kuinshi, dia mua tatuende mukuabo ukavua mumane kufua. Walambudiye mulambu e kuwubenga. Ke umue wa ku ditumba dia ku mutu kua lubanza lua tatu mufue ewu, kuangata biuma e kudia pa mutu pa tatuende. Panyima pa matuku, mukuamamuende ne mubengi wa biuma awu e kufika, wamba ne: "Mpeshayi lupetu alu nselangane nalu, bu mundi bujike. Bualu bena ku mutu wa lubanza kabena mua kuangata milambu, tuetu bena kuinshi kua lubanza bacikale ne muoyo nansha".

Ke padi muanetu webeja babadi ba Munyaku se: Bualu bua nunku tudi mua kupita nabu bishi? Mu lubanza lua tatu matumba makuabo kaena ne diyi padi bena kuinshi bacikale ne muoyo anyi?

Pa Milambu ya kabukulu

M.5_2-3 : lukonko 2.

Tatu Charles Kabeya wa mu Cikongo cia Bernadette wa Bulenga ku Ngandanjika, udi webeja babadi ba Munyaku se:

Ngambilayikoko: Mulambu udibo babikila ne: ngwa konji ka bupika, mmulambu kayi? Badi bawulambula diba kayi? Udi mua kujika bishi? Ne badi bawulambula kudi nganyi?

Pa Ciluba ya cietu

M.5_2-3 : lukonko 3.

Muanetu Gaston Kabindi udi webeja nunku: Muaku ‘se’, ne muaku ‘ne’, bidi ne ngumvuilu wa muomumue anyi?

Cilejilu:     ngamufundidi ne: kafiki to.    ngamufundidi se: kafiki to

Pa nsumuinu ya bankambua

M.5_2-3 : lukonko 4.

Ngumvuilu wa muanu (2°)

(bualu busomona mu cibambalu cia "Kuetu kundela")

Muanetu Kabundi Gaston, musonsodi mu b.b.t.m. ku Luanga, mmufunde muanu udi ulonda ewu, ulomba diumvuija diawu kudi babadi ba Munyaku:

Nkonko ya muanetu idi nunku:

* Kambimbi mucimbe uvua nganyi?

* ‘Ikungula yenda iya’ ivua ifumina penyi?

* mBualu buenzeke anyi ndusumuinu ?

Malu a kabukulu

M.5_2-3 : lukonko 5.

Pa mianda ya kale (1°)

(bualu busomona mu cibambalu cia "Kuetu kundela")

Tatu Crispin Ilunga ne mamu Mua-Mbuyi Kabedi pamue ne bena mutumba nabo badi beela lukonko ludi lulonda elu:

Pikala mukua Kalonji yonso mulela kudi Cimanga Luasa Mbuta, kadi bamue Baluba mbafume penyi?

Pa nsumuinu ya bankambua

M.5_4-5 : lukonko 1.

Ngumvuilu wa nsumuinu (3°)

Tatu Ilunga Emmanuel wa mua Kanyana udi ulomba babadi betu diumvuija dia nsumuinu eyi:

Ne muanetu Charles Emmanuel Mbala, udi webeja pende babadi ba Munyaku se: Bua cinyi misangu mivule tudi tumvua bamba ne:

    "Kampanda mmuye muyile Mbaala ku Basonge"?

Mbaala ewu uvua wa bena nganyi? Ne bualu buine buvua bumuyishe ku Basonge buvua bishi? Cintu eci ndusumuinu anyi mbualu buenzeke ?

Pa mianda ya kabukulu

M.5_4-5 : lukonko 2.

Muanetu Joachim Kabuta wa ku Bakua Cimanga, mu Cikongo cia Grégoire wa Bulenga, ku Bena Mpunga, udi wela babadi ba Munyaku nkonko idi ilonda eyi:

Pa Milambu ya kabukulu

M.5_4-5 : lukonko 3.

Mua kupita nayo lelu (2°)

"Bupua kabupu bua milambu"

Muanetu Ilunga Kanyema Innocent wa kua Kihanga, ku Ngandanjika, udi wela babadi ba Munyaku lukonko wamba ne:

Pa mianda ya kabukulu

M.5_4-5 : lukonko 4.

Mua kupita nayo lelu (2°)

"Muipu mMua Mukaya"

Muanetu Cibangu Benoît wa mu Cikongo cia Vincent de Paul kua Nkuadi mmutufundile, ulomba bujinguludi kudi babadi ba Munyaku wamba ne:

Nsombelu wa pa bantu

M.5_4-5 : lukonko 5.

Nkoleshilu wa bana (°)

Tatu Albert Nkongolo wa mu Kizito wa Bulenga udi wela babadi betu nkonko idi ilonda eyi:

Pa malu a kabukulu

M.5_6-7 : lukonko 1.

Kumanya malu a kale (2°)

Tatu Mbaya Augustin wa mu Nkolongo ku Ngandanjika udi wela babadi ba Munyaku nkonko eyi:

M.5_6-7 : 1.1. : Buloba budi Bakua Mulumba ne Bena Mpiana basa ebu, buvua bua banganyi ku kale kuaka?

M.5_6-7 : 1.2. : Kabamba muledi wa Nsumpi, Cibangu Mpasu, Mbiya ne Odia uvua wa bena nganyi?

M.5_6-7 : 1.3. : Cidi Mpasu mumbukila mu Mabika, musomba muaba udiye mpindiewu ncinyi?

Pa muakulu wetu wa Ciluba

M.5_6-7 : lukonko 2.

Ngakuilu muimpe (°)

Pa Ciluba cietu tatu Mbaya Augustin wa mu Nkolongo udi webeja nunku: Miaku eyi 'kubanga' ne 'kubangisha' idi yamba bualu bumue anyi malu abidi mashilangane? Ne muaku muimpe ku ibidi eku mmuaku kayi? (Cilejilu: "ngabangi mudimu"; "ngabangishi mudimu")

Tatu Constantin Malumalu wa mu Cikongo cia Philippe wa Bulenga mu Kasavubu udi wela babadi ba Munyaku lukonko elu ne:

Bua cinyi basombela bamba ne: "Panu mpasangana pakole, masela ne bilunda mbisangana bimene"?

    Cidi cikolesha panuapa ncinyi?

    masela ncinyi?

    bilunda ncinyi?

Nsombelu wa pa bantu

M.5_6-7 : lukonko 4.1. Muine tatu Constantin Malumalu wa mu Kasavubu webeja ne : Kuetu kunu ku Baluba tudi tuamba se: Katuena mua kutelelangana bisamba to, bualu bidi bifila muoyo wa dishipangana; kadi manga a mbanza atudi tupakisha nga kushipa nawu banganyi?

M.5_6-7 : lukonko 4.2. Anu tatu Constantin Malumalu ewu udi ukonka ne : Patudi tuya ku bilo bia D.G.M bua kuangata mikanda ya njila ne kuya bu mudi ku Miabi anyi ku Kalambayi, badi batuambila ne: Nudi muetu munu mu Provense. Kadi patudi tuya ku mpenga badi batusubisha kudi bana betu aba bena D.G.M. Tuenze cinyi?

Nsombelu wa pa bantu

Tudi ne nkonko ibidi miela babadi ba Munyaku kudi muanetu Patrice Kalala Mashika musombele mu Cikongo cia Amandus wa Bulenga ku Ngandanjika:

1. Bua cinyi mu matunga onso adi ne bukalenga bua kalume nkaya, bantu mbibidile kabidi mbasue bua bikale babenzeja malu ku bukole anyi bindila anu se: Balombodi babenzele ne babakumbajila bionso bidibo nabio dijinga?

2. Bua cinyi bobo bine kabena bua kudijukila ne kukosa lukanu lua bupika?

Nsombelu wa pa bantu

Tatu Kabongo Mfiondo wa kua Kanyiki mu Kapangu udi webeja babadi ba Munyaku se: Muntu kampanda nyewu musue kupiana mukaji' a muanabo, ewu pende muikale ubenga. Kadi bua ciji, tatu ewu udi ukuata muana wa muanabo mufue ewu, ututa bikole, ushibeya cipuuka. Nanku bana betu, ambayi muaba ewu: cilumbu ncia muana anyi ncia mamuende? Tatu mmuenze bimpe anyi muenze bibi?

Nsombelu wa pa bantu

Tatu Kabuta Joachim wa mu Cikongo cia Grégoire wa Bulenga mu Nsangilu wa Lufingila udi wela babadi ba Munyaku lukonko elu:

Muntu kampanda kudimaye budimi buende, e kuselela muanende, kumupesha ne makuta a kuenda nawu mushinga. Muana kuula mashinyi ne biamu bia makula. Ke pandi ngebeja babadi ne: Ku babidi aba nnganyi udi mua kutapisha mbuji wa bukole?

Nsombelu wa pa bantu

Tatu Tharcisse Ciamanga Nkashama Lumina udi webeja bapatudi ba Munyaku wamba ne: Tuetu babadi ba Munyaku ne badi bawufundilafundila, bua cinyi katuena petu mua kumanyangana bu mudibo benza kudi bena antena ku bisanji? Mudimu utudi tuenza ewu kawena mufuanangane ne wabo anyi?

Pa Milambu ya kabukulu

M.5_6-7 : lukonko 9.

Mua kupita nayo lelu (3°)

Tatu Cisuaka Ezéchiel wa mu Dinsanga ku Bena Kalenda udi webeja ne: Mamu kampanda mmuenze mudimu wende, kusumba mbuji, e kulambula bayende, kusumba mukuabo e kulambula bena kuabo, kuselela bayende mukaji, kuselela ne bayende cina, kuselela kabidi bana bende ba balume babidi.

1. Bua muanda wa milambu, nebayilambulangane bishi?

2. Pikala lufu mua kukuata bena diku edi, dipiana dia bakaji nedienzeke mushindu kayi ?

3. Bena kua ba mukaji museledianganyi ewu badi pabo ne diyi dia kuamba mu bualu ebu anyi?

Nsombelu wa pa bantu

M.5_6-7 : lukonko 10.

Nsombelu mu diku (5°)

Tatu Albert Nkongolo Ciongo wa mu Cikongo cia Kizito wa Bulenga udi wela babadi ba Munyaku lukonko elu : Kuetu kunu bakulumpe badi bamba muana ne: Ba mulongo webe se bakadi ne bana ku bena Nzemba. Bualu ebu budi ne dilongesha kayi kudi muana?

Pa malu a kabukulu

M.5_6-7 : lukonko 11.

Nsombelu wa bena kale (1°)

(muana'a nshiya)

Anu yeye tatu Albert Nkongolo Ciongo webeja ne : Ku kale, muananshiye uvua ushala mu bianza bia batatuende mukuabo. Uvua ukola kayi umanya ne: Ndi muananshiye to. Bena kale aba bavua benze cinyi bua muana ewu kumonaye amu ne: Ndi mu bianza bia baledi banyi?

Pa nsumuinu ya bankambua

M.5_6-7 : lukonko 12.

Ngumvuilu wa lusumuinu (5°)

Tatu Albert Nkongolo Ciongo udi wela kabidi lusumuinu elu : "Mushamusha pa ditamba; mfiondo pa dimpana? Nudiladila bafue babedi bashikame, ambayi madilu mualuawu kutupita bunene". Ngumvuijayikoko lusumuinu elu ne diandamuna dialu edi.

Pa malu a kabukulu

M.5_6-7 : lukonko 13.

Nsombelu wa bena kale (2°)

Mbuji wa nyima, mbuji wa bukole

Munyaku udi ukonka babadi bonso se: Pa bankambua betu, mudimu wa 'mbuji wa nyima' ne wa 'mbuji wa bukole' uvua mudimu kayi?

Cibambalu "Kebeji"

M.5_6-7 : lukonko 14.

Nkonko ne mandamuna (°)

Tatu Kambaja André wa ku Inera mmutufundile mukanda, webeja bua imue nkonko miela mu Munyaku kadi kayiyi ipeta mandamuna. Netumuleje diyi dia Munyaku pa bualu ebu musangu walonda (M.5_8-9).

Nsombelu wa pa bantu

M.5_6-7 : lukonko 15.

Bienzenza bia bena lelu (2°)

"Kufumafuma mukenga ne diukuta ..."

(Bualu busomona mu cibambalu: "Njila uyile ...)

Tudi bapete mukanda wa muanetu Kalala Mashika Patrice wa ku Ngandanjika mu Cikongo cia Amandus wa Bulenga mu Kabanda. Udi uleja muanda wa cibindi udi muenzeke mu citupa cia mu Katonku, mu Nkolongo, wamba ne: Tatu kampanda mumane kuselesha bana; kadi bu muvuaye muena bienzenza, kumbukaye ku luende lubanza e kuya kabanjila ndiabintu mukuabo mumukile ku Katanga, mumane kulela bana museleshe, mushipe kabidi ne dibaka bua bienzenza, e kuvua kusomba ku Ngandanjika. Bamane kupetangana ne tatu ewu e kusombabo matuku mavule. Panyima pa bidimu tatu kuya kuendakana muende mua kale, ufika kusanganaye muena kuende musombe talalaa! Yeye kumuamba ne: Ciwudi musombele muaba ewu ncinyi? Kuena ne kuenu kua kuya anyi? Ndi mvua kupanyisha lupangu bua tumone kuwaya kasomba. Tatu kubuela mu nzubu e kubanga kuboza bintu bia mu nzubu, kuambulanganabo ne mamu, cia mamu cikola tatu kupingana mua ndiabintu wende e kushiila mamu mukenji wa ne: Aye muabo. Kadi mu matuku 28 a ngondo wa Cisanga ewu, pa diba dia musamba'a nzolo, tatu ewu kualukila kabidi ne bilumbu kudi mukalenga muadi wende. Bana ba mukalenga muadi bamona nanku e kucimukila kudi tatuabo ne mututu, kuya nende too ne mua mamu ndiabintu awu. Ke bonso babidi kubuela mu mututu mukole. Bantu kuya kusoka bampulushi. Aba bafika e kubakuata bonso: bana, tatuabo ne bamamuabo. Patudi tuambangana apa, bonso badi mu nzubu wa mashika. Ke padi mufundi webeja babadi ba Munyaku ne: Cibindi tupeshe nganyi? Buendenda ki nnjila wa macimbu anyi? Filayi mibelu ya kusuikakaja nayo diku edi.

Nsombelu wa pa bantu

M.5_6-7 : lukonko 16.

Bienzenza bia bena lelu (3°)

Pa buena nzambi

(bualu busomona mu "Diyi dia babadi betu")

Muanetu Kabongo Yaya Bantu wa kua Kanyiki mmufunde pende, wamba ne: Monayi mudi batendeledi benda mushinga ne diza dia Yezu bilondeshila lukuka lua mubidi wabo. Mu luendu lua Yezu Kristo katuena bapete muaba nansha umue mu mikanda minsanto udi wamba ne: Yezu uvua ulomba bintu bia kudia kumpala kua kuipata badiabolo munda mua muntu to.

Kadi monayi mudi bena lelu, bakadi balomba nzolo isambombo, ndundu ya nkunda ne ya losa, nsukadi, mabela ne bikuabo.

Tudi tunukonka se: Nudi nuamba penu bishi bua bualu ebu nuenu babadi ba Munyaku ?

Nsombelu wa pa bantu

M 5_6-7 :  lukonko 17.

Nsombelu wa bena lelu (4°)

"Mvula kalokela buowa buamena?"

(Muanda musomona mu cibambalu: "Njila uyile ...)

Tudi ne mukanda  wa muanetu Mbiya Muenza Gilbert wa mu Cikongo cia Don Bosco wa Bulenga mu Bipemba. mMutufundile utulondela ngenzelu mubi wa nsonga nabo mukuabo. Nsonga ewu uvua muimanyine baledi bende bua kubashipa, nangananga mamuende, bualu kena umulekela luesu lua nshima bua ikale ulamba pende. Padibo bamubela, udi wambila binende ne: Bua ncibashipi, nundombele bua ngikale ndamba panyi nshima nansha misangu isatu ku lumingu. Patupu ndi nzaza ngesu yabo ya nshima yonso.

Mibelu kayivua mimumtuile to e kufikaye ku disuma mamuende menu pa diboko. Ke padi Mbiya Muenza Gilbert webeja bansonga nende: Tudi mua kuenza cinyi ne nsonga ewu? Tudi batekemene enu meji.

Pa bibidilu bietu bia kabukulu

M.5_8-9 : lukonko 1.

Mua kupita nabio lelu (3°)

Tatu Joachim Kabuta wa mu Cikongo cia Grégoire wa Bulenga ku Bakua Cimanga, udi wela babadi ba Munyaku nkonko eyi wamba ne: Mukuluende kampanda uvua muase nzubu wende pacivuaye bujike. Tatuende mukuabo e kufua, mukuluende awu kupianaye mukaji'a mufue ewu; kulelaye nende muana wa balume. Kadi disomba diabo kunyanguka. Bobo kulekelangana.

Pashishe yeye kusela mukaji mukuabo, e kumuteka mu nzubu wa kuinshi kua lubanza. Kulelaye nende mulongo wa bana, mamu ewu kufua pende. Tatu kusela mukaji mukuabo e kumuteka amu ku nzubu wa muomumue. Tatu kena muimanyine apu to. Kuditantaye e kusela mukuabo, kumuteka ku mutu kua lubanza, kadi kena mulela nende to. Tatu utungunuka amu ne mudimu wende awu, e kuselaye mukuabo, kulelaye nende bana mulongo.

M.5_8-9 : lukonko 1.1.

Pa bualu ebu muanetu udi webeja se: Bakaji bonso aba, mba kuinshi anyi mba ku mutu kua lubanza?

M.5_8-9 : lukonko 1.2.

Bana ba tatu ewu nebalambulangane bishi?

M.5_8-9 : lukonko 1.3.

Anu tatu Joachim udi ukonka kabidi babadi se: Muaku ewu "Cibindi" udi umvuija cinyi?

Malu a kabukulu

M.5_8-9 : lukonko 2.

Pa ngenyi ya bena kale (2°)

Muanetu Cibangu Benoît udi wela babadi ba Munyaku nkonko idi ilonda eyi:

M.5_8-9 : lukonko 2.1.( ngenyi 2°a)

1° Musambu wa "Nshimba Ciongoloka ne bana ee, Nshimba Ciongoloka", bavua bawimba cikondo kayi? Wowu muine udi umvuija cinyi? Nshimba uvua nyama munene anyi? mBualu bufuanyikijila pa bantu anyi?

M.5_8-9 : lukonko 2.2. (ngenyi 2°b)

2° Kadi miaku eyi: "Cienda ne mudiadia, Katomba ne mpaya" idi imvuija cinyi?

M.5_8-9 : lukonko 2.3. (ngenyi 2°c)

3° Lusumuinu elu lua "Ciadime umue ciadia bangi" nduimpe menemene anyi?

M.5_8-9 : lukonko 2.4. (ngenyi 2°d)

4° Nyunyi wa lubuta usombele wasa malenji mu cikondo kayi? Bidi bimanyisha cinganyi?

Bibidilu bia kabukulu

M.5_8-9 : lukonko 3.

Mua kupita nabio lelu (4°a+b)

Tatu Elias Kadima musonsodi mu bbtm Ntalanga, udi ukonka pende se:

M.5_8-9 : lukonko 3.1.    muanda wa lupetu

1° Tatu udi ne bakaji babidi, bonso bikale ne bana. Pa kufuaye tatu e kushila muanende muanabute diyi dia kupiana mamuende mukuabo, bua akoleshe bana babo. Bamane kushala nanku e kulelabo muana wa bakaji. Kadi paselabo muana ewu, lupetu nebalupeshe nganyi?

M.5_8-9 : lukonko 3.2.    muanda wa madilu

2° Mukajianyi umvua mudisange nende mu dibaka dijidila mmufuile muabo. Ndi mua ku muenzejila mufikilu wa matuku makumi anayi anyi? Bualu nkavua mutupe ku mukenji wa Ekeleziya pa kusela mukuabo muibidi.

Milambu ya kabukulu

M.5_8-9 : lukonko 4.

Muanetu Kazadi Polydor wa ku Luanga, udi wela babadi ba Munyaku nkonko eyi:

M.5_8-9 : lukonko 4.1.

Cilumbu cia dididila dia mpetu (1°)

Muntu yeye museleshe muanende wa bakaji, e kudidiila biuma, mmuenze cilema anyi?

M.5_8-9 : lukonko 4.2.

Muanda wa dididila dia biuma (2°)

nCikondo kayi cidi muntu mua kudidiila anyi kubenga kudidiila biuma bia ku muanende wa bakaji?

Nsumuinu ya bankambua

M.5_8-9 : lukonko 5.

Ngumvuilu wa lusumuinu (6°)

Muine tatu Polydor Kazadi ewu udi utuela kabidi lukonko lukuabo: Miaku eyi idi yumvuija cinyi?     "Kambele mayi, komba bululu".

Milambu ya kabukulu

M.5_8-9 : lukonko 6.

Mu kupita nayo lelu (4°)

Tatu Cimbalanga Constantin wa mu Cikongo cia Philippe wa Bulenga mu Kasavubu, udi wela pende babadi ba Munyaku lukonko elu:

Tatu yeye mupeshe muanende mfualanga bua kuenduluka nayo; padi bintu bivula, muana ewu udi mua kuangata bimue bia ku biobio ebi kulambula wende mulambu anyi?

Pa malu a kabukulu

M.5_8-9 : lukonko 7.

Ngenyi ya bena kale (3°)

"mBambe mu ciondo"

Tatu Ciamakana wa ku Luanga udi webeja se: Mu ciondo basombele bambamu ne:

"Kasongo wa kulambula Luanga;

Kasongo wa kulambula Muamba Mukuanga;

Kasongo wa kulambula Mukua Nsumpi".

1° Mbanganyi bavua biye kulambula milambo kudi matunga asatu aa?

2° Bavua balambula bua cinyi?

3° Kasongo uvua nganyi?

Nsombelu wa pa bantu

M.5_8-9 : lukonko 8.

Nsombelu ne bakuabo (6°)

Tatu Ciamanga Nkashama Lumina udi wela pende lukonko elu wamba ne: Muena buendenda, muena buloji, muena mucima ne muena kanjabala, mupite bubi nnganyi? Yeye muikale ku bakaji, mulenga kusela nguepi?